ବିଦ୍ୟୁତ୍ ଚୋରି: କ୍ଷତି ରୋକିବ ସ୍ମାର୍ଟ ମିଟର; ପ୍ରଥମ ପର୍ଯ୍ୟାୟରେ ୨୫ ଲକ୍ଷ ଉପଭୋକ୍ତା ହେବେ ସ୍ମାର୍ଟ ମିଟର ପରିସରଭୁକ୍ତ
43 ଭୁବନେଶ୍ୱର, ୧୯।୮ (ବ୍ୟୁରୋ): ଘରେ ଲାଗିଥିବା ପୁରୁଣା ବିଦ୍ୟୁତ୍ ମିଟର ବଦଳିଯିବ। ଲାଗିବ ନୂଆ ପ୍ରିପେଡ୍ ଓ ସ୍ମାର୍ଟ ମିଟର। ରାଜ୍ୟର ସମସ୍ତ ଘରୋଇ ଉପଭୋକ୍ତାଙ୍କୁ ଏହି ମିଟର ଯୋଗାଇ ଦିଆଯିବ। ଏହାଦ୍ୱାରା ବିଦ୍ୟୁତ୍ ଚୋରି ଏବଂ ବୈଷୟିକ ଓ ବାଣିଜ୍ୟକ କ୍ଷତି (ଏ ଆଣ୍ଡ୍ ଟିସି)କୁ ରୋକିବା ପାଇଁ ଶକ୍ତି ବିଭାଗ ଏଭଳି ପଦକ୍ଷେପ ନେବାକୁ ଯାଉଛି। ଶକ୍ତିମନ୍ତ୍ରୀ ଦିବ୍ୟ ଶଙ୍କର ମିଶ୍ର ଏ ନେଇ ସୂଚନା ଦେଇଛନ୍ତି।
ପ୍ରିପେଡ୍ ସ୍ମାର୍ଟ ମିଟର ଲାଗିଲେ ବିଦ୍ୟୁତ୍ ସରବରାହ କ୍ଷେତ୍ରରେ ହେଉଥିବା ବିଣିଜି୍ୟକ ଓ ବୈଷୟିକ କ୍ଷତିକୁ ରୋକିବା ସହିତ ବିଦ୍ୟୁତ୍ ଟାମ୍ପରିଂ ଓ ଚୋରି ଉପରେ ମଧ୍ୟ ଅଙ୍କୁଶ ଲଗାଯାଇ ପାରିବ। ପ୍ରିପେଡ୍ ମିଟର ଲାଗିଲେ ଗ୍ରାହକଙ୍କୁ ଆଗୁଆ ବିଦ୍ୟୁତ୍ ଦେୟ ଦେବାକୁ ହେବ। ଟେଲିଫୋନ୍ ଭଳି ପଇସା ସରିଗଲେ ପୁଣି ରିଚାର୍ଜ କରିବାକୁ ପଡ଼ିବ। ନଚେତ୍ ଅନ୍ଧାରରେ ରହିବାକୁ ହେବ। ରାଜ୍ୟରେ ଏ ଆଣ୍ଡ୍ ଟିସି କ୍ଷତି ୫୬ ପ୍ରତିଶତ ରହିଛି। ଏହାକୁ ପ୍ରତ୍ୟେକ ବର୍ଷ ୧୦ ପ୍ରତିଶତ କମାଇବାକୁ ବିଦ୍ୟୁତ୍ ବିଭାଗ ପ୍ରୟାସ ଆରମ୍ଭ କରିଛି। ପ୍ରଥମ ପର୍ଯ୍ୟାୟରେ ରାଜ୍ୟରେ ୨୫ ଲକ୍ଷ ବିଦ୍ୟୁତ୍ ଉପଭୋକ୍ତାଙ୍କୁ ପ୍ରି ପେଡ୍ ସ୍ମାର୍ଟ ମିଟର ଯୋଗାଇ ଦିଆଯିବ। ବିଦ୍ୟୁତ୍ ଯୋଗାଉଥିବା ୪ଟି ବଣ୍ଟନ କମ୍ପାନୀ ସେସୁ, ନେସ୍କୋ, ସାଉଥ୍କୋ ଏବଂ ଓ୍ବେସ୍କୋକୁ ପ୍ରତ୍ୟେକ ୧ ଲକ୍ଷ ମିଟର ଯୋଗାଇ ଦେବାକୁ ନିଷ୍ପତ୍ତି ହୋଇଛି। ସରକାର ଗୋଟିଏ ପଟେ ବିଦ୍ୟୁତ୍ କ୍ଷତି କମାଇବାକୁ ଯୋଜନା କରୁଥିବା ବେଳେ ଅନ୍ୟପଟେ ମିଟର ବାବଦ ଖର୍ଚ୍ଚକୁ ବିଦ୍ୟୁତ୍ ଗ୍ରାହକଙ୍କ ମୁଣ୍ଡରେ ଲଦିବାକୁ ନିଷ୍ପତ୍ତି ନିଆଯାଇଛି। ମିଟର ପିଛା ଗ୍ରାହକଙ୍କୁ ୩ ହଜାର ୫ ଶହ ଟଙ୍କା ପୈଠ କରିବାକୁ ପଡ଼ିବ। ଏକକାଳୀନ ନ ହେଲେ ମଧ୍ୟ ବିଦ୍ୟୁତ୍ ବିଲ୍ ସହ ଏହାକୁ ଆଦାୟ କରାଯିବ। ମିଟର କିଣିବା ପାଇଁ ଖୁବ୍ଶୀଘ୍ର ଟେଣ୍ଡର ଆହ୍ବାନ କରାଯିବ ବୋଲି ଶକ୍ତି ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି। ତେବେ ଏଠାରେ ପ୍ରଶ୍ନ ଉଠୁଛି ଯେ, ଯଦି ପୂର୍ବ ମିଟର ଠିକ୍ କାର୍ଯ୍ୟ କରୁଛି ଉପଭୋକ୍ତା ନୂଆ ମିଟର ବ୍ୟୟଭାର କାହିଁକି ଭରଣା କରିବେ। ସରକାରଙ୍କ ଏଭଳି ନିଷ୍ପତ୍ତିକୁ ନେଇ ଘରୋଇ ଉପଭୋକ୍ତାଙ୍କ ମହଲରେ ଅସନ୍ତୋଷ ଦେଖାଦେଇଛି।
ସମ୍ବଲପୁର, ରାଉରକେଲାରେ ପ୍ରଥମେ ପାଇଲଟ ପ୍ରକଳ୍ପ ଭାବେ ଏହା ଆରମ୍ଭ କରାଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି।