ନୂଆଦିଲ୍ଲୀ,୧୧-୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଏନ୍ଡିଏ ସରକାର ଡିଜିଟାଲ ଟ୍ରାଞ୍ଜାକଶନକୁ ପ୍ରୋତ୍ସାହିତ କରିବା ଲାଗି ଏକାଧିକ ପଦକ୍ଷେପ ଉଠାଇଛନ୍ତି। ଏବେ ସରକାର ଆଉ ଏକ ପଦକ୍ଷେପ ନେବାକୁ ଯାଉଛନ୍ତି। କାଗଜ ମୁଦ୍ରାର ବ୍ୟବହାରକୁ କମ୍ କରିବା ଉଦ୍ଦେଶ୍ୟରେ ବାର୍ଷିକ ୧୦ ଲକ୍ଷ ଅଥବା ଏହାଠାରୁ ଅଧିକ ପରିମାଣର ନଗଦ ଉଠାଣ ଉପରେ ଟିକସ ଧାର୍ଯ୍ୟ କରିବାକୁ ଯାଉଛନ୍ତି। ଏନେଇ ବିଚାର ଆଲୋଚନା ଚାଲିଛି। କଳାଧନ ଉପରେ ଅଙ୍କୁଶ ଲଗାଇବା ଉଦ୍ଦେଶ୍ୟରେ ଏଭଳି ପଦକ୍ଷେପ ଖୁବଶୀଘ୍ର ନିଆଯିବ। ଏ ସମ୍ପର୍କରେ ବଜେଟରେ ଘୋଷଣା କରାଯିବାର ସମ୍ଭାବନା ରହିଛି।
ମିଡିଆ ରିପୋର୍ଟ ଅନୁଯାୟୀ, ସରକାର କଳାଧନ ସୃଷ୍ଟିକୁ ରୋକିବା ଲାଗି ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିବାକୁ ଯାଉଛନ୍ତି। ବଡ଼ ଧରଣର ନଗଦ ଉଠାଣକୁ ନିରତ୍ସାହିତ କରିବା ଲାଗି ସରକାର ଆଧାର ସତ୍ୟତା ଯାଞ୍ଚକୁ ବାଧ୍ୟତାମୂଳକ କରିବା ନେଇ ଆଗତ ପ୍ରସ୍ତାବକୁ ବିଚାର କରୁଛନ୍ତି। ଏହାଦ୍ୱାରା ନଗଦ ନେଣଦେଣକୁ ଟ୍ୟାକ୍ସ ରିଟର୍ନ ସହ ସହଜରେ ମିଳାଯାଇପାରିବ। ବାସ୍ତବରେ ଆଧାର ସଂଖ୍ୟାର ଦୂରୁପଯୋଗକୁ ରୋକିବାରେ ୟୁଆଇଡି ପ୍ରମାଣୀକରଣ ଏବଂ ଓଟିପି ସହାୟତା କରିବ। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ଏମ୍ଜିଏନ୍ଆରଜିଏ ଅଧୀନରେ ଆଧାର ସତ୍ୟତା ଯାଞ୍ଚ ବାଧ୍ୟତାମୂଳକ ହୋଇଥିବା ବେଳେ ୫ ଲକ୍ଷ ଟଙ୍କା ପର୍ଯ୍ୟନ୍ତ ନଗଦ ଉଠାଣ ଲାଗି ଏହା ଆଜିଯାଏ ବାଧ୍ୟତାମୂଳକ କରାଯାଇ ନାହିଁ। ଅଧିକାଂଶ ବ୍ୟକ୍ତି ଏବଂ ବ୍ୟବସାୟିକ ସଂସ୍ଥାକୁ ବାର୍ଷିକ ୧୦ ଲକ୍ଷ ଟଙ୍କାରୁ ଅଧିକ ନଗଦ ଉଠାଣର ଆବଶ୍ୟକତା ହୁଏ ନାହଁି ବୋଲି ସରକାର ମନେ କରୁଛନ୍ତି। ତେବେ ବଜେଟରେ ଏ ସମ୍ପର୍କରେ ଉଲ୍ଲେଖ କରାଯିବା ନେଇ ଅଦ୍ୟାବଧି ସ୍ଥିର ହୋଇନାହିଁ ବୋଲି ସେ କହିଛନ୍ତି। ତେବେ ଗରିବ ଏବଂ ମଧ୍ୟବିତ୍ତ ଶ୍ରେଣୀ ଉପରେ ଆଇନଗତ ବୋଝ ଚପାଇ ଦେବା ଲାଗି ସରକାର ଚାହୁଁନାହାନ୍ତି। ସୂଚନାଥାଉ କି, ବ୍ୟାଙ୍କ ଜରିଆରେ ବଡ଼ ଧରଣର ଟଙ୍କା ନେଣଦେଣ ଲାଗି ମାଧ୍ୟମ ସାଜିଥିବା ଏନ୍ଇଏଫ୍ଟି ଏବଂ ଆର୍ଟିଜିଏସ୍ ଶୁଳ୍କକୁ ଆର୍ବିଆଇ ଛାଡ କରିଛି। ଏକ ଦଶନ୍ଧି ପୂର୍ବରୁ ୟୁପିଏ ସରକାର ଏ ସଂକ୍ରାନ୍ତରେ ଟ୍ରାନ୍ସଫର ଟ୍ୟାକ୍ସ ଲାଗୁ କରିଥିଲେ। ତେବେ ବହୁ ହଙ୍ଗାମା ପରେ ଏହାକୁ ସରକାର ପ୍ରତ୍ୟାହାର କରିନେଇଥିଲେ। ୨୦୧୬ରେ ଆନ୍ଧ୍ରପ୍ରଦେଶର ତତ୍କାଳୀନ ମୁଖ୍ୟମନ୍ତ୍ରୀ ଏନ୍.ଚନ୍ଦ୍ରବାବୁ ନାଇଡୁଙ୍କ ଅଧ୍ୟକ୍ଷତାରେ ମୁଖ୍ୟମନ୍ତ୍ରୀ ମାନଙ୍କ ଏକ ଉଚ୍ଚସ୍ତରୀୟ କମିଟି ବା ଏସ୍ଆଇଟି ଗଠନ କରାଯାଇଥିଲା। ଏହି କମିଟି ‘ନଗଦ ଉପଯୋଗ’କୁ କମାଇବା ଉଦ୍ଦେଶ୍ୟରେ କେତେକ ଉପାୟ ଧାର୍ଯ୍ୟ କରିଥିଲେ। ୫୦ ହଜାରରୁ ଅଧିକ ନଗଦ ଉଠାଣ ଉପରେ ପୁନର୍ବାର ଟିକସ ଆଦାୟ ଲାଗି ସୁପାରିସ କରାଯାଇଥିଲା। ଏଥିସହିତ ଡିଜିଟାଲ ନେଣଦେଣକୁ ପ୍ରୋତ୍ସାହନ ଦେବା ଲାଗି କେତେକ ପ୍ରସ୍ତାବ ଦିଆଯାଇଥିଲା।
