ଅନୁଗୋଳ ଅଫିସ, ୨୯।୩ – କରୋନା ରୋକିବାକୁ ଲୋକଙ୍କ ମଧ୍ୟରେ ସାମାଜିକ ଦୂରତା ରକ୍ଷା କରାଯିବା ଅତ୍ୟନ୍ତ ଆବଶ୍ୟକ। ଏପରି କି ପରିବା ଦୋକାନ ଠାରୁ ମେଡିସିନ ଦୋକାନ ଯାଏ ସବୁଠି ଲକ୍ଷ୍ମଣରେଖା ଟଣାଯାଇଛି। ତେବେ ଶନିବାରଠାରୁ ଜିଲା ମୁଖ୍ୟ ଚିକିତ୍ସାଳୟରେ ମଧ୍ୟ ଏପରି ବ୍ୟବସ୍ଥାକୁ ଆପଣାଯାଇଛି। ଜିଲା ମୁଖ୍ୟ ଚିକିତ୍ସାଳୟରେ ୧୫ରୁ ୨୦ଟି ରେଖାଙ୍କିତ ଚିହ୍ନ କରାଯାଇ ସାମାଜିକ ଦୂରତା ବ୍ୟବସ୍ଥା କରାଯାଇଥିବା ସୂଚନା ମିଳିଛି। ସେହିପରି ଏଠାରେ ଅନ୍ ଲାଇନ୍ ଟିକେଟ ବ୍ୟବସ୍ଥାକୁ ସ୍ଥଗିତ ରଖାଯାଇଛି।
ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ଉପରେ ଅନୁଗୋଳ ସହ ପଡ଼ୋଶୀ ଜିଲା ଢେଙ୍କାନାଳ, ବୌଦ୍ଧ ଓ ଦେବଗଡ଼ର ଲୋକମାନେ ନିର୍ଭର କରନ୍ତି। କିଛି ଦିନ ପୂର୍ବରୁ ଜିଲା ମୁଖ୍ୟ ଚିକିତ୍ସାଳୟରେ ଅନ୍ଲାଇନ୍ରେ ନାମ ପଞ୍ଜୀକରଣ କରିବା ପରେ ଧାଡ଼ି ବ୍ୟବସ୍ଥାରେ ଆଉଟଡୋରରେ ଥିବା ଡାକ୍ତରଙ୍କ ନିକଟକୁ ରୋଗୀମାନେ ଯାଉଥିଲେ। କିନ୍ତୁ କରୋନା ପାଇଁ ଧାଡ଼ିରେ ରହି ଟିକେଟ୍ ଓ ଡାକ୍ତରଙ୍କୁ ଦେଖାଇବା ବେଳେ ସାମାଜିକ ଦୂରତା ରକ୍ଷା କରାଯାଇପାରୁ ନ ଥିଲା। ତେଣୁ ମେଡିକାଲ କର୍ତ୍ତୃପକ୍ଷ ୧୫ରୁ ୨୦ଟି ରେଖାକୃତ ବୃତ୍ତ କରି ଆଉଟଡୋରରେ ରୋଗୀଙ୍କ ମଧ୍ୟରେ ସାମାଜିକ ଦୂରତା ରକ୍ଷାର ବ୍ୟବସ୍ଥା କରିଛନ୍ତି। କେବଳ ଆଉଟ୍ଡୋର ନୁହେଁ, ମେଡିକାଲ ପରିସରରେ ଥିବା ଆହାର କେନ୍ଦ୍ର ସହ ବିଭିନ୍ନ ୱାର୍ଡରେ ମଧ୍ୟ ସମାନ ବ୍ୟବସ୍ଥା କରାଯାଇଛି। ଏପରି କି ରୋଗୀ ଦେଖିବା ବେଳେ ଡାକ୍ତରମାନେ ନିଜେ ଟିକେଟ୍ ଲେଖିବେ ବୋଲି ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଛି।
