କୁତ୍ରା,୯।୭(ଦେବାଶିଷ ସାହୁ): ସୁନ୍ଦରଗଡ ଜିଲା କୁତ୍ରା ଥାନା ଅନ୍ତର୍ଗତ ଲିଟିବେଡ଼ା ଜଙ୍ଗଲ ନିକଟରେ ଆଜି ଭୋର ପ୍ରାୟ ୩ ଟା ୨୦ ମିନିଟ ସମୟରେ ଗୁଳିମାଡ଼ ହୋଇଥିବା ନେଇ କୁତ୍ରା ଥାନାରେ ଅଭିଯୋଗ ହୋଇଛି। ଘଟଣାରୁ ଜଣାପଡିଛି ଯେ, ପଥର ଚିପ୍ସ ବୋଝେଇ ଏକ ହାଇୱା (ଜେଏଚ୦୭କେ ୪୧୫୨) ଯୋଗେ ଚାଳକ ବନାରସି ଓରାମ ଓ ଅମିତ ଲେହରି ଖତକୁରବାହାଲ ଗ୍ରାମ ପଟୁ କୁତ୍ରା ଆଡକୁ ଆସୁଥିବା ବେଳେ ତାଙ୍କୁ ୨ଟି ବାଇକରେ ପିଛା କରୁଥିବା ୪ ଜଣ ଲିଟିବେଡା ଜଙ୍ଗଲ ରାସ୍ତା ଉପରେ ହାଇୱାର ପଛପଟୁ ୫ ରାଉଣ୍ଡ ଗୁଳିଚାଳନା କରିଥିବା ନେଇ ଅଭିଯୋଗ ହୋଇଛି। ହାଇୱା ଉପରେ ଗୁଳିମାଡ ହେଉଥିବା ଜାଣି ପାରି ଚାଳକ ଦ୍ରୁତ ଗତିରେ ସେଠାରୁ ପଳାଇ ଯାଇ ଜୀବନ ରକ୍ଷା କରିଥିଲେ। ତେବେ ଗୁଳିମାଡ଼ର କାରଣ ଅସ୍ପଷ୍ଟ ହୋଇଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି। ଘଟଣାସ୍ଥଳରେ ୨ଟି ଖୋକା ପଡିଥିବା ଦେଖିବାକୁ ମିଳିଛି।
ଅନ୍ୟପକ୍ଷରେ ଏହି ଅଞ୍ଚଳରେ ହେଉଥିବା ଗୋଚାଳନକୁ ବିରୋଧ କରାଯାଉଥିବା ବେଳେ ଏହାକୁ ନେଇ ଗୋଚାଲାଣ କାରି ଗୋଷ୍ଠୀ ପକ୍ଷରୁ ଏହି ଗୁଳି ଚାଳନା ହୋଇଥିବା ନେଇ ଆକ୍ରମଣର ଶିକାର ହୋଇଥିବା ନେଇ ଗାଡି ମାଲିକ ଓ ଅଞ୍ଚଳବାସୀ ପ୍ରକାଶ କରିଛନ୍ତି। ୧୫ ଦିନ ପୂର୍ବରୁ ମଧ୍ୟ ଗାଡି ମାଲିକ ନିଖିଲ ଲେହେରିଙ୍କ ଗାଡି ଉପରକୁ ପଥର ମାଡ ହୋଇଥିବା କହିଛନ୍ତି। ଏହି ଘଟଣାକୁ ନେଇ ବାରମ୍ବାର ଥାନାରେ ଅଭିଯୋଗ କଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା କହିଛନ୍ତି।
Dharitri – Odisha’s No.1 Odia Daily
