ବାରିପଦା ଅଫିସ, ୧୮ା୨- ଗ୍ରୀଷ୍ମ ଆରମ୍ଭ ନ ହେଉଣୁ ବାରିପଦା ସହରର ବିଭିନ୍ନ ସ୍ଥାନରେ ଜଳକଷ୍ଟ ସମସ୍ୟା ଦେଖାଗଲାଣି। ଜନସ୍ବାସ୍ଥ୍ୟ ବିଭାଗ ପକ୍ଷରୁ ଜଳଯୋଗାଣ ବ୍ୟବସ୍ଥା ଥିଲେ ମଧ୍ୟ ଏହା ଠିକ୍ ଭାବେ କାର୍ଯ୍ୟକ୍ଷମ ହୋଇ ନ ଥିବାରୁ ଲୋକମାନେ ପାଣି ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ୩ ମାସ ହେବ ପାଇପ୍ ଯୋଗେ ଅଳ୍ପ ଅଳ୍ପ ଜଳ ଆସୁଥିବା ବେଳେ ୮ ଦିନ ହେଲା ଜଳଯୋଗାଣ ସମ୍ପୂର୍ଣ୍ଣ ବନ୍ଦ ରହିଛି। ଏହାର ପ୍ରତିବାଦରେ ସୋମବାର ୧୩ ନମ୍ବର ୱାର୍ଡ଼ ଶ୍ରୀପଦଗଞ୍ଜ ସାହିବାସିନ୍ଦା ଷ୍ଟେଶନ ରୋଡ଼ଠାରେ ଧାରଣାରେ ବସିବା ସହ ରାସ୍ତାରୋକୋ କରିଥିଲେ। ସକାଳ ୭ଟା ୩୦ ମିନିଟ୍ରେ ମହିଳାମାନେ ବାଲଟି, ଗରା ଧରି ରାସ୍ତାରୋକୋ କରିଥିବା ବେଳେ ପୁରୁଷମାନେ ଟାୟାର ଜାଳି ରାସ୍ତାରୋକୋ କରିଥିଲେ। ଫଳରେ ଉକ୍ତ ରାସ୍ତାରେ ଯାତାୟାତ ବାଧାପ୍ର୍ରାପ୍ତ ହୋଇଥିଲା। ଖବର ପାଇ ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରିଥିଲେ ମଧ୍ୟ ଧାରଣାକାରୀମାନେ ସେମାନଙ୍କ ଜିଦରେ ଅଟଳ ରହିଥିଲେ। ପୂର୍ବାହ୍ନ ୧୧ଟା ୩୦ରେ ପ୍ରଶାସନିକ ଅଧିକାରୀମାନେ ପହଞ୍ଚି ଲୋକଙ୍କୁ ବୁଝାଶୁଝା କରିବା ସହିତ ସାହିରେ ଟ୍ୟାଙ୍କର ଯୋଗେ ପାଣି ଯୋଗାଇ ଦିଆଯାଇଥିଲା। ସୋମବାର ସନ୍ଧ୍ୟା ସୁଦ୍ଧା ଏହାର ସମାଧାନ ହୋଇଯିବ ବୋଲି ଅଧିକାରୀମାନେ ପ୍ରତିଶ୍ରୁତି ଦେବା ପରେ ମହିଳାମାନେ ରାସ୍ତାରୋକୋ ପ୍ରତ୍ୟାହାର କରିଥିଲେ।
ଉଲ୍ଲେଖଯୋଗ୍ୟ ଯେ, ସହରର ୧୧, ୧୨ ଓ ୧୩ ନମ୍ବର ୱାର୍ଡ଼ରେ ଜନସ୍ବାସ୍ଥ୍ୟ ବିଭାଗ ପକ୍ଷରୁ ଜଳଯୋଗାଣ କରାଯାଉଛି। ଜଳ ଯୋଗାଣ ଦାୟିତ୍ୱରେ ଥିବା କର୍ମଚାରୀଙ୍କ ଦାୟିତ୍ୱହୀନତା ଯୋଗୁ ସମସ୍ତ ପାଣି ନାଳକୁ ଚାଲି ଯାଉଛି। ସକାଳ ହେଲେ ଆଉ ପାଇପ ଯୋଗେ ପାଣି ଯାଉନାହିଁ। ଏହିଭଳି ଭାବେ ୮ ଦିନ ହେଲାଣି ୱାର୍ଡବାସୀ ଜଳ ସମସ୍ୟାର ସମ୍ମୁଖୀନ ହେଉଛନ୍ତି। ଏ ନେଇ ସାହିବାସିନ୍ଦା ଜନସ୍ବାସ୍ଥ୍ୟ ବିଭାଗ ନିକଟରେ ଅଭିଯୋଗ କରିଥିଲେ ମଧ୍ୟ କିଛି ସୁଫଳ ମିଳିନି। ଫଳରେ ବାଧ୍ୟହୋଇ ସୋମବାର ମହିଳାମାନେ ରାସ୍ତାରୋକୋ କରିଥିବା ପ୍ରକାଶ କରିଛନ୍ତି। ଶ୍ରୀପଦଗଞ୍ଜ ମହିଳା ସ୍ବୟଂ ସହାୟିକା ଗୋଷ୍ଠୀର ସଭାନେତ୍ରୀ ମଧୁସ୍ମିତା କୁଅଁରବାବୁ, ସମ୍ପାଦିକା ସୁଷମା ଦାସଙ୍କ ନେତୃତ୍ୱରେ ମହିଳାମାନେ ରାସ୍ତାରୋକୋ କରିଥିଲେ। ପାନୀୟ ଜଳ ସମସ୍ୟାର ସମାଧାନ ନ ହେଲେ ମଙ୍ଗଳବାର ପୁନର୍ବାର ରାସ୍ତାରୋକୋ କରିବେ ବୋଲି ଧାରଣାକାରୀମାନେ କହିଛନ୍ତି।
