ଓ୍ବାଶିଂଟନ,୨୩।୪: ଏପ୍ରିଲ୍ ୨୯ରେ ପୃଥିବୀ ସହିତ ଗ୍ରହାଣୁପିଣ୍ଡ ୧୯୯୮-ଓଆର୍-୨(୫୨୭୬୮) ଧକ୍କା ଦେବ ବୋଲି କେତେକ ଗୁଜବ କରୁଛନ୍ତି। ତେବେ ଏହା ମିଛ ବୋଲି ନାସାର ମହାକାଶବିଜ୍ଞାନୀ ମତ ଦେଇଛନ୍ତି। ଲକ୍ଷ ଲକ୍ଷ ବର୍ଷ ତଳେ ଏଭଳି ଏକ ଗ୍ରହାଣୁପିଣ୍ଡ ପୃଥିବୀକୁ ଧକ୍କା ଦେଇଥିଲା। ଏହାଯୋଗୁ ପୃଥିବୀରେ ଡାଏନୋସୋରସ୍ ବଂଶ ଧ୍ୱଂସ ହୋଇଯାଇଥିଲା। ଏବେ ଏହାର ପୁନରାବୃର୍ତ୍ତି ହେବ ବୋଲି ଗୁଜବ ସୋସିଆଲ ମିଡ଼ିଆରେ ସୃଷ୍ଟି ହୋଇଥିଲା। ଏହି ୪.୧ କିଲୋମିଟର ବ୍ୟାସ ବିଶିଷ୍ଟ ଏଭରେଷ୍ଟ ଶୃଙ୍ଗ ଆକାରର ଏହି ଗ୍ରହାଣୁପିଣ୍ଡ ପୃଥିବୀକୁ ପ୍ରାୟ ୩.୯ ନିୟୁତ ମାଇଲ୍ ଦୂରରେ ଭାରତୀୟ ସମୟ ଭୋର୍ ୪ଟା ୫୬ରେ ଅତିକ୍ରମ କରିବ। ଏହି ସମୟରେ ଏହାର ଘଣ୍ଟାପ୍ରତି ବେଗ ୩୧୩୨୦ କିଲୋମିଟର ରହିବ। ତେବେ ୫୯ ବର୍ଷ ପରେ ୨୦୭୯ ଏପ୍ରିଲ ୧୬ରେ ଏହା ମାତ୍ର ଏକ ନିୟୁତ ମାଇଲ୍ ଦୂରରେ ପୃଥିବୀକୁ ଅତିକ୍ରମ କରିବ। ଏହାଯୋଗୁ ସେତେବେଳେ ହୁଏତ ସଙ୍କଟ ସୃଷ୍ଟି ହୋଇପାରେ। ଏହି ଗ୍ରହାଣୁପିଣ୍ଡ ୧୩୪୪ ଦିନରେ ଥରେ ସୂର୍ଯ୍ୟକୁ ପରିକ୍ରମଣ କରିଥାଏ। ପୃଥିବୀ ସହିତ କୌଣସି ଗ୍ରହାଣୁପିଣ୍ଡ ଧକ୍କା ହେବା ଘଟଣା ପ୍ରାୟ ୨୦ ନିୟୁତ ବର୍ଷରେ ଥରେ ଘଟିଥାଏ ବୋଲି ମହାକାଶ ବିଜ୍ଞାନୀ କହିଛନ୍ତି।
