କେସିଙ୍ଗା, ୪।୧୨(ଡି.ଏନ୍.ଏ.)-କଳାହାଣ୍ଡି ଜିଲା କେସିଙ୍ଗା ବ୍ଲକ ଲଇତରା ପଁଚେତ୍ ଜୋଲକୋ ଗଁାର ଗଉଡ଼ପଡ଼ାର ସୁନୀଲ ବାଗ ଟିବି ରୋଗ୍ରେ ପଡ଼ି ୨୦୧୧ ସାଲେ ଆରପାରକେ ଚାଲିଯାଇଛନ୍। ସୁନୀଲ ଚାଲିଯିବାର ବଛ୍ରେ ଉତାରୁ ତାକର ମାଏକିନା ସତ୍ୟବତୀ ବି ନିଜର ୪ ପିଲାଛୁଆକୁ ଛାଡ଼ି କେନ୍ଆଡ଼େ ନିଖୋଜ ହେଇଯାଇଛନ୍। ଆଏଜ୍ତକ ତାକର ଖୋଜ୍ ଖବର ନାଇଁ ମିଲ୍ବାର। ଏନ୍ତାଥି ମା’ବାପ୍ ଛେଉଁଡ୍ ୪ ଭାଇ ବହେନ୍ ବଡ଼ା ଗୁଲ୍ଗୁଲାରେ ଜୀବନ୍ ବିତଉଛନ୍। ମଙ୍ଗଲବାର ୪ ଭାଇଭହେନ୍ ବିଡିଓକୁଁ ନିଜର ଦୁଖ୍ ଦୁରଦଶା ବାବ୍ଦେ ଲେଖିକରି ଦେଇଥିବାର ଜନାଯାଇଛେ।
ସୂଚନା ହିସାବେ ଜୋଲକୋ ଗଁାର ଗଉଡ଼ପଡ଼ାର ସ୍ବର୍ଗତ ସୁନୀଲ ବାଗ ଆର ସତ୍ୟବତୀ ବାଗକଁର ୨ ଝି’ ଝରଣା(୧୫), ଅପରାଜିତା(୯) ଆର ଦୁଇ ପୁଓ ସେତୁ(୧୨), ଚୈତ୍ୟୁ(୧୦)। ୨୦୧୧ ସାଲେ ସୁନୀଲ ଟିବି ରୋଗ୍ରେ ପଡ଼ି ଆରପାରକେ ଚାଲିଗଲେ। ଏନ୍ତାଥି ମାଏକିନା ସତ୍ୟବତୀ ୪ ଛୁଆକର ପାଲପୋଷ କରୁଥିଲେ। ହେଲେ ବଛ୍ରେ ଉତାରୁ ହଠାତ୍ ସେ ନିଖୋଜ ହେଇଗଲେ। ଏନ୍ତାଥି ଆଈବୁଢ଼ି କୁନ୍ତି ବାଗ୍ ୪ ଛେଉଁଡ୍ ନାତି ନାତେନକର ଦେଖ୍ଭାଲ କରୁଥିଲେ। ହେଲେ ୨ ବଛର ତଲେ ସେ ଆରପାରକେ ଚାଲିଯାଇଛନ୍। ଏହେଦେ ଭାଇ ବହେନ୍କର ପାଲପୋଷ, ପଢ଼ାସୁନା ସବୁ ବଡ଼ ବହେନ୍ ଝରଣା ବାଗ(୧୫)ର ଉପରେ ରହିଛେ। ସେ ଗଁାରେ ଲୁକ୍କର କୁଲିମଜୁରି କରି ଯାହା କମଉଛନ୍ ସେଥ୍ରେ ୪ ଭାଇବହେନ୍ ବଡ଼ା କଷ୍ଟେ ଚଲୁଛନ୍। ଯେନ୍ଦିନ ଝରଣାର ଦିହିପା ଖରାପ ହେଉଛେ, ସେଦିନ ଘରେ ସଭେ ଖାଡ଼ା ଉପାସରେ ରହୁଛନ୍। ୪ ଭାଇବହେନ୍କର ଆଧାର କାର୍ଡ ନାଇଁଥିବାର ସରକାରକଁର ଖାଏଦ୍ ସୁରକ୍ଷା ଯୋଜନରୁ ବି ବଁଚିତ୍ ହେଇ ରହିଛନ୍। ଆଏଜ୍କେ ୮ ବଛର ହେଲା ପଁଚେତ୍ନୁ ମୂଲ କରି ବ୍ଲକ ପରଶାସନ ତକ୍ ଗୁହାରି କଲେ ବି ଇ ମା’ବାପ୍ ଛେଉଁଡ୍ ଛୁଆକର କଥା କେହି ନାଇଁ ଶୁନବାର। ଖରା, ବର୍ଷା, ଶୀତ୍ କାକରରେ ଚାରି ଭାଇବହେନ୍ ନିଜର ଭାଏଗ୍କେ ଆଦ୍ରି ଦଦ୍ରା କୁରିଆରେ ପଡ଼ି ରହୁଛନ୍। ରାଏତ୍ ବେଲା ପରହର ଘରେ ଆଶ୍ରେ ନେଉଛନ୍। ଏତେ ଅସ୍ବିଧାରେ ବି ଝରଣା ନିଜର ତିନ୍ହିଁ ଭାଇଭହେନ୍କୁ ପାଠ୍ ପଢ଼େଇ ଭଲ ମୁନୁଷ୍ କରବାରେ ଲାଗିଛନ୍। ହେଲେ ଝରଣାକେ ଭାଇଭହେନ୍କର ଲାଗି ଦୁଇବେଲି ଦୁଇମୁଠା ଖାଏବାରଟା ଯୁଟାବାକେ ଭିଡ଼ ପଡ଼ିଯାଉଛେ। ଝରଣା ଭାଇବହେନ୍କୁ ଧରି ମଙ୍ଗଲବାର ବିଡିଓକଁର ଅଫିସରେ ନିଜର ଦୁଖ୍ ଦୁରଦଶା ବାବ୍ଦେ ଲେଖିକରି ଦେଇଥିବାର କହିଛନ୍। ଗଁାବାସୀ ଇ ଛେଉଁଡ଼ ଭାଇବହେନ୍କର ଥଇଥାନ ଲାଗି ଦାବି କରିଛନ୍। ଇ ବାବ୍ଦେ ଉପଜିଲାପାଳ ସୁଶାନ୍ତ କୁମାର ସିଂକୁଁ ପଚରାଲାରୁ ମୁଇଁ ବିଡିଓକୁଁ ପଠଉଛେଁ। ଘଟନାର ତଦଁତ୍ ଉତାରୁ ବେବସ୍ତା କରବାର ଲାଗି ଚେଷ୍ଟା କରମି ବଲି ସେ କହିଥିଲେ।
