ଠାକୁରମୁଣ୍ଡା,୧୦ା୫(ଡି.ଏନ୍.ଏ.)- ମୟୂରଭଞ୍ଜ ଜିଲା ଠାକୁରମୁଣ୍ଡା ବ୍ଲକ ଅଧୀନ କେଶଡ଼ିହା ପଞ୍ଚାୟତ ପୁରୁଣାପାଣି ଗ୍ରାମରେ ରବିବାର ଅପରାହ୍ନରେ ବଜ୍ରପାତ ଘଟି ଜଣେ ଯୁବକଙ୍କ ମୃତ୍ୟୁ ଘଟିଥିବା ୩ ଜଣ ଗୁରୁତର ଆହତ ହୋଇଛନ୍ତି। ଆହତମାନଙ୍କୁ ଚିକିତ୍ସା ପାଇଁ ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ମୃତକ ହେଲେ ମହୁଲଡିହା ଥାନା ଅନ୍ତର୍ଗତ ଜାମୁନଣ୍ଡା ଗ୍ରାମର ମହେନ୍ଦ୍ର ସମାଡ଼।
ସୂଚନା ଅନୁଯାୟୀ,ମହେନ୍ଦ୍ର ତାଙ୍କର ସମ୍ପର୍କୀୟ କେଶଡିହା ପୁରୁଣାପାଣି ଗ୍ରାମର ଲକ୍ଷ୍ମୀଧର ସମାଡ଼ଙ୍କ ଘରକୁ ଯାଇଥିଲେ। ଅପରାହ୍ନ୨.୩୦ ମିନିଟ ସମୟରେ ବର୍ଷା ଆସିଯିବାରୁ ଲକ୍ଷ୍ମୀଧର ଘର ନିକଟରେ ପକାଇଥିବା ମାଟି ଇଟା ନ ଭିଜିବା ପାଇଁ ମହେନ୍ଦ୍ର ଓ ଲକ୍ଷ୍ମୀଧରଙ୍କ ପରିବାରର ନନ୍ଦିଆ ସମାଡ଼, ରବୀନ୍ଦ୍ର ସମାଡ଼ , ଶୁଭାଶିନୀ ସାମାଡ଼ ଇଟାଗୁଡିକୁ ସଜାଡୁ ଥିଲେ। ଏହି ସମୟରେ ସେଠାରେ ବଜ୍ରପାତ ହେବାରୁ ଘଟଣାସ୍ଥଳରେ ୪ ଜଣ ସଂଜ୍ଞାହୀନ ହୋଇ ପଡ଼ିିଯାଇଥିଲେ। ଖବରପାଇ ଅଗ୍ନିଶମବାହିନୀ ସେମାନଙ୍କୁ ଉଦ୍ଧାର କରି ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଡାକ୍ତର ମହେନ୍ଦ୍ରଙ୍କୁ ମୃତ ଘୋଷଣା କରିଥିଲା ବେଳେ ଅନ୍ୟ ୩ ଜଣ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି।
