ଭବାନୀପାଟଣା,୩।୧(ସ୍ବ.ପ୍ର/ଡି.ଏନ୍.ଏ)-
କଳାହାଣ୍ଡି ଜିଲାରେ ବଛର କେତେଟା ତଲେ ନିଜର ମାଏଝିର ଶବକେ ଖଁଦେ ବୁହି ଚରଚାକେ ଆସିଥିଲେ ଦାନ ମାଝି। ଇ ଘଟନା ସେତେବେଲେ ଜାତୀୟସ୍ତରରେ ଚରଚା ହେଇଥିଲା। ଇତାର ପରେ ରାଏଜ୍ ସରକାର ମହାପ୍ରୟାଣ ଯୋଜନା ଆରମ୍ କରି ସରକାରୀ ଡାକ୍ତରଖାନାରୁ ଶବ ନେବାର ଲାଗି ମହାପ୍ରୟାଣ ଗାଡ଼ି ଯୁଗେଇ ଦେଇଥିଲେ। ହେଲେ ଅନେକ ସମିଆରେ ଗରିବ୍ ଦୁଖି ଯୋଜନାର ଲାଭ ନାଇଁ ପାଇପାରୁଥିବାର ଅଭିଯୋଗ ହେଉଛେ। ଫେନ୍ଘାଏ ଇ ସମାନ ଘଟନାର ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା ଭବାନୀପାଟଣା ମୁଖିଆ ଡାକ୍ତରଖାନାରେ।
ସୂଚନା ଅନ୍ସାରେ ଲାଞ୍ଜିଗଡ଼ ବ୍ଲକ ବେନଗଁା ପଁଚେତ୍ ବରାପାଲି ଗଁାର କୁନି ନାଏକ(୧୯)। ଗଲା ୬ ଦିନ୍ ତଲେ ସେ ଜରେ ପଡ଼ି ଭବାନୀପାଟଣା ଜିଲା ମୁଖିଆ ଡାକ୍ତରଖାନାରେ ଚିକିଛିତ ହେଉଥିଲେ। ହେଲେ ବୁଧୁବାର ଚିକିଛାଧୀନ ଅବସ୍ତାରେ ତାକର ମୁର୍ତୁ ହେଇଥିଲା। ପରିବାର ଲୋକ୍ ଶବ ନେବାକେ ଚିକିଛାଲୟ କତୁରପକ୍ଷକୁଁ ମହାପ୍ରୟାଣ ଗାଡ଼ିର ଲାଗି ଗୁହାରି କରିଥିଲେ। ହେଲେ କତୁରପକ୍ଷ ଭିନେ ଭିନେ ବାହାନା କରି କଥାଟାକେ ଆଡେଇ ଦେଇଥିଲେ। ବହୁତ୍ ବେଲ ଟାକ୍ଲା ଉତାରୁ ପରିବାର ଲୋକ୍ ଶବକେ ଖଁଦେଇ ଗଁାକେ ନେବାକେ ବାହାରିଥିଲେ। ପରିବାର ଲୋକ୍ ୬ କି.ମି. ଶବ ବୁହିକରି ନେଲା ଉତାରୁ ସ୍ବାସ୍ଥ୍ୟ ବିଭାଗର ଚେତା ପଶିଥିଲା। ଶବ ନେବାକେ ପରିବାର ଲୁକ୍କର ପାସ୍କେ ଡାକ୍ତରଖାନା କତୁରପକ୍ଷ ମହାପ୍ରୟାଣ ଗାଡ଼ି ପଠେଇଥିଲେ। ହେଲେ ସେତେବେଲେ ପରିବାର ଲୋକ୍ ଧାର ଉଧାର କରି ଶବ ଗଁାକେ ନେବାର ଲାଗି ଗୁଟେ ଗାଡ଼ି ଭଡ଼ା କରିସାରିଥିଲେ। ସେ ଭଡ଼ା ଗାଡ଼ିରେ ପରିବାର ଲୋକ୍ ଶବ ଗଁାକେ ନେଇଥିଲେ। ଜନସାଧାରନକୁଁ ଉତମ ସ୍ବାସ୍ଥ୍ୟସେବା ଯୁଗେଇଦେବାର ଉଦେଶ୍ରେ ସରକାର ୫-ଟି ଲାଗୁ କରିଥିଲେ। ଲୋକ୍ ବି ଭାବୁଥିଲେ ଏଥରକ ଭଲ ସ୍ବାସ୍ଥ୍ୟସେବା ମିଲିପାରବା। ଇଆଡ଼େ ମୋ ସରକାର ଯୋଜନାରେ ସ୍ବାସ୍ଥ୍ୟ ବିଭାଗକେ ଯୁଡ଼ି ସରକାର ଗରବ୍ ଅନୁଭବ କରୁଥିଲାବେଲେ କଳାହାଣ୍ଡି ଜିଲାରେ ଇତାର ଜିଁତା ଉଦାହରନ୍ ଦେଖ୍ବାକେ ମିଲିଛେ। ଇଆଡ଼େ କଳାହାଣ୍ଡି ଜିଲାପାଳ ଡ.ଗାଭାଲି ପରାଗ ହର୍ଷଦ ଘଟନା ବାବ୍ଦେ ଟ୍ବିଟ କରି ପରିବାର ଲୁକ୍କୁ ଡାକ୍ତରଖାନା କତୁରପକ୍ଷ ଗାଡ଼ି ଯୁଗେଇ ଦେଇଥିଲେ, ହେଲେ ସେମାନେ ନେବାକେ ମନାକଲେ। ଇଥିରଲାଗି ପୋଲିସ୍ ଆର ଡାକ୍ତରଖାନା କତୁରପକ୍ଷ ପରିବାର ଲୁକ୍କୁ ବୁଝାଶୁଝା ବି କରିଥିଲେ। ଯଦି ଇ ଘଟନାରେ କେହି ଦୁଶିଥିବେ ତାକର ବିରୋଧ୍ନେ କଡ଼ା ପଦକ୍ଷେପ ନିଆଯିବା ବଲି କହିଛନ୍।
