ଖୋର୍ଦ୍ଧା ଅଫିସ,୧୬।୪: ଖୋର୍ଦ୍ଧା ଆର୍ଦଶ ଥାନା ଜାତୀୟ ରାଜପଥ ପୁବୁ ସାହି ନିକଟ ଶଙ୍ଖ ତଳୁ ପୋଲିସ ଗୁରୁବାର ଜଣେ ବୃଦ୍ଧଙ୍କ ମୃତଦେହ ଉଦ୍ଧାର କରିଛି। ମୃତକ ହେଲେ ଗଗନ ବିହାରୀ ବେହେରା(୬୦)। ତେବେ ତାଙ୍କୁ କେହି ହତ୍ୟା କରି ଶଙ୍ଖ ତଳକୁ ଫିଙ୍ଗି ଦେଇଥିବା ପୋଲିସ ପ୍ରାଥମିକ ଅନସନ୍ଧାନରୁ ଜାଣିବାକୁ ପାଇଛି। ମୃତକଙ୍କ ସାନପୁଅ ଯୋଗେଶ ହତ୍ୟା ଅଭିଯୋଗ କରିଛନ୍ତି। ଏହି ଘଟଣାରେ ପୋଲିସ ଜଣଙ୍କୁ ଥାନାରେ ଅଟକ ରଖି ପଚରାଉଚୁରା କରୁଛି।
ମିଳିଥିବା ସୂଚନା ଅନୁଯାୟୀ, କିଛି ଲୋକ ଭୋର ସମୟରେ ଶଙ୍ଖ ତଳେ ସ୍କୁଟି ସହ ଏକ ମୃତଦେହ ପଡ଼ିଥିବା ଦେଖିବାକୁ ପାଇଥିଲେ। ସେମାନେ ଏନେଇ ପୋଲିସକୁ ଖବର ଦେଇଥିଲେ। ଖବରପାଇ ଅତିରିକ୍ତ ଏସ୍ପି(ହେଡ କ୍ବାଟର) କେ.ବି. ଜେନା, ଏସ୍ଡିପିଓ ସୁଶିଲ ମିଶ୍ର, ଆଦର୍ଶ ଥାନା ଅଧିକାରୀ ଉମାଶଙ୍କର ସିଂ, ଆଡିସିନାଲ ଆଇଆଇସି ଏ.କେ.ନନ୍ଦ ପ୍ରମୁଖ ପହଞ୍ଚିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ମୁଖ୍ୟ ଚିକିତ୍ସାଳୟକୁ ପଠାଇଥିଲା। ମୃତଦେହ ନିକଟରୁ ପୋଲିସ ଉକ୍ତ ସ୍କୁଟିକୁ ମଧ୍ୟ ଜବତ କରିଛି। ତେବେ ପାରିବାରିକ ଅଶାନ୍ତିରୁ ଗଗନ ନୂଆଗାଁ ସ୍ଥିତ ଏକ ମଠରେ ଗତ କିଛି ବର୍ଷ ହେଲା ରହୁଥିବା ଜଣାପଡ଼ିଛି।
