ଓ୍ବାଶିଂଟନ୍,୨୦।୧୨: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ଆମେରିକାର ପ୍ରବାସନ ନୀତିକୁ କଡ଼ାକଡ଼ି କରିଛନ୍ତି। ନିକଟରେ ଟ୍ରମ୍ପ ପ୍ରଶାସନ ଆହୁରି ସାତଟି ଦେଶ ଏବଂ ପାଲେଷ୍ଟାଇନବାସୀଙ୍କ ଉପରେ ସମ୍ପୂର୍ଣ୍ଣ ଯାତ୍ରା ପ୍ରତିବନ୍ଧକ ଲଗାଇଛି। ଏହା ସହିତ ଆହୁରି ୧୫ଟି ଦେଶ ଉପରେ ଆଂଶିକ ପ୍ରବେଶ ପ୍ରତିବନ୍ଧକକୁ ମଧ୍ୟ କଡ଼ାକଡ଼ି କରିଛି। ଟ୍ରମ୍ପଙ୍କ ଏହି ପଦକ୍ଷେପ ପରେ, ଆମେରିକାର ଯାତ୍ରା ପ୍ରତିବନ୍ଧକ କିମ୍ବା ପ୍ରତିବନ୍ଧକର ସମ୍ମୁଖୀନ ହେଉଥିବା ଦେଶର ସଂଖ୍ୟା ୩୯କୁ ବୃଦ୍ଧି ପାଇଛି।
ନୂତନ ନିର୍ଦ୍ଦେଶ ଅନୁଯାୟୀ, ୨୦ ଟି ସଂସ୍ଥାର ନାଗରିକ (୧୯ ଦେଶ ଏବଂ ପାଲେଷ୍ଟାଇନ କର୍ତ୍ତୃପକ୍ଷ ଡକ୍ୟୁମେଣ୍ଟ ଧାରକ) ଆମେରିକାରେ ପ୍ରବେଶ ଉପରେ ପ୍ରାୟ ସମ୍ପୂର୍ଣ୍ଣ ପ୍ରତିବନ୍ଧକର ସମ୍ମୁଖୀନ ହେବେ। ପର୍ଯ୍ୟଟକ, କାର୍ଯ୍ୟ, ଛାତ୍ର କିମ୍ବା ପ୍ରବାସନ ଉଦ୍ଦେଶ୍ୟରେ ଏହି ନାଗରିକମାନଙ୍କ ପାଇଁ ନୂତନ ଆମେରିକୀୟ ଭିସା ପାଇବା ପ୍ରାୟ ଅସମ୍ଭବ। ଏହି ସମ୍ପୂର୍ଣ୍ଣ ପ୍ରତିବନ୍ଧକର ଶିକାର ହୋଇଥିବା ଦେଶଗୁଡ଼ିକ ମଧ୍ୟରେ ଆଫଗାନିସ୍ତାନ, ଇରାନ, ସିରିଆ, ୟେମେନ, ସୋମାଲିଆ, ସୁଡାନ, ଲିବିଆ, ହାଇତି, ଏରିଟ୍ରିଆ, ମିଆଁମାର, ଚାଦ, କଙ୍ଗୋ ଗଣରାଜ୍ୟ, ଇକ୍ୱାଟୋରିଆଲ ଗିନି, ବୁର୍କିନା ଫାସୋ, ଲାଓସ, ମାଲି, ନାଇଜର, ସିଏରା ଲିଓନ, ଦକ୍ଷିଣ ସୁଡାନ ଏବଂ ପାଲେଷ୍ଟାଇନ ଅଞ୍ଚଳ ଅନ୍ତର୍ଭୁକ୍ତ। ଜାନୁଆରୀ ୧, ୨୦୨୬ ଠାରୁ, ହୋଟେଲ ବୁକିଂ କିମ୍ବା ସ୍ପନସରଶିପ ଡକ୍ୟୁମେଣ୍ଟ ସମେତ ବୈଧ ଡକ୍ୟୁମେଣ୍ଟ ଥିବା ଆବେଦନକାରୀଙ୍କୁ ମଧ୍ୟ ପ୍ରବେଶ ବାରଣ କରାଯିବ, ଯଦି ସେମାନଙ୍କ ପାଖରେ ପୂର୍ବରୁ ବୈଧ ଆମେରିକୀୟ ଭିଜା କିମ୍ବା ଗ୍ରୀନ କାର୍ଡ ନଥାଏ।
ପୂର୍ଣ୍ଣ ପ୍ରତିବନ୍ଧକ ସହିତ, ଆମେରିକା ପ୍ରାୟ ୧୯ଟି ଦେଶ ଉପରେ ଆଂଶିକ ପ୍ରତିବନ୍ଧକ ଲାଗୁ କରିଛି। ଏହି ପ୍ରତିବନ୍ଧକଗୁଡ଼ିକ ପ୍ରବାସୀ ଭଜାକୁ ଅବରୋଧ କରେ। ତଥାପି, ପର୍ଯ୍ୟଟନ, ବ୍ୟବସାୟ ଏବଂ ଛାତ୍ର ଭିସାକୁ ଏବେ ବି ବିଚାର କରାଯାଇପାରେ, କିନ୍ତୁ ଅଧିକ କଠୋର ଯାଞ୍ଚ ଅଧୀନରେ। ନୂତନ ଭାବରେ ଯୋଡି ହୋଇଥିବା ଦେଶଗୁଡ଼ିକ ମଧ୍ୟରେ ନାଇଜେରିଆ, ଘାନା, ତାଞ୍ଜାନିଆ, ସେନେଗାଲ, ଆଙ୍ଗୋଲା, ଜାମ୍ବିଆ, ଜିମ୍ବାୱେ ଏବଂ ମାଲାୱି ଅନ୍ତର୍ଭୁକ୍ତ। କ୍ୟୁବା, ଭେନେଜୁଏଲା, ବୁରୁଣ୍ଡି ଏବଂ ଟୋଗୋ ପୂର୍ବରୁ ତାଲିକାରେ ଥିଲେ।
Dharitri – The Largest & Most Trusted Odia Daily
