ସୋହେଲା,୨୯ା୮(ଡି.ଏନ୍.ଏ.): ଓଡ଼ିଶା ଗୁଟେ କୃଷି ପରଧାନ ରାଏଜ୍। ଇ ରାଏଜ୍ର ବଡ଼ଭାଗି ଲୋକ୍ ଚାଷ୍ବାସ ଉପରେ ନିରଭର କରି ନିଜର ଜୀବନ୍ ଜୀବ୍କା ଚଲଉଛନ୍। ସେନ୍ତା ବରଗଡ଼ ଜିଲାକେ ରାଏଜର ଭାତ୍ ହଁାଡ଼ି ବଲି କୁହାଯାଉଛେ। ଇ ଜିଲା ଧାନ୍ ଚାଷ ବାହାରେ ପନିପରିବା ଚାଷ୍ରେ ବି ରାଏଜେ ନଁା କମେଇଛେ। ଜିଲାରୁ ରାଏଜର ଭିନେ ଭିନେ ଜିଲା ଆର ପଡ଼ିଶା ରାଏଜ୍ମାନକୁ ପନିପରିବା ରପ୍ତାନୀ ହେଉଛେ। ଇ ଜିଲାର ଚାଷୀ ହରେକ୍ କିସମର ପନିପରିବା ଚାଷ୍ କରି ଭଲ ଦୁଇ ପଏସା ରୁଜ୍ଗାର କରୁଛନ୍।
ବରଗଡ଼ ଜିଲା ସୋହେଲା ବ୍ଲକ ବାଇପାଲି ଗଁାର ଝନେ ପରିବା ଚାଷୀ କୁଶ ବଗର୍ତ୍ତିକୁଁ ଭେଟିଥିଲେ ଆମର ଥାନୀୟ ଧରିତ୍ରୀ ପରତିନିଧି। କୁଶ ବଗର୍ତ୍ତିକଁର ପରିବାର କହେଲେ ମାଏକିନା ଉର୍କୁଲି ଆର ୪ ଝି’, ୨ ପୁଓକୁ ନେଇ ତାକର ସୁଖର ସଁସାର। କୁଶ ଦୁଖ୍ସୁଖ କରି ବଡ଼ଖା ଝି’କେ ବିହା କରିଛନ୍, ବାକି ୩ ଝି’ ପାଠ୍ ପଢ଼ୁଛନ୍। ସେନ୍ତା ଦୁଇ ପୁଓ ଭିତରୁ ଝନକର ବଏସ ୨୫ ହେଇଥିଲାବେଲେ ଆରଗୁଟେ ପୁଓ ବଏସ ୧୨। ପରିବାରଟା ନିହାତି ଗରିବ୍ ହେଇଥିଲାବେଲେ ଜମିବାଡ଼ି ବଲି ବିଶେଷ କିଛି ନାଇଁ। କୁଶ ଭାଇ ଭାଗ୍ରେ ୧ ଏକର ୧୫ ଡେସିମିଲ ଜମି ପାଇଛନ୍। ସେଥ୍ରେ ସେ ଧାନ ଚାଷ୍ କରୁଛନ୍। ବଡ଼ କୁଟୁମ ଲାଗି ଘରେ ସବୁବେଲେ ଅଭାବ ଅନାଟନ ଲାଗି ରହୁଛେ। ସେଥିରଲାଗି କୁଶ ଅନେକ ସମିଆରେ ପରହର କାମ୍ବୁତା କରି ଦୁଇ ପଏସା ରୁଜଗାର କରୁଛନ୍। ହେଲେ ଅଲପ୍ ରୁଜ୍ଗାରରେ ବଢ଼ଲା ଛୁଆପିଲାକୁ ପୁଷ୍ବାର ସମ୍ଭବ ନୁହେ। ସେଥିରଲାଗି କୁଶ ୬ ନମ୍ବର ଜାତୀୟ ରାଜପଥ ତରେ କେନପାଲି ଗଁାର ଝନେ ଚାଷୀର ୭୦ ଡେସିମିଲ ଜାଗାକେ ଠିକାରେ ନେଇ ଜହ୍ନି ଚାଷ୍ କରିଛନ୍। ଗଲା ବଛର ଇ ଜମିରେ ସେ ବିନ୍ସ ଚାଷ୍ କରି ୪୦ ହଜାର ଟଁକା ଲାଭ୍ ପାଇଥିବାର କହିଛନ୍। ଇଥର ଜହ୍ନି ଚାଷ୍ରୁ ବି ଭଲ ଦୁଇ ପଏସା ଲାଭ୍ କରବାର ଆଶ୍ ସେ ରଖିଛନ୍। ଏହେଦେ ବଜାରରେ ଜହ୍ନି କେ.ଜି. ୨୦ ଟଁକା ରହିଛେ। କୁଶ ବାରିରୁ ଜହ୍ନି ତୁଲି ସିଧା ବେପାରୀମାନକୁ ବିକୁଛନ୍, ଦରକାର ପଡ଼ଲେ ନିଜେ ରାସ୍ତା ତରେ ପରିବା ରଖି ବିକୁଛନ୍। ଇଥ୍ରେ ଛୁଆପୁତାନୁ ପରିବାର ଲୋକ୍ ସଭେ ତାହାକୁ ସହଯୋଗ କରୁଛନ୍। କୁଶ ବି ବାହାଜାଂଗଲ ମାଜି ଦୁଇ ପଏସା ରୁଜ୍ଗାର କରବାର ସଂଗେ ଛୁଆପିଲାକୁ ପାଠ୍ପଢ଼େଇ ଭଲ ମୁନୁଷ୍ କରବାରେ ଲାଗି ପଡ଼ିଛନ୍। ହେଲେ ଅଭାବ ଆନାଟନ ଲାଗି କୁଶ ଆଏଜ୍ତକ ଭଲ ଘରଖଁଡ଼େ ତିଆରି ନାଇଁପାରି। ଆଏଜ୍ ବି କୁଟୁମବସିଆ ଗୁଟେ ପୁରନା ମାଏଟ୍ କୁରିଆରେ ରହୁଛନ୍। ହେଲେ ସରକାରୀ ଯୋଜନାରେ ଆଏଜ୍ ନାଇଁ ହେଲେ କାଏଲ୍ ପକାଘର ଖଁଡ଼େ ପାଏବାର ଆଶ୍ରେ ସେ ରହିଛନ୍।
