ଓ୍ବାଶିଂଟନ,୨ା୧(ପି.ଟି.): ଇରାକ ରାଜଧାନୀ ବାଗଦାଦରେ ଇରାନ ସମର୍ଥତ୍ତ ବିଦ୍ରୋହୀଙ୍କ ଉପରେ ଆକାଶମାର୍ଗରୁ ଆକ୍ରମଣ କରିଥିଲା ଆମେରିକା। ଏହାକୁ ନେଇ ଉତ୍ତ୍ୟକ୍ତ ବିକ୍ଷୋଭକାରୀମାନେ ବାଗଦାଦସ୍ଥିତ ଆମେରିକା ଦୂତାବାସକୁ ଟାର୍ଗେଟ କରିଥିଲେ। ସେମାନଙ୍କୁ ଘଉଡାଇବା ପାଇଁ ଆମେରିକୀୟ ବଳ ଲୁହବୁହା ବାଷ୍ପ ପ୍ରୟୋଗ କରିଥିଲେ। ଆକ୍ରମଣ ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଇରାନକୁ ଦାୟୀ କରିଛନ୍ତି। ଏଥିଲାଗି ତେହେରାନକୁ ବହୁମୂଲ୍ୟ ଦେବାକୁ ପଡ଼ିବ ବୋଲି ଟୁଇଟରରେ ସେ କଡ଼ା ଚେତାବନୀ ଦେଇଛନ୍ତି। ଟ୍ରମ୍ପ୍ଙ୍କ ଧମକ ପରେ ଆମେରିକା ପ୍ରତିରକ୍ଷା ସଚିବ ମାର୍କ ଏସ୍ପର ମଧ୍ୟପ୍ରାଚ୍ୟ କ୍ଷେତ୍ରକୁ ତତ୍କାଳ ୭୫୦ ସୈନ୍ୟଙ୍କୁ ପଠାଇବା ପାଇଁ ଘୋଷଣା କରିଛନ୍ତି। ଫଳରେ ବର୍ଷ ଆରମ୍ଭରୁ ପୁଣିଥରେ ମୁହାଁମୁହିଁ ହୋଇଛନ୍ତି ଶକ୍ତିଶାଳୀ ଆମେରିକା ଓ ଏହାର ପାରମ୍ପରିକ ଶତ୍ରୁ ଇରାନ।
ଦୂତାବାସ ଉପରେ ଆକ୍ରମଣ ଲାଗି ଇରାନକୁ ବହୁମୂଲ୍ୟ ଦେବାକୁ ପଡିବ। ତେବେ ତେହେରାନ ସହ ଯୁଦ୍ଧ ସମ୍ଭାବନାକୁ ଟ୍ରମ୍ପ୍ ଅସ୍ବୀକାର କରିଛନ୍ତି। ମଙ୍ଗଳବାର ଦିନ ବାଗଦାଦରେ ଥିବା ଆମେରିକା ଦୂତାବାସ ଉପରେ ଇରାନ ସମର୍ଥକ ଶତାଧିକ ଇରାକୀ ଆକ୍ରମଣ କରିଥିତ୍ଲେ। ଉତ୍ତ୍ୟକ୍ତ ଶିହା ମିଲିସିଆ ସମର୍ଥକମାନେ କଡ଼ା ସୁରକ୍ଷାବଳୟରେ ଥିବା ଆମେରିକା ଦୂତାବାସ ପରିସରକୁ ଧସେଇ ପଶିବା ସହ ମୁଖ୍ୟଦ୍ୱାରକୁ ଭାଙ୍ଗିଦେଇଥିଲେ। ଏଥିସହ ସେମାନେ ରିସେପ୍ଶନ ସ୍ଥାନରେ ନିଆଁ ଲଗାଇଦେବା ସହ ଆମେରିକା ମୁର୍ଦ୍ଦାବାଦ ସ୍ଲୋଗାନ ଦେଇଥିଲେ। ଆମେରିକାର ଏୟାର ଷ୍ଟ୍ରାଇକ୍ରେ ଇରାକରେ ଇରାନ ସମର୍ଥିତ ୨୫ ମିଲିସିଆଙ୍କ ମୃତ୍ୟୁ ହୋଇଥିଲା। ସେଥିପାଇଁ ମିଲିସିଆମାନେ ସେମାନଙ୍କ କ୍ରୋଧ ଜାହିର କରିବାକୁ ଯାଇ ଆମେରିକା ଦୂତାବାସ ଉପରେ ଆକ୍ରମଣ କରିଥିଲେ। ଦୂତାବାସ ଉପରେ ଆକ୍ରମଣ ପଛରେ ଆତଙ୍କବାଦୀଙ୍କ ଗୁପ୍ତ ଷଡ଼ଯନ୍ତ୍ର ରହିଛି ଏବଂ ଏଥିରେ ଅବୁ ମହଦି ଅଲ୍-ମୁହାନ୍ଦିସ୍ ସମ୍ପୃକ୍ତ ବୋଲି ଆମେରିକା ପରରାଷ୍ଟ୍ର ସଚିବ ମାଇକ୍ ପମ୍ପିଓ କହିଛନ୍ତି। ମୁହାନ୍ଦିସ୍ ହେଉଛନ୍ତି ତେହେରାନ୍ ସମର୍ଥତ୍ତ ହାଶେଦ୍ ଅଲ୍ ଶାବି ଆତଙ୍କବାଦୀ ସଂଗଠନର ଦ୍ୱିତୀୟ ମୁଖ୍ୟ।
ଅନ୍ୟପକ୍ଷରେ ବାଗ୍ଦାଦସ୍ଥିତ ଆମେରିକା ଦୂତାବାସ ଉପରେ ଆକ୍ରମଣକୁ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନୀ ନିନ୍ଦା କରିଛନ୍ତି। ତେବେ ଆମେରିକାର ଯେକୌଣସି ଧମକର ମୁକାବିଲା ପାଇଁ ତାଙ୍କ ଦେଶ ପ୍ରସ୍ତୁତ ବୋଲି ଖାମେନୀ ଏକ ଟେଲିଭିଜନ ବାର୍ତ୍ତାରେ କହିଛନ୍ତି। ଇରାକ୍ର କାମଚଳା ପ୍ରଧାନମନ୍ତ୍ରୀ ଆଦିଲ ଅବ୍ଦେଲ ମେହଦୀ ଏବଂ ରାଷ୍ଟ୍ରପତି ବରହାମ ସାଲେହ ଫୋନ ଯୋଗେ ଆମେରିକା ପରରାଷ୍ଟ୍ର ସଚିବଙ୍କ ସହ କଥା ହୋଇଛନ୍ତି। ସ୍ବାଧୀନ ଓ ସାର୍ବଭୌମ ଇରାକକୁ ସମର୍ଥନ କରୁଥିବା ଲୋକଙ୍କୁ ଆମେରିକା ସୁରକ୍ଷା ଯୋଗାଇଦେବ ବୋଲି ଏହାର ପରରାଷ୍ଟ୍ର ବିଭାଗ ପକ୍ଷରୁ କୁହାଯାଇଛି।
