ଅନୁଗୋଳ ଅଫିସ, ୧୧।୫: ଅନୁଗୋଳ ଜିଲାର କରୋନା ଆକ୍ରାନ୍ତଙ୍କ ସମ୍ପର୍କରେ ସକାଳେ ସ୍ବାସ୍ଥ୍ୟ ବିଭାଗ ରିପୋର୍ଟ ଦେଇଥିଲା। ସେଥିମଧ୍ୟରୁ ଜଣେ ଆକ୍ରାନ୍ତ ସ୍ଥାନୀୟ ଅଞ୍ଚଳର ହୋଇଥିବା ଜଣାପଡ଼ିବା ପରେ ଅନୁଗୋଳ ଜିଲାପାଳ ମନୋଜ କୁମାର ମହାନ୍ତି ତୁରନ୍ତ ଜିଲାକୁ ରେଡ୍ଜୋନ୍ ଘୋଷଣା କରିଥିଲେ। କିନ୍ତୁ କିଛି ସମୟ ପରେ ସେ ଏକ ଜରୁରୀ ଖବରଦାତା ସମ୍ମିଳନୀ ଡକାଇଥିଲେ। ସେଥିରେ ଜିଲାପାଳ କହିଥିଲେ ଯେ, ଅନୁଗୋଳ ଜିଲାକୁ ରେଡ୍ଜୋନ୍ ଭାବେ ଘୋଷଣା କରାଯାଇ ନାହିଁ। ଏପରି ଘୋଷଣା ତାଙ୍କ କ୍ଷମତା ବାହାରେ। ଏହା କେବଳ ରାଜ୍ୟ ସରକାର କରିପାରିବେ। ସରକାରଙ୍କ ନିର୍ଦ୍ଦେଶ ନ ଆସିବା ପର୍ଯ୍ୟନ୍ତ ଅନୁଗୋଳ ଜିଲା ପୂର୍ବ ଭଳି ଗ୍ରୀନ୍ ଜୋନ୍ରେ ରହିବ ବୋଲି ଜିଲାପାଳ ମହାନ୍ତି ପ୍ରକାଶ କରିଥିଲେ।
