ତାଳଚେର, ୧୫ା୫(ନି.ପ୍ର.)- ତତଲା ତାଓ୍ବାରେ ତାଳଚେର। ଡହ ଡହ ଖରାରେ ଡହଳବିକଳ ହେଉଛନ୍ତି ଲୋକେ। ପ୍ରତ୍ୟେକ ଦିନ ତାପମାତ୍ରା ୪୦ ଡିଗ୍ରୀ ଉପରେ ରହୁଥିବାରୁ ପ୍ରବଳ ଗ୍ରୀଷ୍ମ ପ୍ରବାହରେ ଜନସାଧାରଣ ସନ୍ତୁଳି ହେଉଛନ୍ତି। ହେଲେ ଏ ସବୁ ପ୍ରତି ଏନ୍ଜେନ୍ର ନିଘା ନାହିଁ। ପ୍ରଚଣ୍ଡ ତାତିରେ ଏନ୍ଜେନ୍ର ମନମୁଖୀ କାମ ଲୋକଙ୍କୁ ସମସ୍ୟା ମୁହଁକୁ ଠେଲି ଦେଇଛି। ମୃତ କର୍ମଚାରୀଙ୍କ ପରିବାରକୁ କ୍ଷତିପୂରଣ ମିଳୁ ନ ଥିବାରୁ ଏନ୍ଜେନ କର୍ମଚାରୀ କାର୍ଯ୍ୟବନ୍ଦ ଆନ୍ଦୋଳନରେ ବସିଛନ୍ତି। ଫଳରେ ତାଳଚେର ଅଞ୍ଚଳବାସୀ ଦୀର୍ଘ ୨୩ ଦିନ ହେଲାଣି ଠିକ୍ ଭାବେ ବିଦ୍ୟତ୍ ସେବା ପାଇବାରୁ ବଞ୍ଚିତ ହୋଇଛନ୍ତି। ସହରରେ ଦିନକୁ ୧୦ରୁ ଊର୍ଦ୍ଧ୍ୱ ଘଣ୍ଟା ବିଦ୍ୟୁତ୍ କାଟ ହେଉଥିବାବେଳେ ଗ୍ରାମାଞ୍ଚଳରେ ୧୫ରୁ ୨୦ ଘଣ୍ଟା ବିଜୁଳି ରହୁନି। ଫଳରେ ଅଞ୍ଚଳବାସୀଙ୍କ ଜୀବନ ଦୁର୍ବିସହ ହୋଇପଡିଛି। ଆଉ ଏ ସବୁକୁ ଦେଖି ଜାଣି ବି ପ୍ରଶାସନ, ଏନ୍ଜେନ୍ କର୍ତ୍ତୃପକ୍ଷ ଚୁପ୍ ହୋଇ ବସି ରହିଛନ୍ତି।
ତାଳଚେର ବିଦ୍ୟୁତ୍ ସବଡିଭିଜନ ଅଧୀନରେ ତାଳଚେର, ବଲଣ୍ଡା, ସମଲ, କଣିହାଁ, ହାଟତୋଟା ଅଞ୍ଚଳ ରହିଛି। ପ୍ରାୟ ୩୫ ହଜାର ଉପଭୋକ୍ତା ଏହି ସବ୍ଡିଭିଜନ ଉପରେ ନିର୍ଭରଶୀଳ। ଅଞ୍ଚଳରୁ ମାସକୁ ରାଜସ୍ବ ଆଦାୟ ପ୍ରାୟ ୩ କୋଟି ଟଙ୍କା। ୨୦୧୨ରୁ ବିଦ୍ୟୁତ୍ ବଣ୍ଟନ ସହଭାଗିତାରେ ଏନ୍ଜେନ କମ୍ପାନୀ ତାଳଚେରରେ କାମ କରୁଛି। ହେଲେ ଲୋକଙ୍କୁ ଉନ୍ନତମାନର ସେବା ଯୋଗାଇବାେରେ ଏନ୍ଜେନ୍ ବିଫଳ ବୋଲି ଅଭିଯୋଗ ହୋଇଆସୁଛି। ଚୋରି ଓ କ୍ଷତି କମିବା ପରିବର୍ତ୍ତେ ବଢି ଚାଲୁଛି। ଗତ ଏପ୍ରିଲ ୨୨ରେ ହାଟତୋଟା ରାସ୍ତାରେ ବିଦ୍ୟୁତ୍ ଖୁଣ୍ଟରେ ଚଢି ମରାମତି କାମ କରୁଥିବା ବେଳେ ରାସୋଳର ଅଭିଜିତ ସାହୁ ନାମକ ଜଣେ ଠିକା ଶ୍ରମିକଙ୍କ ମୃତ୍ୟୁ ଘଟିଥିଲା। ମୃତ କର୍ମଚାରୀଙ୍କ ପରିବାରକୁ ୩୦ ଲକ୍ଷ ଟଙ୍କା କ୍ଷତିପୂରଣ ଓ ଜଣଙ୍କୁ ନିଯୁକ୍ତି ପାଇଁ କର୍ମଚାରୀମାନେ ଦାବି କରିଥିଲେ। ହେଲେ କ୍ଷତିପୂରଣ ନ ମିଳିବାରୁ ସେହିଦିନଠାରୁ ଚାଇଁପାଳ ଡିଭିଜନରେ କାର୍ଯ୍ୟରତ ସମସ୍ତ ଏନଜେନ୍ କର୍ମଚାରୀ କାର୍ଯ୍ୟବନ୍ଦ ଆନ୍ଦୋଳନ ଚଳାଇଛନ୍ତି। ଫଳରେ ଏଠାରେ ବିଦ୍ୟୁତ୍ ସମସ୍ୟା ଗମ୍ଭୀର ହୋଇପଡିଛି। ସହର ଓ ଗ୍ରାମାଞ୍ଚଳରେ ୧୦ ଘଣ୍ଟାରୁ ଅଧିକ ସମୟ ଧରି ବିଦ୍ୟୁତ୍ ସେବା ବନ୍ଦ ରହୁଛି। ପ୍ରବଳ ଖରା ଓ ଗରମ ଯୋଗୁ ଲୋକେ ଘରେ କି ବାହାରେ ରହିପାରୁନାହାନ୍ତି। ବହୁ ଜରୁରୀ କାମ ହୋଇପାରୁନାହିଁ। କୌଣସି କାରଣରୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ ହୋଇଗଲେ ଏହାର ମରାମତି କରାଯାଉନାହିଁ। ସେସୁର କେତେଜଣ କର୍ମଚାରୀ କାମଚଳା ଭାବେ କାମ କରୁଥବାବେଳେ ଆବଶ୍ୟକ ସ୍ଥଳେ ସେମାନେ ଖୁଣ୍ଟରେ ଚଢି ବିଦ୍ୟୁତ ମରାମତି କରିବେ ନାହିଁ ବୋଲି ମନା କରି ଦେବାରୁ ସମସ୍ୟା ଆହୁରି ବଢିଛି। ଏନଜେନ କମ୍ପାନୀ କେବଳ ଜୁଲମ କରି ବିଦ୍ୟୁତ ବିଲ୍ ଆଦାୟକୁ ପ୍ରାଧାନ୍ୟ ଦେଉଥିବାବେଳେ ଲୋକେ ପ୍ରକୃତ ସେବା ପାଇପାରୁ ନ ଥିବା ଅଭିଯୋଗ ହୋଇଛି। ଏହାକୁ ନେଇ ଅସନ୍ତୋଷ ତୀବ୍ର ହେବାରେ ଲାଗିଛି।
ଏ ସମ୍ପର୍କରେ ଏନ୍ଜେନ୍ ଏସଡିଓ ଏସ. ପାଲଙ୍କୁ ପଚାରିବାରେ ସେ ତାଙ୍କ ଅସହାୟତା ପ୍ରକାଶ କରି କହିଲେ, ମୁଁ ଜଣେ ଛୋଟିଆ କର୍ମଚାରୀ। କିଛି କହି ପାରିବି ନାହିଁ। ଏ ବାବଦରେ ଏଚ.ଆର ବିଭାଗକୁ ପଚାରନ୍ତୁ।
