ଗଣିଆ,୧୧।୧୦(ଡି.ଏନ.ଏ.): ନୟାଗଡ଼ ଜିଲା ସାତକୋଶିଆ ବ୍ୟାଘ୍ର ସଂରକ୍ଷଣାଞ୍ଚଳ ମହାନଦୀ ବନ୍ୟପ୍ରାଣୀ ବନଖଣ୍ଡ ଅନ୍ତର୍ଗତ ଛାମୁଣ୍ଡିଆ ଓ କୁଶଙ୍ଗ ବନାଞ୍ଚଳରେ ଗୁରୁବାର ୯୯ଜଣ ଗାଡି ମାଲିକଙ୍କୁ ବନ୍ୟପ୍ରାଣୀ ବିଭାଗ ତରଫରୁ ପରିଚୟପତ୍ର ପ୍ରଦାନ କରାଯାଇଛି। ଏଥିମଧ୍ୟରୁ ଛାମୁଣ୍ଡିଆ ବନାଞ୍ଚଳରେ ୭୭ ଓ କୁଶଙ୍ଗ ବନାଞ୍ଚଳରେ ୨୨ଜଣ ୩ଚକିଆ ଓ ୪ଚକିଆ ଯାନବାହନର ମାଲିକ ତଥା ଚାଳକଙ୍କୁ ଏହି ପରିଚୟପତ୍ର ପ୍ରଦାନ କରାଯାଇଛି। ଉକ୍ତ ପରିଚୟପତ୍ରରେ ଗାଡି ନମ୍ବର , ମାଲିକଙ୍କ ନାମ ଓ ଠିକଣା ରହିଥିବା ବେଳେ ମହାବଳ ବାଘ ଚିତ୍ରର ଲୋଗ ଥିବା ଷ୍ଟିକର ଗାଡିଗୁଡିକରେ ଲଗାଯାଇଥିଲା। ଛାମୁଣ୍ଡିଆ ବନାଞ୍ଚଳ ଅଧିକାରୀ ବେଣୁଧର ବେହେରା , ଫରେଷ୍ଟର ଗୋଲକ ବିହାରୀ ବେହେରା, ଦୀପ୍ତିରଞ୍ଜନ ଆଚାର୍ଯ୍ୟ, ବ୍ରଜରାଜ ବିଶ୍ୱାଳ, ଗାୟତ୍ରୀ ପରିଡ଼ା ଓ ଫରେଷ୍ଟ ଗାର୍ଡ ରଞ୍ଜିତା ସ୍ବାଇଁ, ପ୍ରଭାକର ସାହୁ , ପୁଷ୍ପଲତା ପ୍ରଧାନ ଓ କାଳନ୍ଦୀ ଚରଣ ସାଥୁଆ ପ୍ରମୁଖ ଯୋଗଦେଇ ପରିଚୟପତ୍ର ବଣ୍ଟନ କରିଥିଲେ। ତେବେ ସମ୍ପୃକ୍ତ ଗାଡି ଚାଳକମାନଙ୍କୁ ମହାନଦୀ ବନ୍ୟପ୍ରାଣୀ ବନଖଣ୍ଡ ତରଫରୁ ସ୍ବତନ୍ତ୍ର ଭାବେ ସବୁଜ ରଙ୍ଗର ବାନିୟନ ପ୍ରଦାନ କରାଯାଇଥିଲା। ଉକ୍ତ ବନାଞ୍ଚଳ ପରିସରରେ ଥିବା ସ୍ଥାନୀୟ ଗାଡିମାଲିକଙ୍କ ଯାନବାହନ ଗୁଡିକ ସୁବିଧାରେ ଚଳପ୍ରଚଳ ନିମିତ ବନ୍ୟପ୍ରାଣୀ ବିଭାଗ ତରଫରୁ ଏହି ପରିଚୟପତ୍ର ପ୍ରଦାନ କରାଯାଇଥିବା ବନାଞ୍ଚଳ ଅଧିକାରୀ କହିଛନ୍ତି। ଅପରପକ୍ଷେ ଅଭୟାରଣ୍ୟ ମଧ୍ୟରେ ଥିବା ତନଖି ଫାଟକଗୁଡିକରେ ଏହା ସ୍ବତନ୍ତ୍ର ପରିଚୟପତ୍ର ଭାବେ କାର୍ଯ୍ୟକରିବ। ଫଳରେ ଅଭୟାରଣ୍ୟ ମଧ୍ୟରେ ଏହି ପଞ୍ଜୀକୃତ ଗାଡିଗୁଡିକ ଯାତାୟାତ କରିବା ପାଇଁ କୌଣସି ଟିକସ ଦେବାକୁ ପଡିବ ନାହିଁ। ସେହିପରି ଅପରାହ୍ନରେ କୁଶଙ୍ଗ ବନାଞ୍ଚଳ ଅଧିକାରୀ ଅଶୋକ କୁମାର ଦାସ, ସହକାରୀ ବନାଞ୍ଚଳ ଅଧିକାରୀ ପ୍ରଦୀପ କୁମାର ଭୂତିଆ ଉପସ୍ଥିତ ରହି ୨୨ଜଣ ଗାଡିମାଲିକଙ୍କୁ ପରିଚୟପତ୍ର ପ୍ରଦାନ କରିଥିଲେ।
