ବଅଁରପାଳ, ୨୭ା୯(ଡି.ଏନ.ଏ.)-ପୂଜା ପର୍ବ ପର୍ବାଣି ହେଉ ବା ଯାତ୍ରା, ମନୋରଞ୍ଜନ କଥା ଉଠିଲେ ଆଗକୁ ଆସେ ଗୋକୁଳା ପଟେଲଙ୍କ ନାଁ। ଯେ କୌଣସି ପୂଜା ହେଲେ ପୂଜା କମିଟି ପକ୍ଷରୁ ସେ ଖୋଜାପଡନ୍ତି। ବିଭିନ୍ନ ମଣ୍ଡପରେ ଦୀର୍ଘ ୪ରୁ ୫ ଘଣ୍ଟା ଧରି ଅବିକଳ ମୂର୍ତ୍ତି ପରି ସ୍ଥିର ଭାବେ ଛିଡା ହୋଇ ସେ ଲୋକଙ୍କ ମନୋରଞ୍ଜନ କରନ୍ତି। ଏହି କଳା ତାଙ୍କୁ ଏକ ନିଆରା ପରିଚୟ ଦେଇଥିବାବେଳେ ଭଲ ଦୁଇ ପଇସା ମଧ୍ୟ ଏଥିରୁ ରୋଜଗାର କରିପାରନ୍ତି ବୋଲି ସେ କୁହନ୍ତି। ନିକଟରେ ଅନୁଗୋଳ ଜିଲା ନାଲ୍କୋନଗରଠାରେ ପ୍ରସିଦ୍ଧ ବିଶ୍ୱକର୍ମା ପୂଜାରେ କଳା ପ୍ରଦର୍ଶନ କରିବାକୁ ତାଙ୍କୁ ଡାକରା ପଡିଥିଲା। ଆଉ ସେ ମଧ୍ୟ କାହାକୁ ନିରାଶ ନ କରି ଦର୍ଶକଙ୍କ ବେଶ୍ ମନୋରଞ୍ଜନ କରିଥିଲେ।
ଗୋକୁଳାଙ୍କ ନିଜ ଘର ବଲାଙ୍ଗୀର ସହରରେ। ବୟସ ପ୍ରାୟ ୫୦ ହେବ। ବଲାଙ୍ଗୀରଠାରେ ଥିବା ଏକ ଘରୋଇ କମ୍ପାନୀରେ ସେ ଚାକିରି କରନ୍ତି। ହେଲେ ତାଙ୍କ କଳା ତାଙ୍କୁ କୌଣସି ଗୋଟିଏ କାର୍ଯ୍ୟରେ ସୀମିତ ରଖିପାରିନି। ଡାକରା ପାଇଲା ମାତ୍ରେ ସେ କାମ ଛାଡି ଚାଲିଆସନ୍ତି। ବିଭିନ୍ନ ପୂଜା କମିଟିର ମଣ୍ଡପ ଆଗରେ ବିଭିନ୍ନ ବେଶ ହୋଇ ଷ୍ଟାଚ୍ୟୁ ପରି ୪ରୁ ୫ ଘଣ୍ଟା ସ୍ଥିର ହୋଇଛିଡା ହୋଇ ରହିଥାନ୍ତି। କେତେବେଳେ ମହାତ୍ମା ଗାନ୍ଧୀଙ୍କ ଭଳି ମହାପୁରୁଷଙ୍କ ବେଶରେ ତ କେତେବେଳେ ବିଭିନ୍ନ ଠାକୁରଙ୍କ ବେଶରେ ସଜେଇ ହୋଇ ଦର୍ଶକଙ୍କ ମନୋରଞ୍ଜନ କରନ୍ତି। ଦିଲ୍ଲୀ, ମହାରାଷ୍ଟ୍ର, କଟକ ବାଲିଯାତ୍ରା, କଲିକତାର କାଳୀ ପୂଜା, ଢେଙ୍କାନାଳର ଲକ୍ଷ୍ମୀପୂଜା, ନାଲକୋର ବିଶ୍ୱକର୍ମା ପୂଜା, ସମ୍ବଲପୁରର ଶୀତଳ ଷଷ୍ଠୀ ଭଳି ବଡ ତଥା ପ୍ରସିଦ୍ଧ ପୂଜାରେ ଷ୍ଟାଚ୍ୟୁ ହେବାକୁ ତାଙ୍କୁ ଖୋଜାଯାଏ। ଏଥିପାଇଁ ପୂର୍ବରୁ ଏ ବାବଦରେ ବଇନା (ଟଙ୍କା) ମଧ୍ୟ ଦିଆଯାଏ। ଏ ସମ୍ପର୍କରେ ଗୋକୁଳା କୁହନ୍ତି, ଷ୍ଟାଚ୍ୟୁ ହୋଇ ଲୋକଙ୍କ ମନୋରଞ୍ଜନ କରିବା ତାଙ୍କର ବେଶ୍ ପସନ୍ଦ। ବେଳେବେଳେ ଲୋକେ ଷ୍ଟାଚ୍ୟୁ ଅସଲି କି ନକଲି ଜାଣିବା ପାଇଁ ଦେହରେ କଣ୍ଟା ଭଳି ଜିନିଷ ମଧ୍ୟ ଫୋଡି ଦେଇଥାନ୍ତି। ଆଉ କେତେ ଲୋକ ପାଖକୁ ଆସି ମୂର୍ତ୍ତି ଭଳି ଛିଡା ହୋଇଥିବା ସମୟରେ ହଲାଇବାକୁ ଉଦ୍ୟମ କରି ମଜା ଉଠାଇଥାନ୍ତି। ହେଲେ ସବୁ ବାଧା ସହି ମଧ୍ୟ ୪/୫ ଘଣ୍ଟା ପର୍ଯ୍ୟନ୍ତ ସ୍ଥିର ହୋଇ ସେ ରହିପାରନ୍ତି। ଏଥିପାଇଁ ବିଭିନ୍ନ ଅନୁଷ୍ଠାନ ପକ୍ଷରୁ ତାଙ୍କୁ ପୁରସ୍କାର ଓ ମାନପତ୍ର ପ୍ରଦାନ
