ଲାଠୋର, ୧୮।୧୦(ଡି.ଏନ୍.ଏ.)- ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ପଁଚେତ୍ ସଦର କଲୋନିପଡ଼ାର ଶଶି ପୁଟେଲକଁର ପୁଓ ଓମକାର ପୁଟେଲ(୧୦)। ସେ ଜନ୍ମୁ ଅଁଧ୍ ଆଏ। ହେଲେ ପାଠ୍ପଢ଼ାରେ ତାକର ବଡ଼ଭାରି ରୁଚି ରହିଛେ। ଇଅଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ପୁଓକେ ପାଠ୍ପଢ଼ାବାର ଲାଗି ଟଁକା ପଏସାର ଅଭାବ ରହିଛେ। ଏନ୍ତାଥି ଓମକାର ଗଁା ସ୍କୁଲରେ ପଢ଼ୁଛନ୍। ହେଲେ ଗଁା ସ୍କୁଲରେ ତାକର ଭବିଷତ୍କେ ନେଇ ପରିବାର ଲୋକ୍ ଚିନ୍ତାରେ ରହିଛନ୍।
ସୂଚନା ଅନ୍ସାରେ ଲାଠୋର କଲୋନିପଡ଼ାର ଶଶି ପୁଟେଲକଁର ପରିବାର କହେଲେ ମାଏକିନା ଗୋପପୁରୀ, ଝି’ ଦୀପାଞ୍ଜଳି ଆର ୩ ପୁଓ ଓମକାର, ଡିଲେଶ୍ୱର, ନରେଶକୁଁ ନେଇ ସଁସାର। ଶଶି ବଛରକ ୬ ମାସ ଚାଷ୍ବାସ ଆର ବାକି ୬ ମାସ ଦାଦନ୍ ଯାଇ କୁଟୁମ ପୁଷୁଛନ୍। ପୁଓ ଓମକାର ଜନ୍ମୁ ଅଁଧ୍ ହେଇଥିଲେ ବି ଶଶି ତାହାକୁ ଭିନେ ଭିନେ ଡାକ୍ତରଖାନାରେ ଚିକିଛା କରେଇ ନିରାଶ ହେଇଛନ୍। ମାସିକ ୭ ଶହ ଟଁକା ଦିବ୍ୟାଙ୍ଗ ଭତା ଆର ୧୦ କେ.ଜି. ଚାଉଲକେ ଛାଡ଼ିଦେଲେ ଓମକାର ବାକି କେହେନ୍ସି ସରକାରୀ ସୁବିଧା ନାଇଁ ପାଏବାର। ଇ ଗରିବ୍ ପରିବାର ଅଭାବ ଅନାଟନରୁ ଆଏଜ୍ତକ ଭଲ ଘରଖଁଡ଼େ ନାଇଁ କରିପାରି। ଏନ୍ତାଥି ଇ ଗରିବ ପରିବାର ଗୁଟେ ମାଏଟ୍ ଖପର ଘରେ ଆଶ୍ରେ ନେଇଛନ୍। ଇଆଡ଼େ ଓମକାରର ପାଠ୍ପଢ଼ାରେ ରୁଚି ରହିଥିଲେ ବି ଅଭାବ ଅନାଟନ ଲାଗି ପରିବାର ଲୋକ୍ ତାହାକୁ କେହେନ୍ସି ଗୁଟେ ଭଲ ସ୍କୁଲରେ ଦାଖଲ କରି ନାଇଁପାରବାର। ଓମକାର ଏହେଦେ ଗଁା ସ୍କୁଲରେ ୫ମ ଶ୍ରେଣୀରେ ପଢ଼ୁଛନ୍। ତାକର ପାଠ୍ପଢ଼ବାର ଇଛାକେ ଦେଖି ପରିବାର ଲୋକ୍ ପୁଓକେ କେନ୍ଠାନେ, କେନ୍ଥେଇ ପଢ଼ାବେ ତାର ବାଟ ନାଇଁପାଏବାର। ଜିଲା ପରଶାସନ ଇ ଦିଗେ ଦୁରୁଷ୍ଟି ଦେଇ ଓମକାରକେ କେହେନ୍ସି ସରକାରୀ ଅନ୍ଧ, ମୁକ ବଧିର ସ୍କୁଲରେ ପଢ଼ାବାର ବେବସ୍ତା କରବାକେ ବୁଧିଜୀବୀ ମହଲରେ ଦାବି ହେଉଛେ।
