ଓଡ଼ାପଡ଼ା, ୧୯ା୬(ଡି.ଏନ.ଏ.)
ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ବିଡୋ ପଞ୍ଚାୟତରେ ବଡ଼ଧରଣର ଦୁର୍ନୀତି ହୋଇଛି। ଏଥିରେ ସମ୍ପୃକ୍ତ ଅଭିଯୋଗରେ ସରପଞ୍ଚ ଭଗବାନ ସାହୁଙ୍କୁ ଗୁରୁବାର ଗିରଫ କରାଯାଇଛି। ଏଥିପୂର୍ବରୁ ପଞ୍ଚାୟତ ନିର୍ବାହୀ ଅଧିକାରୀ (ପିଇଓ) ସୁକାନ୍ତ ନାୟକଙ୍କୁ କାର୍ଯ୍ୟରୁ ନିଲମ୍ବନ କରାଯାଇଥିବା ବେଳେ ସେ ଫେରାର ଅଛନ୍ତି। ବିଡିଓ ଦାଶରଥି ଜେନାଙ୍କ ଅଭିଯୋଗକୁ ଭିତ୍ତିକରି ମୋଟଙ୍ଗା ଥାନାରେ ନଂ. ୧୩୩/୨୦, ଦଫା ୪୦୯ ଓ ୩୪ରେ ମାମଲା ରୁଜୁ କରାଯାଇଛି। ବିଭାଗ ପକ୍ଷରୁ ଘଟଣାର ଖୋଳତାଡ଼ ଆରମ୍ଭ ହୋଇଥିବାବେଳେ ଏହାର ସ୍ବତନ୍ତ୍ର ଅଡିଟ୍ କରିବାକୁ ଜିଲା ପ୍ରଶାସନ ପକ୍ଷରୁ ନିବେଦନ କରାଯାଇଛି।
ଅଭିଯୋଗ ଅନୁଯାୟୀ, ବିଡୋ ପଞ୍ଚାୟତକୁ ବିଭିନ୍ନ ଉନ୍ନୟନମୂଳକ କାର୍ଯ୍ୟପାଇଁ ଆସିଥିବା ୩୨ଲକ୍ଷ ୨୭ହଜାର ୧୮ଟଙ୍କାକୁ ସରକାରୀ ନିୟମ ଉଲ୍ଲଂଘନ କରି ସରପଞ୍ଚ ଏବଂ ପିଇଓ ହଡ଼ପ କରିଛନ୍ତି। କେନ୍ଦ୍ର ଅର୍ଥ କମିଶନ ଓ ରାଜ୍ୟ ଅର୍ଥ କମିଶନଙ୍କ ବିଭିନ୍ନ ଯୋଜନା ବାବଦକୁ ଏହି ଅର୍ଥ ଦିଆଯାଇଥିଲା। ବର୍ଷକ ମଧ୍ୟରେ ଅଧିକାଂଶ ପଞ୍ଚାୟତ ୫୦ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରି ସାରିଥିବା ବେଳେ ବିଡୋ ପଞ୍ଚାୟତରେ ୧ଲକ୍ଷ ଟଙ୍କାରୁ କମ୍ ଅର୍ଥ ଖର୍ଚ୍ଚ ହୋଇଥିବା ଜଣାପଡିଥିଲା। ଏହାକୁ ନେଇ ସନ୍ଦେହ ହେବାରୁ ବିଭାଗ ପକ୍ଷରୁ ଖୋଳତାଡ଼ କରାଯାଇଥିଲା। କୌଣସି କାମ କରା ନ ଯାଇ ୩୨ଲକ୍ଷ ୨୭ ହଜାର ୧୮ଟଙ୍କା ହଡ଼ପ କରାଯାଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। କେବଳ ଭତ୍ତା ବାବଦ ୪ଲକ୍ଷ ୬୪ ହଜାର ଟଙ୍କା ଚଳୁ କରାଯାଇଛି। ବର୍ଷେ ହେଲା କ୍ୟାଶବୁକ୍ ଅପ୍ଡେଟ୍ କରାଯାଇନାହିଁ। ରେକର୍ଡପତ୍ର ଠିକ୍ ନ ଥିବା ଖୋଳତାଡ଼ ବେଳେ ଜଣାପଡ଼ିଛି।
ଏ ନେଇ ପିଡି ଡିଆର୍ଡିଏ ନରୋତ୍ତମ ବେହେରା କୁହନ୍ତି, ବିଡୋ ପଞ୍ଚାୟତରେ ସରକାରୀ ଅର୍ଥ ଅନିୟମିତତା ହୋଇଛି। ଜିଲାପାଳଙ୍କ ନିର୍ଦ୍ଦେଶକ୍ରମେ ପିଇଓଙ୍କୁ ନିଲମ୍ବନ କରାଯାଇଛି। ଜିଲାପାଳ ଭୂମେଶ ଚନ୍ଦ୍ର ବେହେରା କୁହନ୍ତି, ଆର୍ଥତ୍କ ଅନିୟମିତତା ଘଟଣାରେ ସରପଞ୍ଚଙ୍କୁ ଗିରଫ କରାଯାଇଛି। ସରପଞ୍ଚଙ୍କୁ ନିଲମ୍ବନ ଏବଂ ପଞ୍ଚାୟତର ସ୍ବତନ୍ତ୍ର ଅଡିଟ୍ କରିବା ପାଇଁ ସରକାରଙ୍କୁ ଅବଗତ କରାଯାଇଛି।
