ଚନ୍ଦ୍ରପୁର, ୯ା୧୨ (ଡି.ଏନ୍.ଏ.) ରାୟଗଡ଼ା ଜିଲା ଚନ୍ଦ୍ରପୁର ବ୍ଲକ ହନୁମନ୍ତପୁର ପଞ୍ଚାୟତରେ ରହିଛି ମୀନାଝୋଲା ଶୈବପୀଠ। ପ୍ରତିବର୍ଷ ଏଠାକୁ ହଜାର ହଜାର ପର୍ଯ୍ୟଟକ ଆସିଥାନ୍ତି ା ଏମିତି କି ଶିବରାତ୍ରିରେ ଜିଲା ତଥା ଜିଲା ବାହାରୁ ବହୁ ଶ୍ରଦ୍ଧାଳୁଙ୍କ ସମାଗମ ହୋଇଥାଏ। ପର୍ଯ୍ୟଟକଙ୍କ ଭିଡ଼କୁ ଦୃଷ୍ଟିରେ ରଖି ଏହି ସ୍ଥାନକୁ ପର୍ଯ୍ୟଟନସ୍ଥଳୀର ମାନ୍ୟତା ପ୍ରଦାନ ପାଇଁ ଦୀର୍ଘ ଦିନରୁ ଦାବି ହୋଇ ଆସୁଥିଲେ ମଧ୍ୟ ପ୍ରଶାସନ ତରଫରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ଫଳରେ ସମଗ୍ର ଅଞ୍ଚଳରେ ଜନସଧାରଣଙ୍କ ତରଫରୁ ଅସନ୍ତୋଷ ବୃଦ୍ଧି ପାଇବାରେ ଲାଗିଛି।
ହନୁମନ୍ତପୁର ପଞ୍ଚାୟତର ରାଇବିଡି ଛକଠାରୁ ୭ କି.ମି. ଏବଂ ଗୁଡାରୀ ବ୍ଲକଠାରୁ ଭାୟା ସିରିଗୁଡା ଦେଇ ୨୦ କି.ମି. ଦୂରରେ ଏହି ମୀନାଝୋଲା ଅବସ୍ଥିତ। ଚନ୍ଦ୍ରପୁର ବ୍ଲକ ସଦର ମହକୁମାଠାରୁ ୨୨ କି.ମି. ଓ ମୁନିଗୁଡା ବ୍ଲକଠାରୁ ଭାୟା ଡାଙ୍ଗସୋରଡା ଦେଇ ୪୭ କି.ମି. ଦୂରତାରେ ରହିଛି ଏହି ଶୈବପୀଠ। ବଂଶଧାରା, ଚାଉଳିଆ, ଫଳଫଳିଆ ତିନୋଟି ନଦୀର ସଂଗମରେ ୧୫୦ ମିଟର ଗର୍ତ୍ତରେ ପଥରର ଏକ ମୀନ ଆକୃତିର ମହାଦେବ ଏଠାରେ ପୂଜା ପାଉଛନ୍ତି ା ଏହି ଶୈବପୀଠର ପ୍ରାକୃତିକ ସୌନ୍ଦର୍ଯ୍ୟ ଅତି ମନଲୋଭା। ବର୍ଷର ଅଧିକାଂଶ ସମୟ ଲୋକେ ଏଠାକୁ ବଣ ଭୋଜି କରିବା ପାଇଁ ଆସିଥାନ୍ତି। ପଥର ମଧ୍ୟଭାଗରେ ଥିବା ଶିବ ଲିଙ୍ଗକୁ ପ୍ରତ୍ୟେକ ବର୍ଷ ଶିବରାତ୍ରିରେ ତିନିଦିନ ଧରି ମହା ଆଡମ୍ବରରେ ପୂଜା କରାଯାଇଥାଏ। ଏଠାରେ ପୂଜାର୍ଚ୍ଚନା କଲେ ବହୁ ମାନସିକ ପୂରଣ ହୋଇଥାଏ ବୋଲି ଲୋକଙ୍କ ବିଶ୍ୱାସ ରହିଛି। ଯଦି କାହାର ପୁତ୍ର ସନ୍ତାନ ଜନ୍ମ ନ ହୁଏ ଉକ୍ତ ଦମ୍ପତି ଆସି ନଦୀ ପାର୍ଶ୍ୱରେ ରାତ୍ରିଯାପନ କଲେ ପୁତ୍ର ସନ୍ତାନ ଲାଭ ହୁଏ ବୋଲି ବହୁ ପୁରାତନ ଲୋକକଥାରୁ ଶୁଣିବାକୁ ମିଳେ । ଏଠାକୁ ଯିବା ପାଇଁ ବର୍ତ୍ତମାନ ଦୁଇବର୍ଷ ହେଲାଣି ଗ୍ରାମ୍ୟ ଉନ୍ନୟନ ବିଭାଗ ତରଫରୁ ନଦୀ ପାର୍ଶ୍ୱ ପର୍ଯ୍ୟନ୍ତ ପିଚୁ ରାସ୍ତା ନିର୍ମାଣ ହୋଇଛି। ବ୍ଲକ୍ ପ୍ରଶାସନ ତରଫରୁ ପାହାଚ ନିର୍ମାଣ କରାଯାଇଛି। ୭ ବର୍ଷ ପୂର୍ବେ ବ୍ଲକ ପ୍ରଶାସନ ତରଫରୁ ନଦୀ କୂଳକୁ ଯିବା ପାଇଁ ୭୨ଟି ପାହାଚ ସିମେଣ୍ଟରେ ନିର୍ମାଣ କରାଯାଇଥିଲା। ରକ୍ଷଣାବେକ୍ଷଣ ଅଭାବରୁ ଏହାର ଅବସ୍ଥା ଦିନକୁ ଦିନ ଖରାପ ହେବାକୁ ବସିଲାଣି। ଏହାର ମରାମତି ପାଇଁ ଚନ୍ଦ୍ରପୁର ପୂର୍ବତନ ବ୍ଲକ ଅଧ୍ୟକ୍ଷ ଭୀମ ଗଗେରେଙ୍ଗା ଦାବି କରିଛନ୍ତି। ଏଠାରେ ଶ୍ରଦ୍ଧାଳୁଙ୍କ ପିଇବା ପାଣି ପାଇଁ ନଳକୂପର ବ୍ୟବସ୍ଥା ନାହିଁ ା ବହୁ ବର୍ଷ ପୂର୍ବରୁ ଛୋଟ ଆଶ୍ରୟସ୍ଥଳୀ ବ୍ଲକ ତରଫରୁ ନିର୍ମାଣ କରାଯାଇଥିଲେ ମଧ୍ୟ ତାହା ଭାଙ୍ଗି ନଷ୍ଟ ହେବାକୁ ବସିଲାଣି। ଶୀଘ୍ର ଏହାର ଉନ୍ନତୀକରଣ ଦିଗରେ ପ୍ରଶାସନ ଦୃଷ୍ଟିଦେଇ ଏହାକୁ ଜିଲାର ଏକ ପ୍ରମୁଖ ପର୍ଯ୍ୟଟନସ୍ଥଳୀର ମାନ୍ୟତା ଦେବା ପାଇଁ ଚନ୍ଦ୍ରପୁର ବ୍ଲକର ଅବସରପ୍ରାପ୍ତ ପ୍ରଶାସନିକ ଅଧିକାରୀ ରାମନାଥ ଦୋରା କହିଛନ୍ତି।
