ପୁରୁଷୋତ୍ତମପୁର, ୭।୧୧(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁରରେ ଏସ୍ଡିପିଓ ଭାବେ ୨୦୧୫ ବ୍ୟାଚର ଓପିଏସ୍ ପାଇଥିବା ଅଫିସର ସୀମା ସ୍ବାଇଁ ଗୁରବାର କାର୍ଯ୍ୟରେ ଯୋଗ ଦେଇଛନ୍ତି । ଟ୍ରେନିଂସାରବା ପରେ ପ୍ରଥମେ ସେ ଏଠାରୁ କାର୍ଯ ଆରମ୍ଭ କରୁଛନ୍ତି। ୧୯୩୬ ମସିହାରେ ପୁରୁଷୋତ୍ତମପୁରରେ ଥାନା ପ୍ରତିଷ୍ଠା ହେବାଠାରୁ ଏବଂ ୨୦୧୬ରୁ ଏସ୍ଡିପିଓ ଅଫିସ ପ୍ରତିଷ୍ଠା ପରଠାରୁ କେହିହେଲେ ମହିଳା ଅଧିକାରୀ ଏଠାରେ ଯୋଗଦେଇ ନ ଥିଲେ। ପୁରୁଷୋତ୍ତମପୁର ପାଇଁ ପୋଲିସ ବିଭାଗରେ ସୀମା ହେଉଛନ୍ତି ପ୍ରଥମ ମହିଳା ଅଧିକାରୀ। କାର୍ଯ୍ୟରେ ଯୋଗଦାନ ପରେ ସୀମା କହିଛନ୍ତି ଯେ ମହିଳା, ଶିଶୁ ଓ ବରିଷ୍ଠ ନାଗରିକଙ୍କୁ ସୁରକ୍ଷା ଦେବା ମୋର ପ୍ରଥମ ଲକ୍ଷ୍ୟ। ଏହା ସହ ଗରିବ ନିଷ୍ପେଶିତ, ଅବହେଳିତ ଅବସ୍ଥାରେ ଥିବା ଲୋକଙ୍କୁ ସାହାଯ୍ୟ କରିବା, ମୋ ସରକାର ମାଧ୍ୟମରେ ଜନସାଧାରଣଙ୍କ ସହ ପୋଲିସ ସୁସମ୍ପର୍କ ରକ୍ଷାକରି ଲୋକଙ୍କ ନିକଟତର ହୋଇ କାର୍ଯ୍ୟ କରିବା, ଥାନାକୁ ଆସୁଥିବା ଲୋକଙ୍କୁ ଉତ୍ତମ ବ୍ୟବହାର କରିବା ଓ ଯଥାଶୀଘ୍ର ସେବା ଯୋଗାଇବା ସହ ଅଞ୍ଚଳରୁ ଅପରାଧୀ ହଟାଇବା ପ୍ରଥମ କର୍ତ୍ତବ୍ୟ ହେବ ବୋଲି ସେ କହିଛନ୍ତି। ପୂର୍ବରୁ ଏଠାରେ ଥିବା ଏସ୍ଡିପିଓ ନିମାଇଁ ଚରଣ ସେଠୀଙ୍କ ସାଲେପୁର ବଦଳି ହୋଇଛି ।
