ନୂଆଦିଲ୍ଲୀ,୨୭। ୩: ଲକ୍ଡାଉନ ସମୟରେ ଦେଶର ୮୦ କୋଟି ରାଶନକାର୍ଡଧାରୀ ଯେଭଳି କେହି ଭୋକିଲା ନ ରୁହନ୍ତି ତାକୁ ଧ୍ୟାନରେ ରଖି ସରକାର ଗୁରୁବାର ଅତିରିକ୍ତ ପଦକ୍ଷେପ ଗ୍ରହଣ କରିଛନ୍ତି। ବ୍ୟକ୍ତିପିଛା ଅତିରିକ୍ତ ୫ କିଲୋ ଖାଦ୍ୟଶସ୍ୟ ଏବଂ ପରିବାର ପିଛା ଏକ କିଲୋ ଡାଲି ଆଗାମୀ ୩ ମାସ ଯାଏ ପ୍ରଦାନ କରାଯିବ ବୋଲି କେନ୍ଦ୍ର ସରକାର କହିଛନ୍ତି। ଜାତୀୟ ଖାଦ୍ୟ ସୁରକ୍ଷା ଆଇନ ଅନ୍ତର୍ଗତ ହିତାଧିକାରୀ ଏବେ ଯେତେ ପରିମାଣର ସବସିଡି ଖାଦ୍ୟଶସ୍ୟ ଲାଭ କରୁଛନ୍ତି ତାଠାରୁ ଅତିରିକ୍ତ ଭାବେ ଲୋକଙ୍କୁ ସାମଗ୍ରୀ ପ୍ରଦାନ କରାଯିବ। ଏବେ ଲୋକମାନେ ସବସିଡି ଦରରେ କିଲୋ ପିଛା ୨ ଟଙ୍କା ଦାମରେ ଗହମ ଏବଂ କିଲୋ ପ୍ରତି ୩ ଟଙ୍କାରେ ଚାଉଳ ପାଇ ପାରୁଛନ୍ତି। ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ଲୋକଙ୍କୁ ଏହି ସୁବିଧା ସୁଯୋଗ ପ୍ରଦାନ କରାଯିବ। ଦେଶର ୮୦ କୋଟି ଗରିବ ଲୋକଙ୍କୁ ଆଗାମୀ ୩ ମାସ ଯାଏ ଅତିରିକ୍ତ ୫ କିଲୋ ଖାଦ୍ୟଶସ୍ୟ ପବ୍ଲିକ ଡିଷ୍ଟ୍ରିବ୍ୟୁଶନ ସିଷ୍ଟମରେ ପ୍ରଦାନ କରାଯିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଛନ୍ତି। ଲୋକମାନେ ସେମାନଙ୍କ ଆବଶ୍ୟକତା ମୁତାବକ ଡାଲି ଚୟନ କରିପାରିବେ। ୨ଟି କିସ୍ତିରେ ରାଶନକାର୍ଡଧାରୀମାନେ ଏହି ଖାଦ୍ୟଶସ୍ୟ ନେଇ ପାରିବେ। ସରକାରୀ ତଥ୍ୟ ମୁତାବକ ଭାରତୀୟ ଖାଦ୍ୟ ନିଗମ(ଏଫ୍ସିଆଇ) ନିକଟରେ ୫୮.୪୯ ଲକ୍ଷ ଟନର ଖାଦ୍ୟ ଶସ୍ୟ ରହିଛି। ଏହା ମଧ୍ୟରେ ୩୦.୯୭ ଲକ୍ଷ ଟନ୍ ଚାଉଳ ରହିଥିବା ବେଳେ ୨୭.୫୨ ଲକ୍ଷ ଟନ୍ ଗହମ ରହିଛି।
କରୋନା ପ୍ରଭାବକୁ କମ୍ କରିବା ଲାଗି ସାରା ଦେଶରେ ଏବେ ଲକ୍ଡାଉନ ଘୋଷଣା କରାଯାଇଛି। ଏହା ଦ୍ୱାରା ଦେଶର ବିଭିନ୍ନବର୍ଗ ଲୋକ କ୍ଷତିଗ୍ରସ୍ତ ହୋଇଛନ୍ତି। ବିଶେଷ କରି ଗରିବ ଲୋକଙ୍କ ସହାୟତା କରିବା ଲାଗି ସରକାର ଗୁରୁବାର ୧.୭ ଲକ୍ଷ କୋଟି ଟଙ୍କାର ସହାୟତା ପ୍ୟାକେଜ ଘୋଷଣା କରିଛନ୍ତି। ଲକ୍ଡାଉନ ପରଠାରୁ କଟକଣା ବଢାଯାଇଛି। ଗରିବ ଲୋକ ଏବଂ ଶ୍ରମିକ ଶ୍ରେଣୀ ଯେଭଳି ଅସୁବିଧା ସାମ୍ନା ନ କରନ୍ତି ତାକୁ ଧ୍ୟାନରେ ରଖି ସରକାର ପ୍ୟାକେଜ ଘୋଷଣା କରିଛନ୍ତି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ ଏକ ଖବରଦାତା କାର୍ଯ୍ୟକ୍ରମରେ ସୂଚନା ଦେଇଛନ୍ତି। ବର୍ତ୍ତମାନ ଘୋଷଣା ହୋଇଥିବା ୨୧ ଦିନିଆ ଲକ୍ଡାଉନ ସମୟରେ ଯେଭଳି କେହି ଭୋକିଲା ନ ରହି ଯାନ୍ତି ତାକୁ ସରକାର ଧ୍ୟାନରେ ରଖିଛନ୍ତି। ଖାଦ୍ୟ ଏବଂ ଅର୍ଥ ଯେଭଳି ଲୋକଙ୍କ ନିକଟରେ ପହଞ୍ଚିବ ତାକୁ ସରକାର ଗୁରୁତ୍ୱ ଦେଇଛନ୍ତି। ସରକାର ଅନ୍ୟ ଦିଗଗୁଡିକୁ ମଧ୍ୟ ଧ୍ୟାନରେ ରଖିଛନ୍ତି ବୋଲି ସୀତାରାମନ କହିଛନ୍ତି।
