ଭାପୁର,୫ା୯ (ଡି.ଏନ.ଏ.)-ସେବା ହିଁ ପରମ ଧର୍ମ। ଏହି ଉକ୍ତିକୁ ପାଥେୟକରି ବିନା ପାରିଶ୍ରମିକରେ ଲୋକଙ୍କୁ ଚିକିତ୍ସା ସେବା ଯୋଗାଇ ଦେଉଛନ୍ତି ସେ। ଡାକ୍ତରୀ ପାଠ ପଢ଼ି ନ ଥିଲେ ମଧ୍ୟ ଚେରମୂଳି ଔଷଧ ସାହାଯ୍ୟରେ ଦେଶୀ ଚିକିତ୍ସା କରି ଲୋକଙ୍କ ଅର୍ଶ, ମଳକଣ୍ଟକ, ଦାନ୍ତରୋଗ ଆଦି ଭଲ କରୁଛନ୍ତି। ମା’ ମଙ୍ଗଳାଙ୍କ ଆଶୀର୍ବାଦରୁ ସେ ଗ୍ରାମ ବୈଦ୍ୟର ପରିଚୟ ପାଇଥିବାବେଳେ ଲୋକଙ୍କ ପ୍ରିୟଭାଜନ ହୋଇପାରିଛନ୍ତି। ସେ ହେଲେ ନୟାଗଡ଼ ଜିଲା ଭାପୁର ବ୍ଲକ ବାଇଗୁଣିଆ ଗ୍ରାମପଞ୍ଚାୟତ ବୋରଗାଁର ଗୋପାଳ ବାରିକ (୫୭)। ଯୁବା ବୟସରୁ ନିଜର କୌଳିକ ବୃତ୍ତିକୁ ଆଦରି ପରିବାର ପ୍ରତିପୋଷଣ କରୁଥିବା ବେଳେ ମା’ ମଙ୍ଗଳାଙ୍କ ସେ ଜଣେ ପରମ ଭକ୍ତ ଥିବାରୁ ପ୍ରତ୍ୟହ ମା’ଙ୍କ ପୂଜାନୀତି କରିଆସୁଛନ୍ତି। ମା’ଙ୍କ ଆଶୀର୍ବାଦ ପାଇ ସେ ନିଜର କୌଳିକ ବୃତ୍ତି ଛାଡ଼ି ଗ୍ରାମ୍ୟ ବୈଦ୍ୟ ପାଲଟି ଯାଇଛନ୍ତି। ସ୍ତ୍ରୀ, ୩ ପୁଅ ଓ ଗୋଟିଏ ଝିଅକୁ ନେଇ ତାଙ୍କ ସଂସାର ଦୁଃଖକଷ୍ଟେ ଚଳିଆସୁଥିବାବେଳେ ଏବେ ପିଲାମାନଙ୍କ ଉପରେ ସଂସାର ଦାୟିତ୍ୱ ଲଦି ନିଜେ ସେଥିରୁ ମୁକୁଳି ଯାଇଛନ୍ତି। ସମ୍ପୂର୍ଣ୍ଣ ଶାକାହାରୀ ଖାଦ୍ୟ ଗ୍ରହଣ କରି ମା’ ମଙ୍ଗଳାଙ୍କ ଆଶୀର୍ବାଦ ନେଇ ରୋଗୀ ସେବାକୁ ବ୍ରତ କରିଛନ୍ତି। ଜଙ୍ଗଲରୁ ସଂଗୃହୀତ ଚେରମୂଳିକୁ ଔଷଧ କରି ଅର୍ଶ, ମଳକଣ୍ଟକ ଆଦି ରୋଗ ଭଲ କରୁଛନ୍ତି। ବିଶେଷକରି ଦାନ୍ତବିନ୍ଧା ରୋଗୀଙ୍କ ପୋକରା ଦାନ୍ତର ଚିକିତ୍ସା କରୁଛନ୍ତି। ସପ୍ତାହର ସମସ୍ତ ଦିନରେ ଅର୍ଶ ଓ ମଳକଣ୍ଟକ ରୋଗୀଙ୍କୁ ଚିକିତ୍ସା କରୁଥିବା ବେଳେ ଶନିବାର କେବଳ ଦାନ୍ତ ସମସ୍ୟାରେ ପୀଡ଼ିତଙ୍କୁ ଚିକିତ୍ସା କରିଥାନ୍ତି। ତେବେ ଆଶ୍ଚର୍ଯ୍ୟ କଥା, ଔଷଧୀୟ ପତ୍ରର ରସକୁ ରୋଗୀଙ୍କ କାନରେ ପକାଇ ଦାନ୍ତରୁ ପୋକସଦୃଶ କିଛି କାଢ଼ିଥାନ୍ତି। ତାଙ୍କ ଚିକିତ୍ସା ଦ୍ୱାରା ରୋଗୀ ଖୁବ୍ ଆଶ୍ୱସ୍ତ ହୋଇଥାଏ। ଏହି ବୃତ୍ତିରେ ସେ ଦୀର୍ଘ ୧୦ବର୍ଷ ହେଲା ବିନା ପାରିଶ୍ରମିକରେ ୧୭ଶହରୁ ଊର୍ଦ୍ଧ୍ୱ ରୋଗୀଙ୍କୁ ଚିକିତ୍ସା କରିଆସିଲେଣି। ସମସ୍ତେ ଆରୋଗ୍ୟ ଲାଭ କରିଥିବା କୁହନ୍ତି। ସମସ୍ତଙ୍କ ମୁହଁରେ ଗୋପାଳଙ୍କ ପ୍ରଶଂସା। ଅର୍ଥସର୍ବସ୍ବ ଯୁଗରେ ବିନା ଅର୍ଥ, ବିନା ସ୍ବାର୍ଥରେ ରୋଗୀସେବା କରି ସେ ଅପାର ଆନନ୍ଦ ପାଇପାରୁଥିବା କୁହନ୍ତି । ରୋଗୀମାନେ ତାଙ୍କର ଆରାଧ୍ୟ ଦେବୀ ମା’ ମଙ୍ଗଳାଙ୍କ ପାଇଁ କିଛି ଭୋଗ ଓ ଧୂପଦୀପ ଦେଇ ଚିକିତ୍ସିତ ହୋଇ ଘରକୁ ଫେରନ୍ତି।
