ବଅଁରପାଳ,୨୦ା୬(ଡି.ଏନ.ଏ.) – କରୋନା କଟକଣା ପୂର୍ବରୁ ଠିକ୍ଠାକ୍ ଚାଲିଥିଲା ବ୍ୟବସାୟ। ଟ୍ରକ୍ଗୁଡ଼ିକୁ ନିୟମିତ ଲୋଡ୍ ମିଳୁଥିବା ବେଳେ ମାସିକ ରୋଜଗାର ମଧ୍ୟ ମନ୍ଦ ନ ଥିଲା। ଋଣ କିସ୍ତି ସହ ଚାଳକ, ହେଲପରଙ୍କୁ ଦରମା ଦେବାରେ ଅସୁବିଧା ହେଉ ନ ଥିଲା। ହେଲେ ଲକ୍ଡାଉନ୍ ପରଠାରୁ ମାନ୍ଦା ପଡ଼ିଯାଇଛି ଅନୁଗୋଳ ଜିଲା ନାଲ୍କୋ କୁଲାଡ଼ ଟ୍ରକ୍ ମାଲିକ ସଂଘର ବ୍ୟବସାୟ। ବିଭିନ୍ନ ରାଜ୍ୟରେ ଥିବା ଶିଳ୍ପାନୁଷ୍ଠାନ ବନ୍ଦ ରହିବା ଓ ଆଲୁମିନିୟମର ଚାହିଦା ହ୍ରାସ ଯୋଗୁ ସଂଘର ଟ୍ରକ୍ଗୁଡ଼ିକୁ ଆଉ ପୂର୍ବପରି ଲୋଡ୍ ମିଳୁନାହିଁ। ଫଳରେ ମାସ ମାସ ଧରି ଗାଡ଼ି ଠିଆ ହୋଇ ରହୁଥିବାରୁ ଏବେ ଋଣ କିସ୍ତି ଶୁଝିବା ଏବଂ କର୍ମଚାରୀଙ୍କୁ ଦରମା ଦେବା ମାଲିକମାନଙ୍କ ପକ୍ଷେ ସମ୍ଭବ ହେଉନାହିଁ। ଏହାକୁ ନେଇ ଚିନ୍ତାରେ ପଡ଼ିଛନ୍ତି ସଂଘର ୫ଶହ ସଦସ୍ୟ।
ସଂଘର କେତେଜଣ ସଦସ୍ୟଙ୍କ କହିବା ଅନୁଯାୟୀ, ନାଲ୍କୋର ବହୁ କ୍ଷତିଗ୍ରସ୍ତ ଟ୍ରକ୍ ଖଣ୍ଡିଏ ଲେଖାଏ କିଣି ଦେଶର ବିଭିନ୍ନ ସ୍ଥାନକୁ ଆଲୁମିନିୟମ ପରିବହନ କରିଥାନ୍ତି। ନାଲ୍କୋରୁ ଲୋଡ୍ ନେଇ ଏହି ଟ୍ରକ୍ଗୁଡ଼ିକ ମାସରେ ଥରେ କିମ୍ବା ଦୁଇଥର ମହାରାଷ୍ଟ୍ର, ଦିଲ୍ଲୀ, କୋଲକାତା, ରାଜସ୍ଥାନ, ପଞ୍ଜାବ, ହରିୟାଣା ଆଦି ରାଜ୍ୟକୁ ଯାଇଥାଏ। ମାତ୍ର ଦେଶରେ ଲକ୍ଡାଉନ୍ ଲାଗୁ ପରଠାରୁ ଏହି ବ୍ୟବସାୟ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି। ଟ୍ରକ୍ ଚଳାଚଳ ଉପରେ କଟକଣା ନ ଥିଲେ ହେଁ କଞ୍ଚାମାଲ ଭାବେ ଆଲୁମିନିୟମ ଆମଦାନୀ କରୁଥିବା ଶିଳ୍ପଗୁଡ଼ିକ ବନ୍ଦ ରହିବା କିମ୍ବା ଉତ୍ପାଦନ ହ୍ରାସ କରିଥିବାରୁ ଏବେ ନିୟମିତ ଟ୍ରକ୍ଗୁଡ଼ିକୁ ଲୋଡ୍ ମିଳୁନାହିଁ। ଦୁଇରୁ ତିନି ମାସରେ ଥରେ ଟ୍ରକ୍ ଗଡ଼ିବା ଏବେ ବଡ଼କଥା ହୋଇଯାଉଛି। ଏଥିଯୋଗୁ ମାଲିକମାନଙ୍କୁ ବହୁ କ୍ଷତି ସହିବାକୁ ପଡ଼ୁଛି। ଫାଇନାନ୍ସରେ ଗାଡ଼ି କରିଥିବା କେତେଜଣ ମାଲିକ ଠିକ୍ ଭାବେ କିସ୍ତି ପରିଶୋଧ କରିପାରୁ ନାହାନ୍ତି। ଏପରିକି ଚାଳକ ଓ ହେଲପରମାନଙ୍କୁ ହାତରୁ ଦରମା ଦେବାକୁ ପଡ଼ୁଥିବା ମାଲିକମାନେ ପ୍ରକାଶ କରିଛନ୍ତି।
