ବସ୍ତା,୧୯ା୮(ସ୍ବ.ପ୍ର.): ଲଗାଣ ବର୍ଷା ଯୋଗୁ ବାଲେଶ୍ୱର ଜିଲାର ବିଭିନ୍ନ ନଦୀରେ ଏବର୍ଷର ପ୍ରଥମ ବନ୍ୟାଜଳ ଆସିଛି। ସୁବର୍ଣ୍ଣରେଖା, ବୁଢାବଳଙ୍ଗ, ଗଙ୍ଗାହାର ନଦୀରେ ଜଳପତ୍ତନ ବୃଦ୍ଧି ପାଇଥିବା ବେଳେ ଜଳକା ନଦୀରେ ବନ୍ୟାଜଳ ରବିବାର ବିପଦ ସଂକେତ ଅତିକ୍ରମ କରିଛି। ବସ୍ତା ବ୍ଲକ ଦେଇ ପ୍ରବାହିତ ଜଳକା ନଦୀର ମଥାନୀଠାରେ ବିପଦ ସଂକେତ ୫.୫୦ ମିଟର। ମଧ୍ୟାହ୍ନରୁ ବନ୍ୟାଜଳ ବିପଦସଂକେତ ଟପି ପ୍ରବାହିତ ହେବାରେ ଲାଗିଛି। ସନ୍ଧ୍ୟା ୬ଟା ସୁଦ୍ଧା ଜଳସ୍ତର ୬.୧୭ମିଟର ଛୁଇଁଛି। ନଦୀରେ ଘଣ୍ଟାପ୍ରତି ଜଳସ୍ତର ୦.୦୮ମିଟର ବୃଦ୍ଧିପାଉଥିବାରୁ ତଳିଆ ଅଞ୍ଚଳରେ ବନ୍ୟା ଆଶଙ୍କା ଦେଖାଦେଇଛି।
ପ୍ରଶାସନ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଜଳକା ନଦୀର ଉପର ମୁଣ୍ଡ ମୟୂରଭଞ୍ଜ ଜିଲାରେ ଅତ୍ୟଧିକ ବର୍ଷା ହେବା ଯୋଗୁ ନଦୀର ଜଳସ୍ତର କ୍ରମେ ବୃଦ୍ଧି ପାଇ ଚାଲିଛି। ରବିବାର ବର୍ଷା ପରିମାଣ ହ୍ରାସ ପାଇବାରୁ ସେଭଳି ବଡ ଧରଣର ବନ୍ୟା ଆଶଙ୍କା ନ ଥିବା କୁହାଯାଉଛି। ଏବେ ନଦୀରେ ଆସିଥିବା ବନ୍ୟାଜଳ ଚାଷ ପାଇଁ ଉପଯୋଗୀ ହେବ ବୋଲି ଅନେକ ଚାଷୀ ମତବ୍ୟକ୍ତ କରିଛନ୍ତି। ପୂର୍ବରୁ ବନ୍ଦ ଥିବା ମଥାନୀସ୍ଥିତ ଜଳକା ପ୍ରୋଜେକ୍ଟର ସମସ୍ତ ଗେଟ ରବିବାର ଖୋଲି ଦିଆଯାଇଛି ା ଖବର ଲେଖା ହେବା ବେଳକୁ ନଦୀର ଜଳ ସ୍ତର କମିବା ଆରମ୍ଭ କରିଥିବା ବିଭାଗ ପକ୍ଷରୁ କୁହାଯାଇଛି। ନଦୀ ବିପଦସଙ୍କେତ ଉପରେ ପ୍ରବାହିତ ହେବା ଯୋଗୁ କେତେକ ନଦୀକୂଳିଆ ଗ୍ରାମର ଚାଷ ଜମିରେ ପାଣି ମାଡିଥିବା ଜଣାପଡିଛି ା
