କଟକ ଅଫିସ,୧୧ା୬: ଖଣ୍ଡେ ବାଉଁଶରୁ ବଂଶୀ ତିଆରି କରିପାରନ୍ତି ଆଉ ସେଥିରେ ଅପୂର୍ବ ସୁର ବି ତୋଳି ଧରନ୍ତି ସେ। ଦେଶବିଦେଶରେ ବଂଶୀ ପାଇଁ ଖ୍ୟାତି ଅର୍ଜିଥିବା ଯେଉଁ ହାତଗଣତି ପ୍ରତିଭା ଓଡ଼ିଶାରେ ରହିଛନ୍ତି, ସେମାନଙ୍କ ଭିତରୁ ବଂଶୀବାଦକ ଅଭିରାମ ନନ୍ଦଙ୍କ ପ୍ରତିଭା ଅନନ୍ୟ। ବଂଶୀ ବଜାଇବା ସହ ବଂଶୀ ତିଆରି କରିବାରେ ମଧ୍ୟ ସେ ସିଦ୍ଧହସ୍ତ। ଅନେକ ଦେଶର କଳାକାର ଏବେ ବଂଶୀ ପାଇଁ ତାଙ୍କୁ ହିଁ ଲୋଡୁଛନ୍ତି।
ବଂଶୀବାଦନ କ୍ଷେତ୍ରରେ ଓଡ଼ିଶାର ଜଣେ ଅନନ୍ୟ ପ୍ରତିଭା ହେଲେ ଅଭିରାମ ନନ୍ଦ। ଗତ ଦୁଇ ଦଶନ୍ଧି ଧରି ଓଡ଼ିଶାର ଅନେକ ସୁପରହିଟ ଗୀତ ପଛରେ ଅଭିରାମଙ୍କ ଅବଦାନ ରହିଛି। କୌଣସି ଷ୍ଟୁଡ଼ିଓରେ ଗୀତ ପ୍ରସ୍ତୁତ କରାଯାଉଥିବା ବେଳେ ବଂଶୀର ସ୍ବର କଥା ଉଠିଲେ ଅଭିରାମଙ୍କୁ ଖୋଜାପଡ଼େ। ଆଧୁନିକ ହେଉ କି ଶାସ୍ତ୍ରୀୟ, ସୁନ୍ଦର ବଂଶୀ ବଜାଇ ସେ ନିଜର ସ୍ବତନ୍ତ୍ର ପରିଚୟ ତିଆରି କରିପାରିଛନ୍ତି। ସଙ୍ଗୀତ ଦୁନିଆରେ ପରିଚୟ ପାଇଥିବା ଏହି କଳାକାର ବଂଶୀ ତିଆରି କରି ମଧ୍ୟ ଅନେକ ବିଦେଶୀ ରାଷ୍ଟ୍ରରେ ନାଁ କମାଇଲେଣି। ହଲାଣ୍ଡ, ଆମେରିକା, ରୁଷିଆ, ସ୍ବିଜରଲ୍ୟାଣ୍ଡ, ସ୍ପେନ, ଜର୍ମାନୀ ଭଳି ରାଷ୍ଟ୍ରର କଳାକାର ବଂଶୀ ପାଇଁ ତାଙ୍କ ପାଖକୁ ଆସନ୍ତି ବୋଲି ସେ କହିଛନ୍ତି। ବଂଶୀ ପାଇଁ ସେ ଆସାମରୁ ବାଉଁଶ ଆଣନ୍ତି। ସଙ୍ଗୀତର ସ୍କେଲ (ମାପ) ଅନୁଯାୟୀ ବଂଶୀ ମଧ୍ୟ ଭିନ୍ନଭିନ୍ନ। ୧୫୦୦ଟଙ୍କାରୁ ଆରମ୍ଭ କରି ୮ହଜାର ଟଙ୍କା ପର୍ଯ୍ୟନ୍ତ ବଂଶୀର ବଜାର ମୂଲ୍ୟ ରହିଛି। ଗୋଟିଏ ବଂଶୀ ତିଆରି କରିବା ପାଇଁ ଅତିକମ୍ରେ ଦୁଇ ଦିନ ଲାଗେ।
ପଟିଆରେ ରହୁଥିବା ଅଭିରାମଙ୍କ ଘର ହେଉଛି ଜଗତ୍ସିଂହପୁରର ତେରତଙ୍ଗ ଅଞ୍ଚଳ। ସେ ପ୍ରଖ୍ୟାତ ବଂଶୀବାଦକ ତଥା ପଦ୍ମବିଭୂଷଣ ପଣ୍ଡିତ ହରିପ୍ରସାଦ ଚୌରସିଆଙ୍କ ଶିଷ୍ୟ। ପ୍ରଥମେ ସେ ପ୍ରଫେସର ମୋହିନୀମୋହନ ପଟ୍ଟନାୟକଙ୍କଠାରୁ ଶିକ୍ଷା ହାସଲ କରିଥିଲେ। ୯୦ ଦଶକ ପ୍ରାରମ୍ଭରୁ ସେ ବଂଶୀବାଦନ ଶିକ୍ଷା ଆରମ୍ଭ କରିଥିଲେ ଓ ପରେ ଅଲ ଇଣ୍ଡିଆ ରେଡିଓ ସହ ସଂଶ୍ଲିଷ୍ଟ ହୋଇଥିଲେ। ଏବେ ସୁଦ୍ଧା ୧ହଜାରରୁ ଊର୍ଦ୍ଧ୍ୱ ଗୀତରେ ସେ ବଂଶୀ ବଜାଇଛନ୍ତି। ଏହା ମଧ୍ୟରେ ଅନେକ ଚଳଚ୍ଚିତ୍ରର ଗୀତ ମଧ୍ୟ ରହିଛି। ଏହାଛଡ଼ା ୫୩ଟି ବିଦେଶୀ ରାଷ୍ଟ୍ର ବୁଲି ସାରିଲେଣି ଅଭିରାମ। କେବଳ ବଂଶୀ ବଜାଇବା ପାଇଁ ତାଙ୍କୁ ବିଦେଶରୁ ଆମନ୍ତ୍ରଣ ଆସୁଛି। ବିଦେଶୀ ଯୁବତୀଯୁବକ ମଧ୍ୟ ଅଭିରାମଙ୍କ ଛାତ୍ରୀଛାତ୍ର ପାଲଟି ସାରିଲେଣି।
