ପ୍ୟାରିସ, ୨୩ା୪ (ଏଏଫ୍ପି)-କରୋନାଭାଇରସ୍ ମହାମାରୀ ଯୋଗୁ ବର୍ତ୍ତମାନ ଖେଳକୁ ସ୍ଥଗିତ ରଖାଯାଇଥିବାରୁ ପ୍ରଫେସନାଲ କେତେଜଣ ଫୁଟ୍ବଲ ଖେଳାଳିଙ୍କ ମାନସିକ ଅବସାଦ ଅବା ଚିନ୍ତାଗ୍ରସ୍ତରେ ରହୁଛନ୍ତି। ଏହି ସଂଖ୍ୟା କ୍ରମେ ବୃଦ୍ଧି ପାଇବାରେ ଲାଗିଛି। ଗ୍ଲୋବାଲ ପ୍ଲେୟର୍ସ ୟୁନିୟନ ‘ଫିଫ୍୍ ପ୍ରୋ’ ପକ୍ଷରୁ ସୋମବାର ପ୍ରକାଶିତ ଏକ ସର୍ଭେ ରିପୋର୍ଟରେ ଏହା ଦର୍ଶାଯାଇଛି। ଇଂଲଣ୍ଡ, ସ୍କଟଲାଣ୍ଡ, ଫ୍ରାନ୍ସ, ଅଷ୍ଟ୍ରେଲିଆ ସମେତ ୧୬ଟି ଦେଶର ୧,୬୦୨ ଖେଳାଳିଙ୍କୁ ନେଇ ଫିଫ୍ ପ୍ରୋ ପକ୍ଷରୁ ଏହି ସର୍ଭେ କରାଯାଇଥିଲା। ତନ୍ମଧ୍ୟରେ ୪୬୮ ମହିଳା ଖେଳାଳି ଅନ୍ତର୍ଭୁକ୍ତ। ୧୩ ପ୍ରତିଶତ ପୁରୁଷ ଏବଂ ୨୨ପ୍ରତିଶତ ମହିଳା ଖେଳାଳିଙ୍କ ନିକଟରେ ମାନସିକ ବିଷାଦ ଲକ୍ଷଣ ଦେଖାଦେଇଛି। ପ୍ରତି ୫ଜଣରେ ଜଣେ ପୁରୁଷ ଓ ମହିଳା ଖେଳାଳି ଚିନ୍ତାଗ୍ରସ୍ତ ରହୁଛନ୍ତି। ଫୁଟ୍ବଲରେ ଆକସ୍ମିକ ଯୁବ ଓ ମହିଳା ଖେଳାଳିଙ୍କୁ ସେସେିଆଲ ଆଇସୋଲେଶନ ସହିତ ଖାପ ଖୁଆଇବାକୁ ପଡ଼ିଲା। ସେମାନଙ୍କ ଜୀବନ ଶୈଳି ସ୍ଥିର ହୋଇ ଗଲା। ନିଜର ଭବିଷ୍ୟତକୁ ନେଇ ସେମାନେ ସନ୍ଦିହାନୀ ହୋଇପଡ଼ିଛନ୍ତି। କୋଭିଡ୍-୧୯ ବ୍ୟାପିବା ରୋକିବାକୁ ଯାଇ ବହୁ ଦେଶ ଲକ୍ଡାଉନ୍କୁ କଡ଼ାକଡ଼ି ଭାବେ କାର୍ଯ୍ୟକରୁଛନ୍ତି। ବହୁ ସଂଖ୍ୟାରେ ପ୍ରଫେସନାଲ ଫୁଟ୍ବଲର ସେମାନଙ୍କ ପରିବାର ଛାଡ଼ି ବିଦେଶରେ ଅଟକିଯାଇଛନ୍ତି। ଅଳ୍ପ ଦିନିଆ ଚୁକ୍ତି କରିଥିବା ଖେଳାଳି ଏବେ ଚିନ୍ତାରେ ପଡ଼ିଯାଇଛନ୍ତି। ଫିଫ୍ପ୍ରୋ ତରଫରୁ ଡିସେମ୍ବର ଓ ଜାନୁୟାରୀରେ ଏକ ସର୍ଭେ କରାଯାଇଥିଲା। ସେତେବେଳେ କେବଳ ୩୦୭ ଖେଳାଳିଙ୍କୁ ନେଇ ଏହା କରାଯାଇଥିଲା। ସେତେବେଳେ ଅବସାଦଗ୍ରସ୍ତ ଥିବା ମହିଳା ଖେଳାଳିଙ୍କ ମାତ୍ରା ୧୧ ପ୍ରତିଶତ ଥିବାବେଳେ ପୁରୁଷଙ୍କ ମାତ୍ରା ୬ ପ୍ରତିଶତ ରହିଥିଲା ବୋଲି ଫିଫ୍ପ୍ରୋ’ର ସାଧାରଣ ସଂପାଦକ ଜୋନାସ ବେଅର୍ ହଫ୍ମ୍ୟାନ ପ୍ରକାଶ କରିଛନ୍ତି। ଅନ୍ୟପକ୍ଷରେ ୟୁରୋପର ଲିଗ୍ଗୁଡ଼ିକର କେବେ ପୁନଃଆରମ୍ଭ ହେବ ସେଇ ସେ ନେଇ ଫେଡେରେଶନ ଏବଂ ଗଭର୍ନିଂବଡିଗୁଡ଼ିକ ମଧ୍ୟରେ ଆଲୋଚନା ଜାରି ରହିଛି। ଏପରିକି ମ୍ୟାଚ ରୁଦ୍ଧଦ୍ୱାରରେ କରିବା କଥା ମଧ୍ୟ ଚିନ୍ତା କରାଯାଉଛି।
