ନୂଆଦିଲ୍ଲୀ/ନ୍ୟୁୟର୍କ,୧୫।୪: ସାରା ପୃଥିବୀରେ କରୋନା ସଂକ୍ରମଣ ଦେଇ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଛି। ଏପରିସ୍ଥଳେ ସଂକ୍ରମଣକୁ କିପରି ରୋକାଯିବ ସେନେଇ ବହୁ ଉଦ୍ୟମ ଜାରି ରହିଛି। ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ବାରମ୍ବାର ମୁହଁରେ ହାତ ନ ମାରିବାକୁ ଲୋକଙ୍କୁ ପରାମର୍ଶ ଦିଆଯାଇଛି। ଏହା ଦ୍ୱାରା କରୋନା ସଂକ୍ରମଣର ଆଶଙ୍କା ଥିବା କୁହାଯାଇଛି। ତେବେ ଇତିମଧ୍ୟରେ ପୃଥିବୀରେ ଲକ୍ଷେ ୨୫ ହଜାର ଲୋକଙ୍କ ମୃତ୍ୟୁ କରୋନା ସଂକ୍ରମଣ ଯୋଗୁ ଘଟିଛି। ମାତ୍ର ଲୋକେ ଏନେଇ କୌଣସି ସତର୍କତା ଅବଲମ୍ବନ କରୁ ନ ଥିବା ଆମେରିକା ଏବଂ ଅଷ୍ଟ୍ରେଲିଆର ଗବେଷକମାନେ ସେମାନଙ୍କ ଗବେଷଣା ରିପୋର୍ଟରେ ଦର୍ଶାଇଛନ୍ତି। ଆମେରିକାର ଡ.ନୈସି ସି. ଏଲ୍ଡର, ଡ. ଓ୍ବିଲିୟମ୍ ପି. ସୋୟର ଏବଂ ଅଷ୍ଟ୍ରେଲିଆର ଡ. ମ୍ୟାକଲ୍ସ୍ ମିଳିତ ଭାବେ ଏହା ଉପରେ ଅଧ୍ୟୟନ କରିଥିଲେ। ଜଣାପଡ଼ିଥିଲା ପ୍ରତି ଘଣ୍ଟାରେ ଲୋକେ ହାରାହାରି ୨୩ ଥର ମୁହଁରେ ହାତ ମାରିଥାନ୍ତି। ସେଥିମଧ୍ୟରୁ ମଥା,ଗାଲ,ପାଟି ଏବଂ ଓଠକୁ ୪ ଥର ସ୍ପର୍ଶ କରୁଥିବାବେଳେ ଆଖି ଏବଂ ନାକକୁ ୩ ଥର ଲେଖାଏଁ ଛୁଇଁଥାନ୍ତି। ସେହିପରି କାନକୁ ଥରେ ଛୁଇଁଥାନ୍ତି। କେହି କେହି ଗୋଟିଏ ମିନିଟ୍ରେ ୧୨ ଥର ମୁହଁରେ ହାତ ମାରିଥାନ୍ତି। ଖରାଦିନେ ଏଭଳି ଅଭ୍ୟାସ ଅଧିକ ଥର ଘଟିଥାଏ। ସର୍ବସାଧାରଣ ସ୍ଥାନରେ ଏଭଳି କାର୍ଯ୍ୟ କରିବାକୁ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ବାରଣ କରାଯାଇଥିଲେ ମଧ୍ୟ ଲୋକେ ସଚେତନ ହେଉ ନ ଥିବା ଗବେଷଣା ରିପୋର୍ଟରେ ପ୍ରକାଶ ପାଇଛି।
