ଭୁବନ, ୧।୪(ଡି.ଏନ.ଏ.) – କରୋନା ପାଇଁ ଲକ୍ଡାଉନ୍ରେ ସାରା ଦେଶ। ଏଥିରେ ସର୍ବାଧିକ ପ୍ରଭାବିତ ହୋଇଛନ୍ତି ଗରିବ ଖଟିଖିଆ ଏବଂ ଦିନ ମଜୁରିଆ। ହାତରେ କାମ ନାହିଁ। ପାଖରେ ପଇସା ନାହିଁ। ସକାଳ ହେଲେ ଘାରୁଛି ଖାଇବା ଚିନ୍ତା। ଯାନବାହନ ଚଳଚଳ ବନ୍ଦ ହୋଇଯାଇଥିବାରୁ ଘରକୁ ଫେରିବା ବାଟ ବି ବନ୍ଦ। ବିକଳ୍ପ ନ ଥିବାରୁ ବିଭିନ୍ନ ସ୍ଥାନରେ ଫସି ରହିଥିବା ଶ୍ରମଜୀବୀମାନେ ଏବେ ପାଦରେ ଚାଲି ଚାଲି ଘରକୁ ବାହୁଡ଼ିବା ଆରମ୍ଭ କରିଛନ୍ତି। ବାଲେଶ୍ୱର ଇଟାଭାଟିରେ କାମ କରୁଥିବା ଜଣେ ଶ୍ରମିକ କଟକସ୍ଥିତ ନିଜ ଘରକୁ ଆସିବାକୁ ଦୀର୍ଘ ୧୫୦ କିମି ଚାଲିବା ଏବଂ ଶେଷରେ ଭୁବନରୁ ସଂଜ୍ଞାହୀନ ଅବସ୍ଥାରେ ଉଦ୍ଧାର ହେବା ଲକ୍ଡାଉନ୍ ସମୟର ଦୁଃଖଦ ଚିତ୍ରକୁ ପଦାକୁ ଆଣିଛି। ଉଦ୍ଧାର ହୋଇଥିବା ଶ୍ରମିକ ଜଣକ ହେଲେ କଟକ ଲିଙ୍କ୍ ରୋଡ୍ରେ ରହୁଥିବା ହୃଷୀକେଶ ସାହୁଙ୍କ ପୁଅ ବାପି (୨୨)। ତାଙ୍କୁ ଭୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।
ଚେତା ଫେରିବା ପରେ ବାପି କହିଛନ୍ତି ଯେ, ସେ ବାଲେଶ୍ୱରରେ ରହି ଏକ ଇଟାଭାଟିରେ ଶ୍ରମିକ ଭାବେ କାର୍ଯ୍ୟ କରୁଥିଲେ। ଲକ୍ଡାଉନ ଘୋଷଣା ହେବା ପରେ କାମ ବନ୍ଦ ହୋଇଯାଇଥିଲା। ଏହାପରେ ୪ଦିନ ହେଲା ସେ ଚାଲି ଚାଲି ଘରକୁ ଫେରୁଥିଲେ। ସେ ଯାଜପୁର ଜିଲା ପାଣିକୋଇଲି ଦେଇ କଟକ ଯିବାର ଥିଲା। ସୋମବାର ସେ ପାଣିକୋଇଲିରେ ପହଞ୍ଚତ୍ଥିଲେ। ତେବେ ଖାଦ୍ୟପାନୀୟ ଅଭାବରୁ ତାଙ୍କର ଭ୍ରମ ସୃଷ୍ଟି ହୋଇଥିଲା। ସେ ଭୁଲ ବାଟରେ ଯାଜପୁର-ଢେଙ୍କାନାଳ ସୀମାନ୍ତ ଅଞ୍ଚଳକୁ ଚାଲି ଆସିଥିଲେ। ସୁକିନ୍ଦା ଥାନା ମଙ୍ଗଳପୁରରେ ପହଞ୍ଚତ୍ବା ପରେ କେତେଜଣ ଲୋକ ତାଙ୍କୁ ସହାୟତାର ହାତ ବଢ଼ାଇଥିଲେ। ଖାଇବା ପିଇବାକୁ ଦେଇଥିଲେ। ଏହାପରେ କଟକ ଯିବାକୁ ରାସ୍ତା ବତାଇଥିଲେ। ୫୩ନଂ. ଜାତୀୟ ରାଜପଥ ଭୁବନ-କାମାକ୍ଷାନଗର ରାସ୍ତାରେ ଆସୁଥିବାବେଳେ ମଧ୍ୟାହ୍ନ ବେଳକୁ ସେ ଏନ୍ଏସି କାର୍ଯ୍ୟାଳୟ ନିକଟରେ ଚେତାଶୂନ୍ୟ ହୋଇ ପଡ଼ିଯାଇଥିଲେ। ରାସ୍ତା ଫାଙ୍କା ଥିବାରୁ ଏହି ଘଟଣା କାହାରି ନଜରକୁ ଆସି ନ ଥିଲା। ସନ୍ଧ୍ୟାରେ କେତେଜଣ ଆମ୍ବୁଲାନ୍ସ କର୍ମଚାରୀ ତାଙ୍କୁ ଉଦ୍ଧାର କରି ମେଡିକାଲକୁ ଆଣିଥିଲେ। ଅଚେତ ଅବସ୍ଥାରେ ପଡ଼ିଥିବାବେଳେ ତାଙ୍କ ଫୋନ୍ କେହି ନେଇଯାଇଛନ୍ତି। ଘରକୁ ଯୋଗାଯୋଗ ହୋଇପାରୁ ନ ଥିବା ବାପି କହିଛନ୍ତି। ଅନ୍ୟପଟେ ପ୍ରାଥମିକ ଚିକିତ୍ସା ପରେ ସେ ସୁସ୍ଥ ଥିବା ଡାକ୍ତରଖାନା ପକ୍ଷରୁ ସୂଚନା ଦିଆଯାଇଛି।
ଏ ନେଇ ନିର୍ବାହୀ ଅଧିକାରୀ ପ୍ରମୋଦ କୁମାର ବରାଳ କୁହନ୍ତି, ଏନ୍ଏସି ପକ୍ଷରୁ ଉଦ୍ଧାର ଶ୍ରମିକଙ୍କ ଖାଇବା, ରହିବା ବ୍ୟବସ୍ଥା କରାଯାଇଛି। ସମ୍ପୃକ୍ତ ଶ୍ରମିକ ଜଣକ ଡାକ୍ତରଖାନାରୁ ଡିସ୍ଚାର୍ଜ ହେବାପରେ ଆଶ୍ରୟସ୍ଥଳୀରେ ରହିପାରିବେ। ଆବଶ୍ୟକ ପଡ଼ିଲେ ତାଙ୍କୁ ଘରକୁ ପଠାଯିବା ବ୍ୟବସ୍ଥା କରାଯିବ।
