ରସୁଲପୁର,୧୧ା୧୦(ଡି.ଏନ୍.ଏ.): ଯାଜପୁର ଜିଲା ରସୁଲପୁର ବ୍ଲକ ଅନ୍ତର୍ଗତ ବନ୍ଧଡିହ ପଞ୍ଚାୟତ ସାହାପଡ଼ା ଗ୍ରାମର ଯୁକ୍ତ ୨ରେ ପଢ଼ୁଥିବା ଜନୈକା ଛାତ୍ରୀ(୧୭)ଙ୍କୁ ଗତ ମାସ ୨୩ତାରିଖରେ ଅପହରଣ ହୋଇଥିଲା। ଅପହରଣର ୧୭ଦିନ ପରେ ବ୍ରହ୍ମବରଦା ଫାଣ୍ଡି ପୋଲିସ ଅପହୃତା ଓ ଅପହରଣକାରୀଙ୍କୁ ତେଲେଙ୍ଗାନାରୁ ଉଦ୍ଧାର କରି ଧର୍ମଶାଳା ଥାନାରେ ଅଟକ ରଖି ପଚରା ଉଚୁରା ଜାରି ରଖିଛି। ଶୁକ୍ରବାର ଉଭୟଙ୍କ ଡାକ୍ତରୀ ମାଇନା କରିବା ସହ ସିଆରପିସି ଦଫା ୧୬୪ ବଳରେ ମାଜିଷ୍ଟ୍ରେଟଙ୍କ ନିକଟରେ ଅପହୃତା ନାବାଳିକାଙ୍କ ବୟାନ ରେକର୍ଡ କରାଯିବ। ଏଥିସହିତ ଅଭିଯୁକ୍ତ ଯୁବକଙ୍କୁ କୋର୍ଟ ଚାଲାଣ କରାଯିବ ବୋଲି ଫାଣ୍ଡି ଅଧିକାରୀ ପରମାନନ୍ଦ ସେଠୀ ସୂଚନା ଦେଇଛନ୍ତି।
ଘଟଣାରୁ ପ୍ରକାଶ ଧର୍ମଶାଳା ବ୍ଲକ ଅରାବଳ ପଞ୍ଚାୟତ ବଡନହଁଗା ଗ୍ରାମର ମାନସ ମଲିକ(୨୪) ନାମକ ଜଣେ ଯୁବକ ଉକ୍ତ ନାବାଳିକାଙ୍କୁ ବିବାହ ପ୍ରତିଶ୍ରୁତି ଦେଇ ଅପହରଣ କରିନେଇଥିଲେ। ଏପରି କି ନାବାଳିକାଙ୍କୁ ତେଲେଙ୍ଗାନାର କେଦାପାଲ୍ଲୀ ଜିଲାରେ ନେଇ ରଖିଥିଲେ। ଏସମ୍ପର୍କରେ ନାବାଳିକାଙ୍କ ପରିବାର ପକ୍ଷରୁ ୨୬ତାରିଖରେ ଫାଣ୍ଡିରେ ଅଭିଯୋଗ ହୋଇଥିଲା। ଅଭିଯୋଗକୁ ଅଧାର କରି ପୋଲିସ ଏକ ଅପହରଣ ମାମଲା(ନଂ. ୪୨୫/୧୯) ରୁଜୁ କରି ବିଭିନ୍ନ ସ୍ଥାନରେ ଖୋଜାଖୋଜି କରୁଥିଲା। ପରେ ଅଭିଯୁକ୍ତ ମାନସ ବ୍ୟବହାର କରୁଥିବା ମୋବାଇଲକୁ ଟ୍ରାକିଂ କରି ସେ ତେଲେଙ୍ଗାନାରେ ରହୁଥିବା ଜାଣିବାକୁ ମିଳିଥିଲା। ଉକ୍ତସୂଚନା ଆଧାରରେ ପୋଲିସ ଗତ ମଙ୍ଗଳବାର କେଦାପଲ୍ଲୀ ଯାଇ ମାନସ ଏକ ହୋଟଲରେ ରୋଷୟା ଭାବରେ କାର୍ଯ୍ୟ କରୁଥିବା ଜଣାପଡ଼ିଥିଲା। ପୋଲିସ ଉକ୍ତ ହୋଟେଲରେ ପହଞ୍ଚତ୍ ମାନସଙ୍କୁ ଧରିବା ପରେ ସେ ପୋଲିସ ନିକଟରେ ସବୁ କଥା ସ୍ବୀକାର କରିଥିଲେ। ପରେ ଉଭୟ ମାନସ ଏବଂ ନାବାଳିକାଙ୍କୁ ଓଡ଼ିଶା ଆଣିଥିଲା।
