ପରିବେଶ ପର୍ଯ୍ୟଟନସ୍ଥଳୀ ସୁନାମୁହିଁ ଅସୁରକ୍ଷିତ: ଦୁର୍ବୃତ୍ତମାନେ ଭାଙ୍ଗିଦେଲେ ମୂଲ୍ୟବାନ୍ ସାମଗ୍ରୀ
21 ଖଣ୍ଡପଡା,୪ା୭(ସ୍ବ.ପ୍ର.): ଖଣ୍ଡପଡା ସହର ଉପକଣ୍ଠ ଖଣ୍ଡପଡା-ନୟାଗଡ ମୁଖ୍ୟ ରାସ୍ତା ପାର୍ଶ୍ୱରେ ଥିବା ସୁନାମୁହିଁ ପରିବେଶ ପର୍ଯ୍ୟଟନସ୍ଥଳୀ ଏବେ ଅସୁରକ୍ଷିତ ହୋଇପଡିଛି। ପର୍ଯ୍ୟଟକଙ୍କ ସୁବିଧା ପାଇଁ ଏଠାରେ ସିମେଣ୍ଟ ବେଞ୍ଚ, ଚୌକି ସହ ଶାରୀରିକ ବ୍ୟାୟାମ ନିମନ୍ତେ ଅନେକ ମୂଲ୍ୟବାନ ଉପକରଣ ସ୍ଥାପନ କରାଯାଇଥିଲା। ହେଲେ କେତେକ ଅସାମାଜିକ ବ୍ୟକ୍ତି ଆଡ୍ଡା ଜମାଇ ଉକ୍ତ ବେଞ୍ଚ, ଚୌକି ଓ ବାହ୍ୟ ସୁରକ୍ଷା ପ୍ରାଚୀର ଭଙ୍ଗାରୁଜା କରିଥିଲେ। ନିକଟରେ ୨ଦିନ ତଳେ ଏହା ପରିସରରେ ଥିବା ବଉଳମାଳିଆ ପଥରରେ ନିର୍ମିତ ଅଶୋକଚକ୍ରକୁ ମଧ୍ୟ କେହି ଭାଙ୍ଗିଦେଇଛନ୍ତି। ସ୍ଥାନୀୟ ପ୍ରଶାସନିକ ଅଧିକାରୀ ଏହାକୁ ନେଇ ନୀରବଦ୍ରଷ୍ଟା ସାଜିଥିବାରୁ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ସୁନାମୁହିଁ ପରିବେଶ ପର୍ଯ୍ୟଟନସ୍ଥଳୀର ଉନ୍ନତୀକରଣ ଓ ସୌନ୍ଦର୍ଯ୍ୟକରଣ ନିମନ୍ତେ ରାଜ୍ୟ ସରକାର ଖଣ୍ଡପଡା କ୍ଷୁଦ୍ର ଜଳସେଚନ ବିଭାଗ ମାଧ୍ୟମରେ କୋଟି କୋଟି ଟଙ୍କା ବ୍ୟୟ କରିଛନ୍ତି । ଗତ ୫ବର୍ଷ ମଧ୍ୟରେ ଏଠାରେ ଅନେକ ଉନ୍ନୟନମୂଳକ କାର୍ଯ୍ୟ କରାଯାଇଛି। ପର୍ଯ୍ୟଟକଙ୍କ ନିମନ୍ତେ ବିଭିନ୍ନ ପ୍ରକାର ଦୋଳି ଓ ଖେଳନା ସାମଗ୍ରୀ ସହ ଶାରୀରିକ ବ୍ୟାୟାମ କରିବା ପାଇଁ ମୂଲ୍ୟବାନ ଉପକରଣ ସ୍ଥାପନ କରାଯାଇଛି । ମାତ୍ର ସୁରକ୍ଷା ବ୍ୟବସ୍ଥା ନ ଥିବାରୁ ଅସାମାଜିକ ତଥା ନିଶାଖୋର ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିଛି। ପୋଲିସ ପ୍ରଶାସନ କିମ୍ବା ଏନ୍ଏସି କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ନ ନେବା ପରିତାପର ବିଷୟ। ଏନ୍ଏସି ଦାୟିତ୍ୱରେ ଥିବା ଅତିରିକ୍ତ ଜିଲାପାଳ ସର୍ବୋପରି ନୟାଗଡ ଜିଲାପାଳ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ଖଣ୍ଡପଡାର ପୂର୍ବତନ ବିଧାୟକ ଅନୁଭବ ପଟ୍ଟନାୟକଙ୍କ ପ୍ରତିକ୍ରିୟା ନେବାରୁ ସେ କହିଥିଲେ, ଖଣ୍ଡପଡାରେ ଏଭଳି ଏକ ପର୍ଯ୍ୟଟନସ୍ଥଳୀ ତିଆରି କରାଯାଇଥିଲା ଯେଉଁଠିକୁ ପ୍ରତ୍ୟହ ହଜାର ହଜାର ପର୍ଯ୍ୟଟକ ଆସୁଥିଲେ । କିନ୍ତୁ କେତେକ ଖଳ ପ୍ରକୃତିର ଲୋକଙ୍କ ଏପରି କାର୍ଯ୍ୟ ସେମାନଙ୍କ ମନରେ ଗଭୀର ଆଘାତ ଦେଇଛି । ଏହାର ସୁରକ୍ଷା ପାଇଁ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଓ କ୍ଷୁଦ୍ର ଜଳସେଚନ ବିଭାଗ ନିର୍ବାହୀଯନ୍ତ୍ରୀଙ୍କ ସହ ଆଲୋଚନା କରାଯାଇଥିଲା। ଏପରି କି ଏନ୍ଏସି କର୍ତ୍ତୃପକ୍ଷଙ୍କୁ ରକ୍ଷଣାବେକ୍ଷଣ ପାଇଁ ଅନୁରୋଧ କରାଯାଇଥିଲା। ଏନ୍ଏସି ପକ୍ଷରୁ ଯଦି ଏହି ଦାୟିତ୍ୱ ନିଆଯାଆନ୍ତା ତେବେ ଆଗାମୀ ଦିନରେ ଏହା ଏକ ରାଜ୍ୟସ୍ତରୀୟ ପର୍ଯ୍ୟଟନସ୍ଥଳୀରେ ପରିଣତ ହୋଇପାରନ୍ତା। ଏଠାରେ ପ୍ରାୟ ୨କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ ଆଉ ୩କୋଟି ଟଙ୍କା ପର୍ଯ୍ୟଟନ ବିଭାଗ ପକ୍ଷରୁ ମଞ୍ଜୁର ହୋଇରହିଛି। କିନ୍ତୁ ପ୍ରଶାସନିକ ଅବହେଳା ବିଶେଷ କରି ଏନ୍ଏସି କର୍ତ୍ତୃପକ୍ଷଙ୍କ ଅବହେଳା ଯୋଗୁ ଏହି ପ୍ରକଳ୍ପ ନଷ୍ଟ ହେବାକୁ ବସିଛି । ଏହି ପରିପ୍ରେକ୍ଷୀରେ ଖଣ୍ଡପଡାବାସୀ ଏକାଠି ହୋଇ ଏହା ବିରୋଧରେ ସ୍ବର ଉଠାଇବା ଜରୁରୀ ବୋଲି ପଟ୍ଟନାୟକ ମତପ୍ରକାଶ କରିଛନ୍ତି ।