ମୁମ୍ବାଇ: ବଲିଉଡ୍ ଦୁନିଆରେ ଲଭ୍, ରିଲେଶନଶିପ ଆଦିକୁ ନେଇ ସବୁବେଳେ ଚାଲିଥାଏ ଗସିପ୍। ଏବେ ଏମିତି ଏକ ଗସିପ୍ ଶୁଣିବାକୁ ମିଳିଛି ଯାହା ସୋସିଆଲ ମିଡିଆରେ ଭାଇରାଲ ହେଉଛି। ଭିକ୍କି କୌଶଲ। ବର୍ତ୍ତମାନ ସମୟରେ ବଲିଉଡ୍ ଦୁନିଆର ଜଣେ ଆଗଧାଡିର କଳାକାର। ନିଜ ପରିଶ୍ରମରେ ସେ ସଫଳତା ପାଇଥିବା ବେଳେ ଏବେ ତାଙ୍କ ନାଁ ସହ ଯେଉଁ ନାୟିକାଙ୍କ ନାମକୁ ଯୋଡି ଦିଆଯାଇଛି ସେ ତାଙ୍କଠାରୁ ବୟସରେ ୩ ବର୍ଷ ସାନ ବୋଲି ଜଣାପଡିଛି। ଅସଲ କଥା ହେଲା ଭିକ୍କି କୁଆଡେ ଏବେ ବଲିଉଡ୍ ବିୟୁଟି କ୍ୟାଟ୍ରିନା କୈଫଙ୍କ ପ୍ରେମରେ ପଡିଛନ୍ତି। ତେବେ ଏହି ଘଟଣା ଆଜିକାଲିର ନୁହେଁ ବରଂ ୨୦୧୮ ମସିହାରୁ ଏମାନଙ୍କ ଭିତରେ ପ୍ରେମ ସମ୍ପର୍କ ଗଢି ଉଠିଛି ବୋଲି କୁହାଯାଉଛି। ଶନିବାର ଭିକ୍କିଙ୍କ ୩୨ ତମ ଜନ୍ମଦିନ ଥିବାରୁ ତାଙ୍କ ପ୍ରଶଂସକମାନେ ପୁଣି ଥରେ ଏହି କଥାକୁ ମନେ ପକାଇଛନ୍ତି। ବଲିଉଡ୍ ମୁଭି ‘ଉରି : ଦ ସର୍ଜିକାଲ ଷ୍ଟ୍ରାଇକ’ରେ ନ୍ୟାଶନାଲ ଆଓ୍ବାର୍ଡ ପାଇଥିବା ଭିକ୍କି ଏବେ କ୍ୟାଟ୍ରିନାଙ୍କ ପ୍ରେମରେ ପଡିଥିବା ଆଲୋଚନା ହେଉଥିଲେ ମଧ୍ୟ ଏମାନେ କିନ୍ତୁ କେହି କେବେ ଏକଥାକୁ ସ୍ବୀକାର କରି ନାହାନ୍ତି। ୨୦୧୮ରେ ଏକ ଆଓ୍ବାର୍ଡ ସେରିମନିରେ ସଲମାନଙ୍କ ସାମ୍ନାରେ ଭିକ୍କି କ୍ୟାଟ୍ରିନାଙ୍କୁ ପ୍ରପୋଜ କରିଥିବା ବେଳେ ଏହା ଯଦିଓ ହାସ୍ୟରୋଳ ସୃଷ୍ଟି କରିଥିଲା ଏବେ କିନ୍ତୁ ଏହା ଲୁଚିଛପି ଚାଲିଛି ବୋଲି ଆଲୋଚନା ହେଉଛି। ଏହାପରେ ଜୋୟା ଅଖତରଙ୍କ ଘରେ ଆୟୋଜିତ ଏକ ପାର୍ଟିରେ ଉଭୟଙ୍କୁ ବହୁ ପାଖାପାଖି ଦେଖିବାକୁ ମିଳିଥିଲା। ଏହାପରେ ଆଲୋଚନା ହୋଇଥିଲା କି ଭିକ୍କି ଓ କ୍ୟାଟ୍ରିନା ପରସ୍ପରକୁ ଡେଟ୍ କରୁଛନ୍ତି। ହେଲେ ଏମାନେ ଏପର୍ଯ୍ୟନ୍ତ ଏହାକୁ ଖୋଲା ଖୋଲି କେବେବି ସ୍ବୀକାର କରି ନାହାନ୍ତି। କିନ୍ତୁ ଏମାନଙ୍କର କ୍ୟାମେରା ଆଢୁଆଳରେ ଲୁଚିଛପି ମିଳାମିଶା କରିବା, ଘଣ୍ଟା ଘଣ୍ଟା ଫୋନରେ କଥା ହେବା ଏବେବି ଆସେ ଚର୍ଚ୍ଚାକୁ।
