ନୂଆଗାଁ,୧୯।୬ (ଡି.ଏନ.ଏ.)- ନୟାଗଡ ଜିଲା ନୂଆଗାଁ ବ୍ଲକର ବିଭିନ୍ନ ସ୍ଥାନରେ ନିର୍ମାଣ କରାଯାଉଥିବା ପ୍ରଧାନମନ୍ତ୍ରୀ ଗ୍ରାମ ସଡକରେ ଅନିୟମିତତା ହେଉଥିବା ଅଭିଯୋଗ ହେଉଛି। ବିଭାଗୀୟ ଅଧିକାରୀ ଏହାକୁ ଗୁରୁତ୍ୱ ଦେଉ ନ ଥିବାରୁ ସାଧାରଣରେ ଅସନ୍ତୋଷ ଦେଖା ଦେଇଛି। ପ୍ରଧାନମନ୍ତ୍ରୀ ଗ୍ରାମ ସଡକ ନିର୍ମାଣ କାର୍ଯ୍ୟ ଟେଣ୍ଡର ମାଧ୍ୟମରେ ଠିକାଦାରଙ୍କୁ ଦେଇ ତାହାର ତଦାରଖ ଦାୟିତ୍ୱ ଗ୍ରାମ୍ୟ ଉନ୍ନୟନ ବିଭାଗକୁ ପ୍ରଦାନ କରିଯାଇଛି । କିନ୍ତୁ ଅନେକ ସ୍ଥାନରେ ତାହାର ନିର୍ମାଣ କାର୍ଯ୍ୟ ଅତି ନିମ୍ନମାନର କରାଯାଉଥିଲେ ମଧ୍ୟ ବିଭାଗୀୟ ଅଧିକାରୀ ସେ ସବୁ ପ୍ରତି ଧ୍ୟାନ ଦେଉ ନାହାନ୍ତି। ଏ ନେଇ ମୁଖ୍ୟମନ୍ତ୍ରୀ , ବିଭାଗୀୟ ମନ୍ତ୍ରୀ , ଜିଲାପାଳ, ସ୍ଥାନୀୟ ବିଧାୟକଙ୍କୁ ଅଭିଯୋଗ ପତ୍ର ଦେଇଛନ୍ତି ନୂଆଗାଁ ବ୍ଲକ କୋରଡା ପଞ୍ଚାୟତର ରକ୍ତପଟା, ମୀନାଗାଡିଆ, ଟୁଣିଆପଡା ଓ ବେଲବଣିବାସୀ । ରକ୍ତପଟାଠାରୁ ମୀନାଗାଡିଆ ରାସ୍ତା ନିର୍ମାଣ ପାଇଁ ଲଗାଯାଇଥିବା ସୂଚନା ଫଳକ ଅନୁସାରେ ନିର୍ମାଣ ହେବାକୁଥିବା ୩.୨୦୦ କିମି ମଧ୍ୟରୁ ୨.୧୩୫ ରାସ୍ତା ପିଚୁ ଏବଂ ୧.୦୬୫ କି.ମି କଂକ୍ରିଟ କରାଯିବା ସହ ସେଥିରେ ୧୧ଟି ପୋଲ ନିର୍ମାଣ କରିବାର ନିର୍ଦ୍ଦେଶ ରହିଛି । ସେହି ସବୁ କାର୍ଯ୍ୟ ପାଇଁ ୧୫୦. ୧୧ ଲକ୍ଷ ଟଙ୍କା ଅନୁଦାନ ଦେବା ସହ ରାସ୍ତା ନିର୍ମାଣ କାର୍ଯ୍ୟ ୨୮ା୫ା୨୦୧୮ଠାରୁ ଆରମ୍ଭ କରି ୨୭ା ୦୨ ା୨୦୧୯ରେ କାର୍ଯ୍ୟ ଶେଷ କରିବାର ନିର୍ଦ୍ଦେଶ ଥିବା ବେଳେ ଅଦ୍ୟାବଧି ଅଧା କାମ ହୋଇ ନଥିବା ଦେଖିବାକୁ ମିଳିଛି । ସୂଚନା ଫଳକରେ ୧୧ଟି ପୋଲ ନିର୍ମାଣର ସୂଚନା ଦିଆଯାଇଥିବା ବେଳେ ୬ଟି ନୂଆ ପୋଲ ନିର୍ମାଣ କରି ଗୋଟିଏ ପୁରୁଣା ପୋଲକୁ ମରାମତି କରାଯାଇଛି । ଆବଶ୍ୟକ ପରିମାଣର ସାମଗ୍ରୀ ଲଗାଯାଉ ନାହିଁ। ପିଚୁ ପକାଇବାର ଦୁଇଦିନ ପରେ ପିଚୁ ସବୁ ଉଠି ଯାଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ନିମ୍ନମାନର କାମ ବିଷୟରେ ଆରଡି ଏସଡିଓ ନାରାୟଣ ମୁର୍ମୁଙ୍କୁ ପଚାରିବାରେ କାମ ଠିକ ଚାଲିଛି ଏବଂ ଯେତିକି ପିଚୁ ପଡିଛି ମୋ ଉପସ୍ଥିତିରେ ପଡିଛି ବୋଲି କହିଛନ୍ତି।
