ରତ୍ନଗିରି,୨୧।୧(ଡିଏନଏ): ବରୀ ତହସିଲ ଅଧୀନ ବିଭିନ୍ନ ପଞ୍ଚାୟତରେ ବେଆଇନ ଇଟାଭାଟି ସହିତ ଚୋରାବାଲି ଚାଲାଣ ଉପରେ ପ୍ରଶାସନ ରୋକ ଲଗାଇ ନ ଥିବାରୁ ରାଜସ୍ବ ହାନୀ ଘଟୁଛି। ଏହି ବ୍ଲକ ଅଧୀନ ୧୦୬ଟି ଗ୍ରାମରୁ ଅଧିକାଂଶ ଗ୍ରାମରେ ବେଆଇନଭାବେ ଇଟା ପକାଯିବା ଓ ଏହା ପ୍ରଶାସନର ନଜର ଆଢୁଆଳରେ ରହିବା ପ୍ରଶାସନର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ସୂଚନାଯୋଗ୍ୟ ଯେ, ବେଆଇନ ଇଟାଭାଟି ସହିତ ରାଜାତୋଟା, ରାମଚନ୍ଦ୍ରପୁର, ବରୀପାଳ, ଗମୁଁ, ରତଳାଙ୍ଗ, ଉଦୟନାଥପୁର ଆଦି ଅଞ୍ଚଳରେ ଥିବା ବାଲିଘାଟଗୁଡିକ ସରକାରୀସ୍ତରରେ ନିଲାମ ହୋଇ ନ ଥିଲେ ମଧ୍ୟ ଖୁଲମଖୁଲାଭାବେ ବାଲି ମାଫିଆମାନେ ଚୋରା ବାଲିଚାଲାଣ କ୍ଷେତ୍ରରେ ପ୍ରଶାସନର ନୀରବତା ସାଧାରଣରେ ସନ୍ଦେହ ସୃଷ୍ଟି କରିଛି। ଏହି ତହସିଲର ରାଜସ୍ବ ନିରୀକ୍ଷକ ମାନେ ଗଁା କୁ ଗଁା ବୁଲି ରାଜସ୍ବ ଆଦାୟ କରୁଥିବାବେଳେ ବେଆଇନ ଇଟାଭାଟି ଓ ଚୋରାବାଲି ଚାଲାଣ ଉପରେ କିପରି ସେମାନଙ୍କ ଦୃଷ୍ଟି ପଡ଼ୁନାହିଁ ତାହା ସାଧାରଣରେ ଆଲୋଚନା ହେଉଛି। ବିଗତ ଦିନରେ ତହସିଲ ପ୍ରଶାସନ ତରଫରୁ ବେଆଇନ ବାଲିଘାଟ ଓ ବେଆଇନ ଭାବେ ଇଟା ପକାଇବା ଉପରେ ରୋକ ଲଗାଯାଉଥିଲା। ମାତ୍ର ବର୍ତ୍ତମାନ ପ୍ରଶାସନ ରାଜନୈତିକ ଚାପର ବଶବର୍ତ୍ତୀ ହୋଇ ହାତବାନ୍ଧି ବିସିଛି ବୋଲି ବିଭିନ୍ନ ମହଲରୁ ଅଭିଯୋଗ ହେଉଛି। ଘଟଣାକୁ ଗୁରୁତ୍ୱ ଦେଇ ଜିଲା ପ୍ରଶାସନ ତରଫରୁ ଏଭଳି ବେଆଇନ କାର୍ଯ୍ୟ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଗଲେ ସରକାରଙ୍କ ରାଜସ୍ବ ବୃଦ୍ଧି ସମ୍ଭବ ହୋଇପାରନ୍ତା। ଏହି ବିଷୟରେ ବରୀ ତହସିଲଦାର ପୁଷ୍ପଶ୍ରୀ ସାଣ୍ଡିଲଙ୍କୁ ପଚାରିବାରୁ, ବିଭିନ୍ନ ସ୍ଥାନରୁ ଏଭଳି ଅଭିଯୋଗ ମିଳିଛି। ମାତ୍ର କର୍ମଚାରୀଙ୍କ ଅଭାବ ଯୋଗୁ ଏଭଳି ବେଆଇନ କାର୍ଯ୍ୟ କରୁଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇପାରୁ ନାହିଁ। ଖୁବ୍ଶୀଘ୍ର କମିଟି ଗଠନ କରାଯାଇ ବେଆଇନ କାର୍ଯ୍ୟ ଉପରେ ରୋକ ଲଗାଇବା ଓ ସରକାରୀ ରାଜସ୍ବ ବୃଦ୍ଧି କରାଇବା ଉପରେ ପଦକ୍ଷେପ ନିଆଯିବ ବୋଲି କହିଛନ୍ତି।
