ଢେଙ୍କାନାଳ ଅଫିସ, ୪।୩ – ଢେଙ୍କାନାଳ ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ ମଙ୍ଗଳବାର ୨୦୨୧ ଜନଗଣନା ପାଇଁ ଦୁଇଦିନିଆ ପ୍ରଶିକ୍ଷଣ ଶିବିର ଆରମ୍ଭ ହୋଇଛି। ଏଥିରେ ଜିଲାପାଳ ଭୂମେଶ ଚନ୍ଦ୍ର ବେହେରା ଅଧ୍ୟକ୍ଷତା କରିବା ସହ ନିର୍ଭୁଲ ତଥ୍ୟ ସଂଗ୍ରହ କରିବାକୁ ଜିଲାସ୍ତରୀୟ ଜନଗଣନା ଦାୟିତ୍ୱରେ ଥିବା ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଜନଗଣନା ତଥ୍ୟ ଆଧାରରେ ବିଭିନ୍ନ ଯୋଜନା ପ୍ରଣୟନ କରାଯାଇଥାଏ। ସାମାଜିକ, ଅର୍ଥନୈତିକ, ଶିକ୍ଷା, ଜାତି, ଧର୍ମ ବିଷୟରେ ପ୍ରତ୍ୟେକଙ୍କ ସବିଶେଷ ତଥ୍ୟ ସଂଗ୍ରହ କରାଯାଏ। ଏଥିରେ ନିୟୋଜିତ କର୍ମଚାରୀ ନିଷ୍ଠାପର ଭାବେ ଦାୟିତ୍ୱ ନିର୍ବାହ କରିବାକୁ ଜିଲାପାଳ ଗୁରୁତ୍ୱାରୋପ କରିଛନ୍ତି।
ଜନଗଣନା କାର୍ଯ୍ୟକ୍ରମର ଭୁବନେଶ୍ୱରସ୍ଥିତ ଡେପୁଟି ଡାଇରେକ୍ଟର ଆରାଧନ କର୍ମୀ ସୂଚନା ଦେଇ କହିଲେ, ସ୍ବାଧୀନତା ପରେ ୨୦୨୧ରେ ଅଷ୍ଟମ ଥର ପାଇଁ ଜନଗଣନା କରାଯିବ। ଏଥିରୁ ଦେଶର ସାମ୍ପ୍ରତିକସ୍ଥିତି ସମ୍ପର୍କରେ ସବିଶେଷ ତଥ୍ୟ ମିଳିବ। ବାସଗୃହ ସଂଖ୍ୟା, ସଦସ୍ୟଙ୍କ ସଂଖ୍ୟା ଭିତ୍ତିରେ ପ୍ରତି ତହସିଲକୁ କେତେଗୁଡିଏ ବ୍ଲକରେ ବିଭକ୍ତ କରାଯିବ। ପ୍ରତି ବ୍ଲକରେ ୬୦୦ରୁ ୮୦୦ ଲୋକଙ୍କୁ ସାମିଲ କରାଯିବ। ପ୍ରତ୍ୟେକ ଜନଗଣନାକାରୀଙ୍କୁ ଗୋଟିଏ ଲେଖାଏ ନିର୍ଦ୍ଧାରିତ ବ୍ଲକର ଦାୟିତ୍ୱ ଦିଆଯିବ। ୬ ଜନଗଣନାକାରୀ ଜଣେ ସୁପରଭାଇଜର ତତ୍ତ୍ୱାବଧାନରେ କାର୍ଯ୍ୟ କରିବେ। ଉଭୟ ମୋବାଇଲ ଆପ୍ ଏବଂ ପେପର ସିଡ୍ୟୁଲ ମାଧ୍ୟମରେ ଏହି କାର୍ଯ୍ୟ ସମ୍ପାଦନ କରାଯିବ। ବିଭିନ୍ନ ପ୍ରଶ୍ନାବଳୀ ମାଧ୍ୟମରେ ତଥ୍ୟ ସଂଗ୍ରହ କରାଯିବ ବୋଲି ସେ ସୂଚନା ଦେଇଛନ୍ତି।
୨୦୨୧ ଜନଗଣନା କାର୍ଯ୍ୟକ୍ରମରେ ଜିଲାପାଳ ପ୍ରିନ୍ସିପାଲ ସେନ୍ସସ୍ ଅଫିସର ରହିବେ। ସେହିପରି ଅତିରିକ୍ତ ଜିଲାପାଳ ଜିଲା ସେନସସ୍ ଅଫିସର, ଉପଜିଲାପାଳମାନେ ଉପଖଣ୍ଡ ସେନ୍ସସ୍ ଅଧିକାରୀ, ଡେପୁଟି ଡାଇରେକ୍ଟର (ପ୍ଲାନିଂ ଆଣ୍ଡ୍ ଷ୍ଟାଟିଷ୍ଟିକ୍ସ) ସହକାରୀ ଜିଲା ସେନ୍ସସ୍ ଅଧିକାରୀ ଦାୟିତ୍ୱ ନିର୍ବାହ କରିବେ। ତହସିଲଦାର, ବିଡିଓ, ଡିଇଓ, ବିଇଓ ଚାର୍ଜ ଅଫିସର, ଅତିରିକ୍ତ ତହସିଲଦାର, ଅତିରିକ୍ତ ବିଡିଓ ସହକାରୀ ଚାର୍ଜ ଅଫିସର ରହିବେ। ସେହିପରି ଜିଲା କାର୍ଯ୍ୟାଳୟର ସହକାରୀ ଜିଲାପାଳ ସସ୍ମିତା ବେହେରା ନୋଡାଲ ଅଫିସର ଏବଂ ମଧୁସ୍ମିତା ପଣ୍ଡା ଜିଲା ସେନ୍ସସ୍ ପିଆର ଦାୟିତ୍ୱରେ ଅଛନ୍ତି।
ଅତିରିକ୍ତ ଜିଲାପାଳ ଭବେଶ କୁମାର ନାୟକ, ଢେଙ୍କାନାଳ ଉପଜିଲାପାଳ ସାଫଲ୍ୟମଣ୍ଡିତ ପ୍ରଧାନ, କାମାକ୍ଷାନଗର ଉପଜିଲାପାଳ ଇଂ. ବିଷ୍ଣୁ ପ୍ରସାଦ ଆଚାର୍ଯ୍ୟ, ହିନ୍ଦୋଳ ଉପଜିଲାପାଳ ଉଦୟ ମହାପାତ୍ର, ଯୋଜନା ବିଭାଗ ଉପନିର୍ଦ୍ଦେଶକ ସରୋଜ ସେଠୀଙ୍କ ସମେତ ବିଭିନ୍ନ ବିଭାଗର ଜିଲାସ୍ତରୀୟ ଅଧିକାରୀମାନେ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ।
