ଭୁବନେଶ୍ୱର,୨୦।୧୨(ସୁନିତ୍ ମିଶ୍ର):ବିଜେଡିର କେତେଜଣ ପୂର୍ବତନ ବିଧାୟକ ଏବଂ ଗତ ନିର୍ବାଚନରେ ପରାଜିତ ନେତା ଭୁବନେଶ୍ୱର ଉପକଣ୍ଠରେ ଏକାଠି ହୋଇ ଏକ ଭୋଜିର ଆୟୋଜନ କରିଥିଲେ। ଏହି ଭୋଜିରେ ଯୋଗଦେଇଥିବା ନେତାମାନଙ୍କ ମଧ୍ୟରୁ କିଏ ତା’ର ନେତୃତ୍ୱ ନେଇଥିଲେ ସେକଥା ହୋଇପାରି ନାହିଁ। ହେଲେ ଯେଉଁ କେତେଜଣ ଭୋଜି ଆୟୋଜନ କରିଥିଲେ ସେମାନେ ମଧ୍ୟ ଜାଣି ନ ଥିଲେ ଏଥିରେ ୪୦ ନେତା ସାମିଲ ହେବେ। ତେବେ ଏହି ଭୋଜିରେ ଯୋଗଦେଇଥିବା ୨ ଜଣ ନେତା ସେମାନଙ୍କ ନାମ ଗୋପନ ରଖି କହିଛନ୍ତି, ଦଳର ବ୍ୟବସ୍ଥା ବିରୋଧରେ ଏବେ ଏକାଠି ନ ହେଲେ ସମସ୍ତଙ୍କ ରାଜନୈତିକ ଜୀବନ ବିପଦ ଭିତରକୁ ଚାଲିଯିବ। ଯେଉଁ ୫ରୁ ୬ ଜଣ ନେତା ଦଳର ସବୁ ବିଷୟରେ ମୁଣ୍ଡ ପୂରାଉଛନ୍ତି ସେଥିରେ ପରିବର୍ତ୍ତନ କରାଯାଉ। ଦଳର ସଭାପତି ଭାବେ ନବୀନ ପଟ୍ଟନାୟକ ଅନ୍ୟ ନେତାଙ୍କୁ ଦାୟିତ୍ୱ ଦେବା ଦରକାର। ଯେଉଁ ନେତାମାନେ ସବୁଥିରେ ମୁଣ୍ଡ ପୂରାଉଛନ୍ତି ସେମାନଙ୍କ କେବଳ ଇଚ୍ଛା ପାଣ୍ଡିଆନଙ୍କୁ କିପରି ଦଳରେ ପୁଣି ମୁଖ୍ୟସ୍ରୋତକୁ ଫେରାଇ ଅଣାଯାଇପାରିବ। ରାଜ୍ୟବାସୀ ଯେତେବେଳେ ସେହି ଜଣେ ବ୍ୟକ୍ତି ପାଇଁ ବିଜେଡିକୁ ପ୍ରତ୍ୟାଖ୍ୟାନ କରିଦେଲେ ପୁଣିଥରେ ତାଙ୍କୁ ଆଣିବା ପାଇଁ ଯେଉଁ ଉଦ୍ୟମ ଚାଲିଛି, ସେଥିରେ ପୂର୍ଣ୍ଣଚ୍ଛେଦ ପଡ଼ିବା ଦରକାର। ଯେଉଁମାନେ ଭୋଜିରେ ଥିଲେ ସେମାନେ ସମସ୍ତେ ନିଜ ନିର୍ବାଚନମଣ୍ଡଳୀରେ ସଙ୍ଗଠନ ପାଇଁ କାମ କରୁଛନ୍ତି। ଲୋକେ ଯାହା ପ୍ରତ୍ୟାଖ୍ୟାନ କରୁଛନ୍ତି ସେ ଦିଗରେ ଦଳ ଚାଲିଲେ କ୍ଷତି ହେବ, ତା’ ଉପରେ ମୁଖ୍ୟତଃ ଆଲୋଚନା ଥିଲା ବୋଲି ସେମାନେ କହିଛନ୍ତି।
ପୂର୍ବତନ ବିଧାୟକ ରାଜେନ୍ଦ୍ର ସାହୁ କହିଛନ୍ତି, ଭୋଜି କରିବାକୁ ଆସିଥିଲୁ, ଏହା ପଛରେ କିଛି ଆଉ ନାହିଁ। ରାଜନୀତିଆ ଲୋକ ବୋଲି କ’ଣ ଭୋଜି କରିପାରିବେ ନାହିଁ। କୌଣସି କଥାକୁ ଅନର୍ଥ କରିବାର ଆବଶ୍ୟକତା ନାହିଁ। ଯେଉଁମାନେ ଭୋଜି କରିବାକୁ ଆସିଛନ୍ତି ସମସ୍ତେ ହାରିକି ଅଛନ୍ତି, କେହି ସେମାନଙ୍କର କିଛି କରିପାରିବେ ନାହିଁ। ସୂଚନାଯୋଗ୍ୟ, ଦଳର ନେତାମାନେ ବାହାରେ ଭୋଜିଭାତ ନ କରିବା ଲାଗି ନବୀନ ନିର୍ଦ୍ଦେଶ ଦେବା ସତ୍ତ୍ୱେ ଏଭଳି ଆୟୋଜନ କାହିଁକି ବୋଲି ଚର୍ଚ୍ଚା ହେଉଛି। ନବୀନଙ୍କ ଦଳୀୟ ନିଷ୍ପତ୍ତି ବିରୋଧରେ ଏହି ମେଳି ବୋଲି କୁହାଯାଉଛି।
Dharitri – Odisha’s No.1 Odia Daily
