ପଶ୍ଚିମବଙ୍ଗରେ ହିନ୍ଦୁ ଅସୁରକ୍ଷିତ ଅଭିଯୋଗ; ରାଷ୍ଟ୍ରପତି ଶାସନ ଦାବି କଲା ବଜରଙ୍ଗ ଦଳ
8:57 amOctober 17, 2019 / 21

ବ୍ରହ୍ମପୁର ଅଫିସ,୧୭ା୧୦-ପଶ୍ଚିମବଙ୍ଗରେ ଜଣକ ପରେ ଜଣେ ହିନ୍ଦୁଙ୍କୁ ହତ୍ୟା କରାଯାଉଛି। ଗତ କିଛିବର୍ଷ ହେଲା ଏହି ଧାରା ଜାରି ରହିଛି । ସେଠାରେ ହିନ୍ଦୁମାନେ ନିଜକୁ ଅସୁରକ୍ଷିତ ମଣିଲେନି। ମୁଖ୍ୟମନ୍ତ୍ରୀ ମମତା ବାନାର୍ଜୀ ହିଂସା ରୋକିବା ଦିଗରେ କୌଣସି ପଦକ୍ଷେପ ନେଉନାହାନ୍ତି। ରାଜନୈତିକ ସ୍ବାର୍ଥ ପାଇଁ ହିନ୍ଦୁଙ୍କୁ ମାରିବାକୁ ଛାଡ଼ିଦେଉଛନ୍ତି । ଏଣୁ ପଶ୍ଚିମବଙ୍ଗରେ ତୁରନ୍ତ ରାଷ୍ଟ୍ରପତି ଶାସନ ଜାରି କରିବା ଆବଶ୍ୟକ ବୋଲି ବଜରଙ୍ଗ ଦଳ ଗଞ୍ଜାମ ଜିଲା ଶାଖା ପକ୍ଷରୁ କୁହାଯାଇଛି। ବୁଧବାର ଏନେଇ ଏକ ଦାବିପତ୍ର ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଦକ୍ଷିଣାଞ୍ଚଳ ରାଜସ୍ବ କମିଶନର୍‌ଙ୍କୁ ପ୍ରଦାନ କରାଯାଇଛି। ଦଳ ପକ୍ଷରୁ ଅଭିଯୋଗ ହୋଇଛି, ଗତ ୧୦ତାରିଖରେ ମୁର୍ଶିଦାବାଦ୍‌ରେ ବନ୍ଧୁ ପ୍ରକାଶ ପାଲ୍‌, ତାଙ୍କ ଗର୍ଭବତୀ ସ୍ତ୍ରୀ ଏବଂ ୮ ବର୍ଷର ପୁଅକୁ ଜଘନ୍ୟ ଭାବେ ହତ୍ୟା କରାଯାଇଛି। ଏହା ସମଗ୍ର ହିନ୍ଦୁ ସମାଜକୁ ବ୍ୟଥିତ କରିଛି। ପଶ୍ଚିମବଙ୍ଗରେ ବୃଦ୍ଧି ପାଉଥିବା ହିନ୍ଦୁମାନଙ୍କ ହତ୍ୟା ପାଇଁ ବଙ୍ଗଲାଦେଶୀ ମୁସଲମାନ୍‌ ଅନୁପ୍ରେଶକାରୀ ଦାୟୀ। ସେମାନଙ୍କ ଭୋଟ୍‌ ପାଇଁ ମମତା ସରକାର ରାଜ୍ୟରୁ ତଡ଼ିବା ପାଇଁ ପଦକ୍ଷେପ ନେଉନାହାନ୍ତି। ହତ୍ୟାକାରୀଙ୍କୁ ସ୍ଥାନୀୟ ସରକାର ଖୋଲାଖୋଲି ସମର୍ଥନ କରୁଛି। ଏଣୁ ପଶ୍ଚିମବଙ୍ଗରେ ମମତା ସରକାରକୁ ବରଖାସ୍ତ କରି ରାଷ୍ଟ୍ରପତି ଶାସନ ଜାରି କରିବା, ବନ୍ଧୁ ପ୍ରକାଶ ପାଲ୍‌ଙ୍କ ହତ୍ୟାକାଣ୍ଡର ସିବିଆଇ ତଦନ୍ତ ସହ ଦୋଷୀଙ୍କୁ ତୁରନ୍ତ ଫାଶି ଦଣ୍ଡଦେବା, ରାଜ୍ୟରେ ଏନ୍‌ଆର୍‌ସି ଲାଗୁ କରି ବାଂଲାଦେଶୀ ଅନୁପ୍ରେବେଶକାରୀଙ୍କୁ ବାହାର କରିବା, ବାଂଲାଦେଶର ହିନ୍ଦୁମାନଙ୍କୁ ସଂରକ୍ଷଣ ଓ ସୁରକ୍ଷା ପ୍ରଦାନ ସହ ରାଷ୍ଟ୍ରବିରୋଧୀଙ୍କୁ ଚିହ୍ନଟକରି ଆଇନ୍‌ଗତ ଦୃଢ଼ ପଦକ୍ଷେପ ନେବାକୁ ସଂଗଠନ ପକ୍ଷରୁ ଦାବି ହୋଇଛି। ଏଥିସହ ମମତା ବନାର୍ଜୀଙ୍କୁ କୁଶପୁତ୍ତଳିକା ଦାହ କରାଯାଇଥିଲା। ଏହି ବିକ୍ଷୋଭରେ ସଂଗଠନ ଜିଲା ସଂଯୋଜକ ନୀଳାଞ୍ଚଳ ବିଷୋୟୀ, ବିଭାଗ ସଂଯୋଜକ ଗୌତମ ମହାରଣା, ନଗର ସଂଯୋଜକ ରାହୁଲ୍‌ ପାତ୍ର, ଦୀପକ ମହାପାତ୍ର, ଅରୁଣ ପ୍ରସାଦ ପାଢୀ, ହରପ୍ରସାଦ ସ୍ବାଇଁ, ନୀଳକଣ୍ଠପ୍ରସାଦ ଗୌଡ଼ ଓ ଧର୍ମେନ୍ଦ୍ର ଦାସ, ଭରତ ଜେନାଙ୍କ ସମେତ ବହୁ କର୍ମୀ ଭାଗନେଇଥିଲେ ।
ବିଏମ୍‌-୧୬-୧୯-ବଜରଙ୍ଗ ଦଳ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଉଛି ।