ବ୍ରଜରାଜନଗର,୨୨।୧୨(ଡି.ଏନ୍.ଏ.)- ଝାରସୁଗୁଡ଼ା ଜିଲା ବ୍ରଜରାଜନଗର ରାଜପୁର ଗାଁର ଜୀବନରାମ ସେଠ୍। କେହେନ୍ସି କାରନ୍ରୁ ତାକର ଆଁଖି ପତାଥି ବାରବାର ଗୁଟେ ଆବୁ ବଢ଼ୁଛେ। ଯେତେ ଚିକିଛା କଲେ ବି କିଛି ଲାଭ ନାଇଁ ହେବାର। ହେଲେ ଏନ୍ତାଥି ସେ କମେଇ କୁଢ଼େଇ କୁଟୁମ ପୁଷ୍ବେ କି ନିଜେ ରୋଗ୍ ବେମାରି ଲାଗି ଉଷୋ ଖାଏବେ। ଇ କଥା ଭାବି ଭାବି ସେ ହରମେଶା ମାନ୍ସିକ ଚାପରେ ରହୁଛନ୍। ଚିକିଛା ସାହାଯ୍ ଲାଗି ସେ ଜିଲାପାଳକୁଁ ବି ଗୁହାରି କରିଛନ୍। ଶୁକୁରବାର ଜିଲା ପରଶାସନ ଆର ଥାନୀଅ ବିଧାୟକ କିଶୋର ମହାନ୍ତିକଁର ସହଯୋଗରେ ସେ ପରିବାର ସଂଗେ ଚିକିଛା ଲାଗି କଟକ ଯାଇଛନ୍।
ସୂଚନା ଅନ୍ସାରେ ରାଜପୁର ଗାଁର ଜୀବନରାମ ଝନେ ନିହାତି ଗରିବ୍ ଲୋକ। ସେ କୁଲିମଜୁରି କରି କୁଟୁମ ପୁଷୁଛନ୍। ୨୦୧୬ ସାଲେ ଜୀବନରାମକଁର ଆଁଖି ପତାଥି ଗୁଟେ ଆବୁ ହେଇଥିଲା। ସେ ବଛର ସେପ୍ଟେମ୍ବର ମାସେ ସେ ସୁନ୍ଦରଗଡ଼ ଡାକ୍ତରଖାନାରେ ଆବୁ ଅପରେଶନ କରେଇଥିଲେ। ଅପରେଶନର ଦିନାକେତେ ଉତାରୁ ଫେନ୍ ସେ ଜାଗାରେ ଆବୁ ବାହାରିଲା। ୨୦୧୭ ସାଲେ ଜାନୁୟାରୀ ମାସେ ଫେନ୍ ଦୁତୀଅ ଥର ବୁର୍ଲା ବଡ଼ ଡାକ୍ତରଖାନାରେ ଅପରେଶନ କରାଲେ। ହେଲେ ମାସ୍କେତେ ଛାଡ଼ି ଫେନ୍ ସେ ଆବୁ ବାହାରଲା। ଶେଷେ ତୁରତୀଅ ଥର ଲାଗି ୨୦୧୯ ସାଲେ ଏପ୍ରିଲ ମାସେ ଫେନ୍ ବୁର୍ଲା ବଡ଼ ଡାକ୍ତରଖାନାରେ ଅପରେଶନ କରାଲେ। ହେଲେ ଅପରେଶନର ୯ ମାସ ଉତାରୁ ଫେନ୍ଘାଏ ସେ ଜାଗାରେ ଆବୁ ବାହାରିଛେ। ଏନ୍ତାଥି ଜୀବନରାମ ଚିକିଛା କରେଇ କରେଇ ବିଛୋ ହେଇଗଲେନ। ଇଆଡ଼େ ଡାକ୍ତରମାନେ ବି ଆବୁଟା ଗୁଟେ ଜାଗାରେ କାହିଁଥିର ଲାଗି ବାରବାର ହେଉଛେ ସେତାର ଟେର ନାଇଁପାଏବାର। ଏହେଦେ ତାକର ଲାଗି ଶେଷ ଭରସା ପାଲଟିଛେ କଟକ। ଇ ଗରିବ୍ ପରିବାର ଉପରେ ଜିଲା ପରଶାସନ ଦୁରୁଷ୍ଟି ଦେଇ ସବୁପରକାର ସରକାରୀ ସାହାଯ୍ ଯୁଗେଇ ଦେବାକେ ସମିତି ସଭ୍ୟ ଗଣେଶ ରାମ ଦାବି କରିଛନ୍।
