କୁନ୍ଦୁରା,୩୦।୧(ଡି.ଏନ୍.ଏ.) ଶହେ ପ୍ରତିଶତ ଭିନ୍ନକ୍ଷମ ବୋଲି ପ୍ରଶାସନ ପ୍ରମାଣପତ୍ର ଦେଇଛନ୍ତି। କିନ୍ତୁ ଏହା ସତ୍ତ୍ୱେ ଗୋରୀମଣିଙ୍କୁ ମିଳୁନି ଭତ୍ତା। ତାଙ୍କ ପରିବାରକୁ ଆବାସ ଯୋଜନାରେ ସାମିଲ କରାଯାଉ ନାହିଁ। ଅଭାବରେ ବୁଡ଼ି ଜରାଜୀର୍ଣ୍ଣ ଘରେ ପଡ଼ିରରହିଛନ୍ତି ଗୋରୀମଣି ଓ ତାଙ୍କ ପରିବାର।
କୋରାପୁଟ ଜିଲା କୁନ୍ଦୁରାରୁ ମାତ୍ର ୩ କି.ମି. ଦୂରରେ ରହିଛି ଝରିଗଁା। ସେଠାକାର ବାସିନ୍ଦା ଆଦିବାସୀ ପରଜା ସମ୍ପ୍ରଦାୟର ସେନାପତି ପରଜା (୫୦) ଓ ଧରମା ପରଜାଙ୍କ ଝିଅ ଗୋରୀମଣି (୧୯) ଦୃଷ୍ଟିହୀନ। କୁନ୍ଦୁରା, ଜୟପୁର ଓ କୋରାପୁଟରେ ଝିଅର ଆଖି ଚିକିତ୍ସା କରାଇବା ସହ ଥରେ ଅପରେଶନ ମଧ୍ୟ କରି ବିଫଳ ହୋଇଛନ୍ତି ସେନାପତି। ବର୍ତ୍ତମାନ ଗୋରୀମଣିଙ୍କୁ ଆଧାରକାର୍ଡ ଅନୁଯାୟୀ ୧୯ ବର୍ଷ ହୋଇଥିବାବେଳେ ଦେଖିପାରୁ ନ ଥିବା ଯୋଗୁ କିଛି କାମ କରିପାରୁ ନାହାନ୍ତି। ବୃଦ୍ଧ ପିତାମାତା ହିଁ କେବଳ ଏକମାତ୍ର ଭରସା। ଗୋରୀମଣିଙ୍କୁ ୫/୬ ବର୍ଷ ବୟସ ହୋଇଥିବା ଯାଏ ସେ ଅଳ୍ପ ଦେଖି ପାରୁଥିଲେ। ବର୍ତ୍ତମାନ ତାଙ୍କୁ ବିଲ୍କୁଲ୍ ଦେଖାଯାଉନି। କୁନ୍ଦୁରା ବ୍ଲକ କାର୍ଯ୍ୟାଳୟରେ ହୋଇଥିବା ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିରରେ ଗୋରୀମଣି ପରଜା ୧୦୦ ପ୍ରତିଶତ ଭିନ୍ନକ୍ଷମ ବୋଲି କୋରାପୁଟ ଜିଲା ଚିକିତ୍ସାଳୟର ଚକ୍ଷୁ ବିଶେଷଜ୍ଞଙ୍କ ଦ୍ୱାରା ରେଜିଷ୍ଟ୍ରେଶନ ନଂ. ୮ ଏବଂ ସିରିଏଲ୍ ନଂ.-୮ରେ ରୋଗ ଭିଜୁଆଲି ହାଣ୍ଡିକ୍ୟାପ୍ଡ ବୋଲି ୧୦ ସେପ୍ଟେମ୍ବର ୨୦୧୮ରେ ସାର୍ଟିଫିକେଟ ଦିଆଯାଇଛି। ସେହି ସାର୍ଟିଫିକେଟକୁ ଛାଡ଼ିଦେଲେ ପ୍ରଶାସନ ତାଙ୍କୁ ଟ୍ରେନ୍, ବସ୍ ପାସ କିମ୍ବା ଆଇଡି କାର୍ଡ ଦେଇନାହିଁ। ଦୀର୍ଘଦିନ ହେଲା ଭତ୍ତା ପାଇଁ ପଞ୍ଚାୟତ ଓ ବ୍ଲକ କାର୍ଯ୍ୟାଳୟର ଦ୍ୱାରସ୍ଥ ହୋଇଥିଲେ ମଧ୍ୟ ଗୋରୀମଣିଙ୍କ ଦୁଃଖ ଶୁଣୁନି ପ୍ରଶାସନ। ସରକାରୀ ନିୟମ ଅନୁଯାୟୀ ଦୃଷ୍ଟିହୀନଙ୍କୁ ଅନ୍ତ୍ୟୋଦୟ, ଅନ୍ନପୂର୍ଣ୍ଣା ଯୋଜନାରେ ସାମିଲ କରାଯିବା ସହ ୩୫ କେଜି ଚାଉଳ ଦିଆଯିବା କଥା। କିନ୍ତୁ ୫ କେଜି ଚାଉଳ ଦେଇ ଚୁପ୍ ବସିଛି ପ୍ରଶାସନ। ୩୦/୪୦ ବର୍ଷ ତଳର ମାଟି ତିଆରି ଚାଳଘର ଏବେ ଭାଙ୍ଗିବାକୁ ବସିଲାଣି। ସେହିଘରେ ୫ ପ୍ରାଣୀ କୁଟୁମ୍ବ ରହୁଛନ୍ତି। ସେମାନଙ୍କ ପରିବାରକୁ ଆବାସ ଯୋଜନାରେ ସାମିଲ କରାଯାଉ ନାହିଁ। ପ୍ରଶାସନ ଗୋରୀମଣିଙ୍କ ଚିକିତ୍ସା କରାଇବା ସହ ତାଙ୍କୁ ଭତ୍ତା ଓ ପରିବାରକୁ ଆବାସ ଦେବା ଲାଗି ସ୍ଥାନୀୟ ଲୋକେ ନିବେଦନ କରିଛନ୍ତି।
