ଓ୍ବାଶିଂଟନ,୨୮।୧୦: ଇସଲାମିକ୍ ଷ୍ଟେଟ୍(ଆଇଏସ୍) ସଂଗଠନ ମୁଖ୍ୟ ଅବୁ ବକର ଅଲ୍ ବଗଦାଦିଙ୍କ ମୃତ୍ୟୁ ଘଟିଥିବା କୁହାଯାଉଛି। ଏହାକୁ ମିଶାଇ ୫ମ ଥର ପାଇଁ ଏଭଳି ଖବର ମିଳିଛି। ସିରିୟାରେ ଜାରି ରହିଥିବା ମିଳିତ ସର୍ଚ୍ଚ ଅପରେଶନ୍ରେ ଏଭଳି ହୋଇଥିବା ଆମେରିକା ରାଷ୍ଟ୍ରପତି ଡୋନାଲ୍ଡ୍ ଟ୍ରମ୍ପ୍ ଟୁଇଟ୍ କରି ସୂଚନା ଦେଇଛନ୍ତି। ସିରିୟାର ଉତ୍ତର-ପଶ୍ଚିମ ଅଞ୍ଚଳରେ ଥିବା ଇଦବିଲ୍ ପ୍ରଦେଶରେ ହୋଇଥିବା ୨ ଘଣ୍ଟାର ଅପରେଶନ୍ର ଲାଇଭ୍ ଟ୍ରମ୍ପ୍ ଦେଖିଥିବା କହିଛନ୍ତି। ତେବେ ଏହା ପୂର୍ବରୁ ବଗଦାଦିଙ୍କ ମୃତ୍ୟୁ ଘଟିଥିବା ଖବର ୪ ଥର ପ୍ରଚାରିତ ହୋଇଛି। ତେଣୁ ୫ମ ଥରର ଖବରରେ କେତେ ଦୂର ସତ୍ୟାସତ୍ୟ ରହିଛି ସେ ନେଇ ଆମେରିକା କଥାକୁ ରୁଷିଆ ନାପସନ୍ଦ କରିବା ସହିତ ସନ୍ଦେହ ପ୍ରକାଶ କରିଛି। ଅପର ପକ୍ଷରେ ତୁର୍କୀ ଆମେରିକା ଦାବିକୁ ସମର୍ଥନ କରିଛି। ୨୦୧୪ ସେପ୍ଟେମ୍ବର ୬ରେ ବଗଦାଦିଙ୍କ ମୃତ୍ୟୁ ଘଟିଥିବା ଖବର ପ୍ରଚାରିତ ହୋଇଥିଲା। ମିଳିତ ସୁରକ୍ଷାକର୍ମୀଙ୍କ ବୋମାମାଡ଼ରେ ଆହତ ବଗଦାଦିଙ୍କ ମୃତ୍ୟୁ ଘଟିଥିବା କୁହାଯାଇଥିଲା। ତେବେ ୨୦୧୪ ନଭେମ୍ବର ୧୩ରେ ବଗଦାଦିଙ୍କର ଏକ ଅଡ଼ିଓ ଟେପ୍ ଜାରି ହୋଇଥିଲା। ଏହା ତାଙ୍କ ମୃତ୍ୟୁ ଖବର ମିଥ୍ୟା ବୋଲି ସାବ୍ୟସ୍ତ କରିଥିଲା। ସେହିପରି ୨୦୧୫ ଏପ୍ରିଲ୍ ୨୭ରେ ସିରିୟାର ଗୋଲାନ ହାଇଟସ୍ ଅଞ୍ଚଳରେ ବଗଦାଦିଙ୍କ ମୃତ୍ୟୁ ଘଟିଥିବା ଖବର ପୁଣି ପ୍ରଚାରିତ ହୋଇଥିଲା। ମାତ୍ର ସେହିବର୍ଷ ଜୁଲାଇରେ ବାଗଦାଦି ଜୀବିତ ଥିବା ଜଣାପଡ଼ିଥିଲା। ତୃତୀୟ ଥର ୨୦୧୫ ଅକ୍ଟୋବର ୧୨ରେ ଇରାକ୍-ସିରିୟା ସୀମାରେ ବୋମାମାଡ଼ରେ ବଗଦାଦିଙ୍କ ମୃତ୍ୟୁ ଘଟିଥିବା ଖବର ପ୍ରକାଶ ପାଇଥିଲା। ତେବେ ନଭେମ୍ବର ଶେଷରେ ବଗଦାଦି ଏହି ଖବର ମିଛ ବୋଲି ନିଜେ କହିଥିଲେ। ଚତୁର୍ଥ ଥର ୨୦୧୬ ଜୁନ୍ ୯ରେ ସିରିୟାର ରକ୍କା ସହରରେ ବଗଦାଦିଙ୍କ ମୃତ୍ୟୁ ଘଟିଥିବା ଆମେରିକା କହିଥିଲା। ମାତ୍ର ପରେ ଜଣାପଡ଼ିଥିଲା ଆମେରିକା ସୈନ୍ୟଙ୍କ ଆକ୍ରମଣ ସମୟରେ ବଗଦାଦି ସେଠାରେ ନ ଥିଲେ। ଇତିମଧ୍ୟରେ ଆମେରିକା ୫ମ ଥର ପାଇଁ ଏଭଳି ଦାବି କରିଛି। ଏହା ସହିତ ଆମେରିକା ସୈନ୍ୟ ବାହିନୀ ପକ୍ଷରୁ ଡିଏନ୍ଏ ପରୀକ୍ଷା ରିପୋର୍ଟକୁ ଗୁରୁତ୍ୱ ଦେଇଛି। ତେବେ ଏହାର ସତ୍ୟାସତ୍ୟ ନେଇ ପ୍ରଶ୍ନ ଉଠିବାରେ ଲାଗିଛି।
