ପୁରୀ ଅଫିସ,୮।୬: ଶ୍ରୀମନ୍ଦିର ନୀଳଚକ୍ରରେ ପ୍ରତିଦିନ ଧ୍ୱଜା ବା ବାନା ବନ୍ଧାଯାଏ। ଚୁନରା ସେବକମାନେ ଅପରାହ୍ନରେ ଏହି ବାନା ବାନ୍ଧିଥାନ୍ତି। ନୀଳଚକ୍ର ଅଗ୍ରଭାଗରେ ଗୋଟିଏ ମୁଖ୍ୟ ବାନା ସହିତ ତଳେ ଏକାଧିକ ବାନା ବନ୍ଧାଯାଇଥାଏ। ଗୋଲାପି, ହଳଦିଆ, ନାଲି, ଧଳା ରଙ୍ଗର ବାନା ନୀଳଚକ୍ର ଉପରେ ଉଡୁଥାଏ। ତେବେ ମୁଖ୍ୟ ବାନାର ରଙ୍ଗ ଯେବେ ଧଳା ରହିଥାଏ ତାହା ବର୍ଷା, ପବନ ସୂଚକ ବୋଲି କହିଛନ୍ତି ଚୁନରା ସେବକ ଡ. ଶରତ ମହାନ୍ତି। ୩୮ ବର୍ଷର ବାନା ବନ୍ଧାର ଅନୁଭୂତିକୁ ନେଇ ଡ. ମହାନ୍ତି କହିଛନ୍ତି, ପ୍ରତ୍ୟେକ ଦିନ ବହୁ ସଂଖ୍ୟକ ଭକ୍ତ ବାନା ବାନ୍ଧିବା ପାଇଁ ଦିଅନ୍ତି। ଶ୍ରୀମନ୍ଦିର ଶାଖା କାର୍ଯ୍ୟାଳୟରେ ଲଟେରି ହୁଏ। ଲଟେରି ଅନୁଯାୟୀ ମୁଖ୍ୟ ବାନା ବନ୍ଧାଯାଏ। ତେବେ ଯେଉଁଦିନ ଧଳା ବାନା ଲଟେରି ଉଠେ ତା ପରଦିନ ବା ପାଖାପାଖି ବର୍ଷା, ପବନ ହେବାର ସମ୍ଭାବନା ଅଧିକ ଥାଏ। ଏହି ବାନା ଏକପ୍ରକାର ସୂଚନା ଦିଏ ବୋଲି କହିଛନ୍ତି ଶରତ। ରବିବାର ସକାଳେ ନୀଳଚକ୍ରରେ ଧଳା ବାନା ଉଡୁଥିଲା। ସକାଳୁ ପରୀର ଆକାଶ ମେଘୁଆ ରହିଥିବାବେଳେ ସାମାନ୍ୟ ଝିପି ଝିପି ବର୍ଷା ପଡ଼ିଥିଲା। ଏପରି କି ଅଧିକାଂଶ ସମୟ ଆକାଶ ମେଘୁଆ ମଧ୍ୟ ରହିଥିଲା। କେବଳ ଏହିଦିନଟି ନୁହେଁ, ବାତ୍ୟା ଅମ୍ଫନ ପୂର୍ବରୁ ବି ନୀଳଚକ୍ରରେ ଧଳା ବାନା ଉଡ଼ିଥିଲା। ସେହିପରି ଗତବର୍ଷ ଫନୀ ବାତ୍ୟାର ପୂର୍ବଦିନ ଅର୍ଥାତ୍ ମେ ୨ ତାରିଖ ଗୁରୁବାର ନୀଳାଚକ୍ରରୁ ଯେଉଁ ବାନାଟି ଉଡ଼ିିଯାଇଥିଲା ତାହାର ରଙ୍ଗ ମଧ୍ୟ ଧଳା ରହିଥିଲା ବୋଲି କହିଛନ୍ତି ଶରତ। ସାଧାରଣତଃ ହଳଦିଆ ଏବଂ ନାଲି ରଙ୍ଗର ବାନା ଅଧିକ ସମୟ ଲଟେରିରେ ଉଠୁଥିବାବେଳେ ଧଳା ରଙ୍ଗର ବାନା ବହୁ କମ୍ ନୀଳଚକ୍ରରେ ବନ୍ଧା ଯାଇଥାଏ। ତେବେ ଏହା ତାଙ୍କର ନିଜସ୍ବ ଅନୁଭୂତି ବୋଲି ଶରତ କହିଛନ୍ତି।
