ସାଧାରଣତଃ ଲୋକମାନେ ବେଳେବେଳେ ଖବରକାଗଜରେ ଖାଇଥା’ନ୍ତି। ଅଥବା ଆଜିକାଲି ଦୋକାନୀମାନେ ଖବରକାଗଜ ଠୁଙ୍ଗାରେ ଖାଦ୍ୟପଦାର୍ଥ ଗ୍ରାହକଙ୍କୁ ଦେଉଛନ୍ତି। ଏହା ସ୍ବାସ୍ଥ୍ୟପକ୍ଷେ କ୍ଷତିକାରକ। ଏହାଦ୍ୱାରା ଗମ୍ଭୀର ସମସ୍ୟା ଦେଖାଯାଇଥାଏ।
ପ୍ରାୟତଃ ରାସ୍ତାକଡ଼ ଦୋକାନଗୁଡ଼ିକରେ ପେପରରେ ଖାଇବାକୁ ଦିଆଯାଇଥାଏ। ମାତ୍ର ଏପରି କରିବା କଥା ନୁହେଁ। ବିଶେଷକରି ଗରମ ଖାଦ୍ୟକୁ ପେପରରେ ରଖିବା ଆଦୌ ଉଚିତ ନୁହେଁ। କାରଣ କାଗଜରେ ପ୍ରିଣ୍ଟିଂ ସ୍ୟାହି ବ୍ୟବହାର କରାଯାଇଥାଏ। ଏହା ଉକ୍ତ ଖାଦ୍ୟରେ ଲାଗିଥାଏ। ଫଳରେ ଆମେ ଖାଇବା ପରେ ତାହା ପେଟକୁ ଯାଇ ରୋଗ ସୃଷ୍ଟି କରିଥାଏ। ପେଟ ଖରାପ ଓ ଇନ୍ଫେକ୍ଶନ ମଧ୍ୟ ହୋଇଥାଏ।
ଛୋଟ ପିଲାଙ୍କୁ ପେପରରେ ଖାଇବାକୁ ଦେବା ଅନୁଚିତ। ଏହା ସେମାନଙ୍କ ଶାରୀରିକ ବିକାଶରେ ବାଧା ସୃଷ୍ଟି କରିଥାଏ। ଯଦିଓ କୌଣସି କାରଣବଶତଃ ଏହି ସ୍ୟାହି ପେଟକୁ ଯାଇଥାଏ, ତେବେ ମୁଖ କ୍ୟାନ୍ସର ଓ ପେଟ କ୍ୟାନ୍ସର ହେବାର ଆଶଙ୍କା ଦେଖାଯାଇଥାଏ।
୨୦୧୬ରେ ଦେଶର ଖାଦ୍ୟ ସୁରକ୍ଷା ନିୟାମକ ଏଫ୍ଏସ୍ଏସ୍ଏଆଇ ମଧ୍ୟ ଏହାକୁ କ୍ଷତିକାରକ କହିବା ସହ ଖବରକାଗଜରେ ଖାଉଥିବା ଖାଦ୍ୟ ଶରୀରକୁ କ୍ୟାନ୍ସର ଭଳି କ୍ଷତିକାରକ ତତ୍ତ୍ୱ ପହଞ୍ଚାଇଥାଏ ବୋଲି କହିଥିଲେ। ଫୁଡ୍ ସେଫ୍ଟି ଅଥରିଟିଙ୍କ କହିବା ଅନୁଯାୟୀ, ଖବରକାଗଜରେ ବ୍ୟବହୃତ ଏହି ସ୍ୟାହି ଶରୀର ପକ୍ଷେ ଅଧିକ କ୍ଷତିକାରକ ହୋଇଥାଏ। ଏହା ପେଟକୁ ଯିବା ଦ୍ୱାରା ଦୃଷ୍ଟିଶକ୍ତି ହ୍ରାସ ସହ ପାଚନତନ୍ତ୍ରର କ୍ଷତି, ହର୍ମୋନାଲ ସନ୍ତୁଳନ ବିଗିଡିଯିବାର ମଧ୍ୟ ଆଶଙ୍କା ରହିଥାଏ।
