ପରଜଙ୍ଗ, ୫।୨ (ଡି.ଏନ.ଏ.) – ଢେଙ୍କାନାଳ ଜିଲା ପରଜଙ୍ଗ ତହସିଲ ପ୍ରଶାସନ ପକ୍ଷରୁ କୁଆଲୋ ରାଜସ୍ବ ସର୍କଲରେ ଗଢ଼ିଉଠିଥିବା ବେଆଇନ ଇଟାଭାଟି ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ପରିବେଶ ନିୟମ ଉଲ୍ଲଂଘନ କରି ବ୍ରାହ୍ମଣୀ ନଦୀ ଅବବାହିକାରେ ଥିବା ଉକ୍ତ ଇଟାଭାଟି ଉପରେ ମଙ୍ଗଳବାର ବୁଲିଛି ଜେସିବି। ଏଥିସହ ଜଟିଆ ଗ୍ରାମର ୧୨ଜଣ ଇଟାଭାଟି ମାଲିକଙ୍କଠାରୁ ପ୍ରଥମ କିସ୍ତିରେ ୩ ଲକ୍ଷ ୮୯ ହଜାର ଟଙ୍କା ଜରିମାନା ଆଦାୟ କରାଯାଇଛି। ଅବଶିଷ୍ଟ ଟଙ୍କା ୭ଦିନ ମଧ୍ୟରେ ତହସିଲ କାର୍ଯ୍ୟାଳୟରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି। ଆଗାମୀ ଦିନରେ ଚଢ଼ାଉକୁ ବ୍ୟାପକ କରାଯିବ ବୋଲି ତହସିଲଦାର ଜୟନ୍ତ କୁମାର ଜୟସିଂ ସୂଚନା ଦେଇଛନ୍ତି।
କୁଆଳୋ ରାଜସ୍ବ ସର୍କଲ ଅଧୀନରେ ବ୍ୟାପକ ପରିମାଣର ବେଆଇନ ଇଟା ଭାଟି ଗଢ଼ିଉଠିଛି। ଜଟିଆ, ଖାଲପାଳ ଗ୍ରାମ ପାର୍ଶ୍ୱରେ ପ୍ରବାହିତ ବ୍ରାହ୍ମଣୀ ନଦୀ ଅବବାହିକାରେ ଏପରି ଶତାଧିକ ଇଟାଭାଟି ପରିବେଶକୁ ପ୍ରଦୂଷିତ କରୁଛି। ନଦୀ କୂଳରୁ ମାଟି ହାଣି ଇଟା ପ୍ରସ୍ତୁତ କରାଯାଉଥିବା ନଦୀକୂଳିଆ ଗ୍ରାମଗୁଡ଼ିକ ପ୍ରତି ବିପଦ ସୃଷ୍ଟି ହେଉଛି। ଏନେଇ ବାରମ୍ବାର ଅଭିଯୋଗ ପରେ ମଙ୍ଗଳବାର ତହସିଲଦାରଙ୍କ ନେତୃତ୍ୱରେ ଅତିରିକ୍ତ ତହସିଲଦାର ରାମକୃଷ୍ଣ ମହନ୍ତ, ସୁପରଭାଇଜର ମିନତିବାଗ ସିଂ, ବରିଷ୍ଠ କିରାଣି ସୁବ୍ରତ ସିଂ, କୁଆଳୋ ଏଆର୍ଆଇ ଦୀନେଶ ସିଂ ପ୍ରମୁଖ ପୋଲିସ କର୍ମଚାରୀଙ୍କ ସହ ଜଟିଆ ଗ୍ରାମ ନିକଟ ବ୍ରାହ୍ମଣୀ ନଦୀକୂଳରେ ଚଢ଼ାଉ କରିଥିଲେ।
ଏ ନେଇ ତହସିଲଦାର କୁହନ୍ତି, ତିଆରି ହୋଇଥିବା ଇଟାକୁ ଜେସିବି ସହାୟତାରେ ଭାଙ୍ଗି ଦିଆଯାଇଛି। ଗଢ଼ାଯାଇଥିବା ଇଟା ଆକଳନ କରି ଜରିମାନା ଆଦାୟ କରାଯାଇଛି।
