ଭୁବନେଶ୍ୱର,୨୭ା୧୦(ବ୍ୟୁରୋ): ସଚିବାଳୟରେ କାର୍ଯ୍ୟରତ ସଂଖ୍ୟାଧିକ ଉପବିଭାଗ ଅଧିକାରୀ(ଏସ୍ଓ)ଙ୍କର ଡେସ୍କ ଅଫିସର(ଡିଓ) ପଦବୀକୁ ପଦୋନ୍ନତି ହେବ। ଏ ସମ୍ପର୍କିତ ଏକ ବୈଠକ ଶୁକ୍ରବାର ଅନୁଷ୍ଠିତ ହୋଇଥିଲା। ପଦୋନ୍ନତି ନେଇ ଦେଖାଦେଇଥିବା କେତେକ ତ୍ରୁଟି ଇତି ମଧ୍ୟରେ ସଂଶୋଧନ କରାଯାଇଥିବା ଜଣାପଡିଛି। ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ହସ୍ତକ୍ଷେପ ପରେ ଗୃହ ବିଭାଗ ଆବଶ୍ୟକ ସଂଶୋଧନକୁ ଅନୁମୋଦନ କରିଛିି। ଏହି ସଂଶୋଧିତ ଏବଂ ତ୍ରୁଟିମୁକ୍ତ ସୁପାରିସ କାର୍ଯ୍ୟକାରୀ ହେଲେ ୧୫୪ ସାଧାରଣବର୍ଗ(ୟୁଆର), ୨୭ ତଫସିଲଭୁକ୍ତ ଜାତି(ଏସ୍ସି) ଏବଂ ୪୦ ଅନୁସୂଚିତ ଜନଜାତି(ଏସ୍ଟି) ବର୍ଗର କର୍ମଚାରୀ ଚଳିତ ବର୍ଷ ଶେଷସୁଦ୍ଧା ପଦୋନ୍ନତି ପାଇବେ।
ଉଲ୍ଲେଖଯୋଗ୍ୟ, ଗୃହ ବିଭାଗ ପ୍ରମୁଖ ଶାସନ ସଚିବ ସଞ୍ଜୀବ ଚୋପ୍ରାଙ୍କ ଅଧ୍ୟକ୍ଷତାରେ ବସିଥିବା ବିଭାଗୀୟ ପଦୋନ୍ନତି କମିଟି(ଡିପିସି) ବୈଠକରେ ଏସ୍ସି ବର୍ଗର ଏସ୍ଓଙ୍କର ଅଣସଂରକ୍ଷିତ ପଦବୀ ବିପକ୍ଷରେ ଡେସ୍କ ଅଫିସର ପଦବୀକୁ ପଦୋନ୍ନତି ପାଇଁ ସୁପାରିସ କରାଯାଇଥିଲା। ହେଲେ ଏହା ପୂର୍ବରୁ ସୁପ୍ରିମକୋର୍ଟଙ୍କ ଦ୍ୱାରା ଦିଆଯାଇଥିବା ଏକ ରାୟର ବିରୁଦ୍ଧାଚରଣ କରୁଥିଲା। ଏହାକୁ ନେଇ କର୍ମଚାରୀଙ୍କ ମହଲରେ ଅସନ୍ତୋଷ ସୃଷ୍ଟି ହୋଇଥିଲା। ବିଶେଷକରି ସାଧାରଣ ବର୍ଗର କର୍ମଚାରୀ ଏ ନେଇ ସଚିବଙ୍କୁ ଭେଟି ପଦୋନ୍ନତି ସମ୍ପର୍କିତ ନଥିପତ୍ର ଯାଞ୍ଚ କରିବା ସହ ନିଷ୍ପତ୍ତିର ପୁନର୍ବିଚାର ପାଇଁ କହିଥିଲେ। ଏହା ପରେ ସୁପାରିସ କରାଯାଇଥିବା ପ୍ରସ୍ତାବ ତ୍ରୁଟିପୂର୍ଣ୍ଣ ବୋଲି ଜଣାଯାଇଥିଲା। ତେଣୁ ଗୃହ ସଚିବଙ୍କ ଦ୍ୱାରା ଉକ୍ତ ତ୍ରୁଟିର ସଂଶୋଧନ କରାଯାଇଛି। ଡିପିସି ବୈଠକ ବେଳେ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେବାର ଆଶଙ୍କା କରାଯାଇଥିଲା। ଏପରି କି ଶୁକ୍ରବାର ଏବଂ ଶନିବାର ସଚିବାଳୟ ପରିସରରେ କେତେଜଣ ପୋଲିସ ଅଧିକାରୀଙ୍କୁ ମୁତୟନ କରାଯାଇଥିବା ଦେଖିବାକୁ ମିଳିଥିଲା।
