ମନମୁଣ୍ଡା, ୧୬।୧୨ (ଡି.ଏନ୍.ଏ.)- ବୌଦ୍ଧ ଜିଲା କଣ୍ଟାମାଳ ବ୍ଲକ ଅଧୀନ ବରଗୋଛା-ଦପଲା ୨୦ କି.ମି. ରାସ୍ତା ବହୁତ୍ ବଛର ହେଲା ଦେଖ୍ରେଖ, ମରାମତି ଅଭାବୁ ପିଚୁ ଉଠି ମେଟାଲ ଯାକ ଯାହିଁତାହିଁ ପଡ଼ିଛେ। ସେନ୍ତା ରାସ୍ତାର ଅନେକ ଜାଗାରେ ବଡ଼ ବଡ଼ ଖାଲ ହେଇଛେ। ଏନ୍ତାଥି ଚାରଚକିଆ ଗାଡ଼ି, ମୋଟରସାଇକେଲ ୨୦ କି.ମିରୁ ଅଧ୍କା ବେଗ୍ରେ ଯାଇ ନାଇଁପାରବାର। ସେନ୍ତା ସାଇକେଲିଆ ଆର ଚାଲତି ଲୋକ୍ ଇ ରାସ୍ତାରେ ଯିବାର ଆଗ୍ରୁ ୭ ଥର ଭାବୁଛନ୍। ରାସ୍ତାର ବେହାଲ ଅବସ୍ତା ଲାଗି ଅନେକ ସମିଆରେ ଛୋଟ ବଡ଼ ଦୁରଘଟନା ଘଟୁଛେ। ଲୋକ୍ ଖଁଡିଆ ଡଁଡିଆ ହେଇ ଡାକ୍ତରଖାନା ଯିବାର ନଜିର ବି ରହିଛେ। ଇ ରାସ୍ତାଟା ନୂତନ ଭାବେ ତିଆରି କରବାକେ ଅଂଚଲବାସୀ ଅନେକ ଦିନୁ ଦାବି କରିଆସୁଥିଲେ ବି କେହି ନାଇଁ ଶୁନୁଥିବାର ଅଭିଯୋଗ ହେଉଛେ। ସେନ୍ତା ଇ ରାସ୍ତା ଉପରେ ଅଂଚଲର ବରଗୋଛା, ଶିଗାଡ଼ି, ଦେହେରୀସାହି, ମନୋହରପୁର, ବାଞ୍ଜିମୁଣ୍ଡା, ଗୋପାଳପୁର, ପାଲଝିର, ସେମିଲିକଟା, ତିଲକମାଲ, ବଡ଼ଦେହେରିପାଲି, ସାନଦେହେରିପାଲି, ଶୁଣ୍ଢିପଦର ଆଦି ଗଁାର ପାଖାପାଖି ୭୦ ହଜାର ଲୋକ ନିରଭର କରୁଛନ୍। ଗଁାବାସୀମାନେ ଫିଦିନ ଇ ରାସ୍ତା ଦେଇ କଣ୍ଟାମାଳ ବ୍ଲକ, କୋର୍ଟ, ତହସିଲ ଆଦି ଅଫିସ କାଯ୍ରେ ଯାଆସ କରୁଛନ୍। ହେଲେ ରାସ୍ତାର ବେହେଲା ଅବସ୍ତା ଲାଗି ଫିଦିନ ବସ୍ ବି ଯିବାର ଆଏବାର ନାଇଁ କରବାର। ଯେନ୍ଥିରଲାଗି ଅଂଚଲବାସୀ ବହୁତ୍ ହଇରାନ ହରକତ ହେଉଛନ୍। ଏନ୍ତାଥି ଅଂଚଲବାସୀକୁ ୨୫ରୁ ୩୦ କି.ମି. ଦୂରିଆ ମନମୁଣ୍ଡାକେ ଆସି କଣ୍ଟାମାଳ ଯିବାକେ ପଡ଼ୁଛେ। ଲୋକ୍ ବ୍ଲକରୁ ଅଫିସ କାମ୍ବୁତା ସାରି ଫିରଲାବେଲେ ବେଲବୁଡ଼ୁଛେ। ଗାଡ଼ି ମଟର ଅଭାବୁ ଅନେକ ଗରିବ୍ ଦୁଖି ଘରକେ ଫିରି ନାଇଁପାରି କରି ମନମୁଣ୍ଡାରେ ରାଏତ୍ ବିତଉଛନ୍। ସେନ୍ତା ବରଗୋଛା-ଦପଲା ରାସ୍ତାରେ ଥିବାର କେତେ ପୁଲିଆ ବରଷା ପାଏନ୍ ଲାଗି ଖରାପ ହେଇଯାଇଛେ। ଇ ରାସ୍ତାକେ ନୂତନ ଭାବେ ତିଆରି କରବାକେ ବରଗୋଛାର ତନ୍ମୟ ସାହୁ, କଣ୍ଠେଶ୍ୱର ପ୍ରଧାନ, ବିଜୁ ଜିଲା କୃଷକ ସଭାପତି ଶାନ୍ତନୁ ଥାଟ୍ଟି, ଧୃବଚରଣ ପ୍ରଧାନ ପରମୁଖ ଦାବି କରିଛନ୍। ସୂଚନା ହିସାବେ ଇ ରାସ୍ତାଟା ଆଗ୍ରୁ ଆରଡି ବିଭାଗ ଅଧୀନରେ ଥିଲା। ପାଖାପାଖି ୨ ବଛର ହେଲା ପିଡବ୍ଲୁଡି ଅଧୀନକେ ଯାଇଛେ। ବିଭାଗୀୟ କତୁରପକ୍ଷ ଇ ରାସ୍ତା ଉପରେ ଦୁରୁଷ୍ଟି ଦେଇ ପଦକ୍ଷେପ ନେବାକେ ଅଂଚଲବାସୀ ଦାବି କରିଛନ୍। ଇ ବାବ୍ଦେ ମନମୁଣ୍ଡା ପିଡବ୍ଳୁଡି ଜେଇ ଗୋବିନ୍ଦ ନାଏକକୁଁ ପଚରାଲାରୁ ରାସ୍ତାର ହାଲ୍ ବାବ୍ଦେ ମୁଇଁ ଉଚ କତୁରପକ୍ଷକୁଁ ଜନେଇଛେଁ ବଲି ସେ କହିଥିଲେ।
