ନୂଆଦିଲ୍ଲୀ, ୧୫।୬: ସାରା ଦେଶରେ ଗତ କିଛିଦିନ ହେବ କରୋନା ସଂକ୍ରମିତଙ୍କ ସଂଖ୍ୟା ହୁ ହୁ ହୋଇ ବଢ଼ିବାରେ ଲାଗିଛି। ଭାରତ ଏବେ ସର୍ବାଧିକ ସଂକ୍ରମଣ ତାଲିକାର ୪ର୍ଥ ସ୍ଥାନରେ ରହିଛି। ଏଠାରେ ମୃତ୍ୟୁସଂଖ୍ୟା ମଧ୍ୟ ବଢ଼ିବାରେ ଲାଗିଛି। ହେଲେ କେନ୍ଦ୍ର ସରକାର ସଂକ୍ରମଣ ଓ ମୃତ୍ୟୁକୁ ନେଇ ଯେଉଁ ତଥ୍ୟ ପ୍ରଦାନ କରୁଛନ୍ତି ତାହା ବାସ୍ତବତା ଠାରୁ ଭିନ୍ନ ଅଟେ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ବିଶ୍ୱର ଅନ୍ୟ ରାଷ୍ଟ୍ରଗୁଡ଼ିକରେ ଯେଉଁ ହାରରେ ଟେଷ୍ଟିଂ କରାଯାଉଛି, ଭାରତର ଜନସଂଖ୍ୟା ଅନୁସାରେ ବହୁତ୍ କମ୍ ଟେଷ୍ଟିଂ ହେଉଛି। ଏପରିକି କୋଭିଡ-୧୯ରେ ମୃତ୍ୟୁବରଣ କରୁଥିବା ଲୋକଙ୍କ ଠିକ୍ ତଥ୍ୟ ମଧ୍ୟ ପ୍ରଦାନ କରାଯାଉନାହିଁ। ଇତିମଧ୍ୟରେ ଦେଶରେ କରୋନା ଜନିତ ମୃତ୍ୟୁ ସଂଖ୍ୟା ୧୦ହଜାର ଟପିଲାଣି। ମହାରାଷ୍ଟ୍ରରେ ସର୍ବାଧିକ ୩,୭୧୭ଜଣଙ୍କ ମୃତ୍ୟୁ ଘଟିଥିବାବେଳେ, ଗୁଜରାଟରେ ୧,୩୮୫ ଏବଂ ଦିଲ୍ଲୀରେ ୧,୨୧୪ଜଣଙ୍କ ମୃତ୍ୟୁ ଘଟିଥିବା ରିପୋର୍ଟ ପ୍ରକାଶ ପାଇଛି। ହେଲେ ରାଜ୍ୟଗୁଡ଼ିକ କରୋନାଜନିତ ମୃତ୍ୟୁ ସଂଖ୍ୟା ଠିକ୍ଭାବେ ନ ଦେଇ ଅନେକ ମୃତ୍ୟୁର କାରଣ ଭିନ୍ନ ଭାବେ ଦର୍ଶାଉଥିବାରୁ କେନ୍ଦ୍ର ସରକାର ଠିକ୍ ରିପୋର୍ଟ ପ୍ରକାଶ କରିପାରୁ ନାହାନ୍ତି।
କୋଭିଡ-୧୯ ପାଇଁ ଗଠିତ କେନ୍ଦ୍ର ସରକାରଙ୍କ ରାପିଡ୍ ରେସ୍ପନ୍ସ ଟିମ୍ ଗତ ମାସରେ ପ୍ରତ୍ୟେକ ରାଜ୍ୟକୁ କୋଭିଡ-୧୯ ଜନିତ ମୃତ୍ୟୁର ଅଡିଟ କରିବା ପାଇଁ ପ୍ରସ୍ତାବ ଦେଇଥିଲେ। ହେଲେ ରାଜ୍ୟଗୁଡ଼ିକ ନିଜ ଢଙ୍ଗରେ ରିପୋର୍ଟ ପ୍ରଦାନ କଲେ। କରୋନା ଜନିତ ମୃତ୍ୟୁକୁ ଠିକ୍ଭାବେ ଉପସ୍ଥାପନ ନ କରି ଅନ୍ୟ ରୋଗ କାରଣରୁ ହୋଇଥିବା ମୃତ୍ୟୁ ରିପୋର୍ଟ ପ୍ରଦାନ କରିଛନ୍ତି। ପ୍ରଥମତଃ ଅନ୍ୟଦେଶ ତୁଳନାରେ ଭାରତର ଜନସଂଖ୍ୟା ଦୃଷ୍ଟିରୁ କମ୍ ଟେଷ୍ଟିଂ କରାଯାଉଛି, ଏପରି କି ଅନେକ କ୍ଷେତ୍ରରେ ମୃତ୍ୟୁ ସଂଖ୍ୟାକୁ ମଧ୍ୟ ଠିକ୍ ଭାବେ ଉପସ୍ଥାପନା କରାଯାଉ ନାହିଁ। ଦ୍ୱିତୀୟରେ ରାଜ୍ୟଗୁଡ଼ିକ ନିଜର କାର୍ଯ୍ୟଦକ୍ଷତାକୁ ଦେଖାଇବାକୁ ଯାଇ କରୋନାଜନିତ ଯେତିକି ମୃତ୍ୟୁ ଘଟୁଛି, ତା’ଠାରୁ କମ୍ ରିପୋର୍ଟ ପ୍ରଦାନ କରୁଛନ୍ତି ବୋଲି ସେଣ୍ଟର ଫର ଡିଜିଜ୍ ଡାଇନାମିକ୍ସ, ଇକୋନୋମିକ୍ସ ଆଣ୍ଡ ପଲିସିର ନିର୍ଦ୍ଦେଶକ ଲକ୍ଷ୍ମୀନାରାୟଣ ପ୍ରକାଶ କରିଛନ୍ତି। ଦେଶରେ କୋଭିଡ୍-୧୯ ଟେଷ୍ଟିଂରେ ବୃଦ୍ଧି ନ ଘଟିଥିଲେ ସୁଦ୍ଧା ଜୁନ୍ ମାସରେ କରୋନା ଜନିତ ମୃତ୍ୟୁସଂଖ୍ୟା ଦ୍ରୁତଗତିରେ ବଢ଼ିଛି। ଦେଶରେ ୧୦ଲକ୍ଷ ଜନସଂଖ୍ୟାରେ ମାତ୍ର ୩,୭୭୭ ଟେଷ୍ଟିଂ କରାଯାଉଛି। ଶୁକ୍ରବାର ଗୋଟିଏ ଦିନରେ ଭାରତରେ ସର୍ବାଧିକ ୩୯୭ଜଣଙ୍କ ମୃତ୍ୟୁ ଘଟିଥିଲା। ହେଲେ ତଥ୍ୟ ବାସ୍ତବତାଠାରୁ କମ୍ ବୋଲି ବିଶେଷଜ୍ଞମାନେ କହିଛନ୍ତି। ଯଦି ଜନସଂଖ୍ୟା ଆଧାରରେ ଟେଷ୍ଟିଂ କରାଯିବ ତେବେ ସଂକ୍ରମିତଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇବ ବୋଲି କୁହାଯାଉଛି।