ଭୁବନେଶ୍ୱର, ୨୬ା୮(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି)ରୁ ମଙ୍ଗଳବାର ୩୩୨ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଫଳରେ ବିଏମ୍ସି ଅଞ୍ଚଳରେ ଏବେ ମୋଟ୍ ଆକ୍ରାନ୍ତଙ୍କ ସଂଖ୍ୟା ୭୯୩୧ରେ ପହଞ୍ଚିଛି। ୩୩୨ ଆକ୍ରାନ୍ତଙ୍କ ମଧ୍ୟରୁ ୧୭୩ ଜଣ ସଙ୍ଗରୋଧରୁ ଚିହ୍ନଟ ହୋଇଥିବାବେଳେ ୧୫୯ ଜଣ ସ୍ଥାନୀୟ ସଂକ୍ରମିତ ରହିଛନ୍ତି। ଏମାନଙ୍କ ମଧ୍ୟରେ ୫୦ ଜଣ ବସ୍ତିରୁ ଓ ୨୨୮ ଜଣ ଅଣବସ୍ତିରୁ ଥିବା ଜଣାପଡ଼ିଛି। ସେହିପରି ୨୫ଜଣ ବିଭିନ୍ନ ହସ୍ପିଟାଲ କର୍ମଚାରୀ, ୧୦ଜଣ ପୋଲିସ କର୍ମଚାରୀ ଏବଂ ବିଭିନ୍ନ କ୍ଷେତ୍ରରୁ ୧୫ ଜଣ ପଜିଟିଭ ଚିହ୍ନଟ ହୋଇଥିବା ବିଏମ୍ସି ପକ୍ଷରୁ ସୂଚନା ଦିଆଯାଇଛି।
ସଙ୍ଗରୋଧରୁ ଚିହ୍ନଟ ୧୭୩ ଜଣଙ୍କ ମଧ୍ୟରୁ ଜଣଙ୍କର ରାଜ୍ୟ ବାହାର ଗସ୍ତ ବିବରଣୀ ରହିିଛି। ସେ ସିଆର୍ପିଏଫ୍ କ୍ୟାମ୍ପସ୍ର ହୋଇଥିବାବେଳେ ନିକଟରେ ଜମ୍ମୁ କଶ୍ମୀର ଗସ୍ତ କରିଥିଲେ। ଅନ୍ୟ ୧୭୨ ଜଣ ପୂର୍ବ ଆକ୍ରାନ୍ତଙ୍କ ସଂସ୍ପର୍ଶରେ ଆସି ପଜିଟିଭ୍ ଚିହ୍ନଟ ହୋଇଥିବା ଜଣାପଡ଼ିଛି। ଚନ୍ଦ୍ରଶେଖରପୁର ୭ମ ବାଟାଲିୟନ୍ରୁ ୧୩ଜଣ, ଝାରପଡ଼ା ଜଗନ୍ନାଥ ନଗରରୁ ୧୧, ଭରତପୁରରୁ ୬, ଜୟଦେବ ବିହାରରୁ ୫, ସାଲିଆ ସାହି, ଜଗନ୍ନାଥ ବସ୍ତି ଓ ମଧୁସୂଦନ ନଗରରୁ ୪ଜଣ ଲେଖାଏ, ଏକ ଘରୋଇ ହସ୍ପିଟାଲ, ଆଇଆର୍ସି ଭିଲେଜ୍, ବରମୁଣ୍ଡା, ଡୁମୁଡୁମା, ମଧୁସୁଦନ ନଗର, ସତ୍ୟନଗର, ମଞ୍ଚେଶ୍ୱର ଏବଂ ୟୁନିଟ୍ ୯ରୁ ୩ ଜଣ ଲେଖାଏ ଚିହ୍ନଟ ହୋଇଛନ୍ତି। ସେହିପରି ସ୍ଥାନୀୟ ଆକ୍ରାନ୍ତଙ୍କ ମଧ୍ୟରେ ରବୀନ୍ଦ୍ର ମଣ୍ଡପ ନିକଟରେ ଥିବା ଏକ ବ୍ୟାଙ୍କ, ବିଡିଏ କଲୋନୀ, ସୌଭାଗ୍ୟ ନଗର, ଖାରବେଳ ନଗର, ଜାଗମରା, ନିଳାଦ୍ରୀ ବିହାରରୁ ୩ଜଣ ଲେଖାଏ ଚିହ୍ନଟ ହୋଇଛନ୍ତି। ଏହାବ୍ୟତୀତ ଭୁବନେଶ୍ୱରର ବହୁ ସ୍ଥାନରୁ ଜଣେ କିମ୍ବା ଦୁଇଜଣ ଲେଖାଏ ଆକ୍ରାନ୍ତ ଚିହ୍ନଟ ହୋଇଛନ୍ତି। ଭୁବନେଶ୍ୱରରୁ ମଙ୍ଗଳବାର ୧୬୩ଜଣ ସୁସ୍ଥ ହୋଇଛନ୍ତି। ଏବେ ସୁଦ୍ଧା ୪୭୨୬ ଜଣ ସୁସ୍ଥ ହୋଇଛନ୍ତି। ୩୧୬୨ ଜଣ ସକ୍ରିୟ ସଂକ୍ରମିତ ଥିବାବେଳେ ୩୪ଜଣଙ୍କ ମୃତ୍ୟୁ ଘଟିଛି।
