ଲଣ୍ଡନ, ୧୮।୫(ପି.ଟି.)-କହୁଣିରେ ପୁଣି ଯନ୍ତ୍ରଣା ଅନୁଭବ କରିବାରୁ ଇଂଲଣ୍ଡ ଫାଷ୍ଟ ବୋଲର ଜୋର୍ଫା ଆର୍ଚର ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜରୁ ଓହରି ଯାଇଛନ୍ତି। ଆହତ ସମସ୍ୟା ଯୋଗୁ ସେ ଅଧାରୁ ବନ୍ଦ ରହିଥିବା ଇଣ୍ଡିଆନ ପ୍ରିମିୟର ଲିଗ୍ରେ ମଧ୍ୟ ଖେଳିପାରି ନ ଥିଲେ। ଦୀର୍ଘଦିନଧରି କ୍ରିକେଟରୁ ଦୂରେଇ ରହିବାପରେ ୨୬ ବର୍ଷୀୟ ଆର୍ଚର ନିଜ କାଉଣ୍ଟି ଦଳ ସସେକ୍ସ ପକ୍ଷରୁ ସରେ ବିପକ୍ଷରେ ଖେଳି ୨୯.୨ ଓଭର ବୋଲିଂ କରିଥିଲେ ତେବେ ସେ କେଣ୍ଟ ବିପକ୍ଷ ମ୍ୟାଚରେ ମାତ୍ର ୫ ଓଭର ବୋଲିଂ କରି ଡାହାଣ କହୁଣିରେ ଯନ୍ତ୍ରଣା ଅନୁଭବ କରିଥିଲେ। ତେଣୁ ସେ ଅନ୍ତିମ ଦୁଇଦିନ ବୋଲିଂ କରିପାରି ନ ଥିଲେ। ଫଳରେ ସେ ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜରୁ ଓହରି ଯାଇଥିବା ଇଂଲଣ୍ଡ ଆଣ୍ଡ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ପକ୍ଷରୁ ପ୍ରକାଶ କରାଯାଇଛି। ଆର୍ଚର ନିଜେ ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ ଫିଟ୍ ବୋଲି ଘୋଷଣା କରିଥିଲେ। ଏହି ସିରିଜ ଜୁନ୍ ୨ରେ ଲଣ୍ଡନରେ ଆରମ୍ଭ ହେବ। ମାତ୍ର କହୁଣିରେ ସାନି ଯନ୍ତ୍ରଣା ତାଙ୍କର ଏବଂ ଇଂଲଣ୍ଡର ଯୋଜନାରେ ବାଧା ପହଞ୍ଚାଇଛି। କ୍ରିକେଟ ବୋର୍ଡ ଆର୍ଚରଙ୍କ ଚିକିତ୍ସା ଉପରେ ଧ୍ୟାନ ଦେଉଛି। ଇଂଲଣ୍ଡ ଏବଂ ସସେକ୍ସ ମେଡିକାଲ ଟିମ୍ ତାଙ୍କ ଉପରେ ନଜର ରଖିଛନ୍ତି। ଚଳିତ ସପ୍ତାହ ଶେଷରେ ତାଙ୍କ ଆଘାତପ୍ରାପ୍ତ କହୁଣିରେ କେଉଁଭଳି ଚିକିତ୍ସା ଆବଶ୍ୟକ ତାହା ସ୍ଥିର ହେବ। ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ ଇଂଲଣ୍ଡ ଦଳ ମଙ୍ଗଳବାର ଘୋଷଣା କରାଯିବ।
