ପରଜଙ୍ଗ, ୧୮।୮(ଡି.ଏନ୍.ଏ.)-ଢେଙ୍କାନାଳ ବନଖଣ୍ଡ ମହାବିରୋଡ ରେଞ୍ଜ ଅଧୀନ ଡିହଡୋଳ ଫରେଷ୍ଟ ସେକ୍ସନରେ ନରହନ୍ତା ଦନ୍ତା ତାଣ୍ଡବ ଚରମ ସୀମାରେ ପହଞ୍ଚତ୍ଛି। ଦାନ୍ତ କଟାଯିବା ପରେ କିଛି ମାତ୍ରାରେ ଶାନ୍ତ ପଡ଼ିଥିବା ହାତୀ ହଠାତ୍ ହିଂସ୍ର ହୋଇଉଠିଛନ୍ତି। ସପ୍ତାହେ ହେଲା ହାତୀ ଉନ୍ମତ୍ତ ହୋଇ ଘୂରି ବୁଲୁଛି। ଯେଉଁ ଗଁାରେ ପଶୁଛି ସେଠି ବ୍ୟାପକ କ୍ଷୟକ୍ଷତି କରୁଛି। ଛାତ ଘର, ପାଚେରି, ଛପର କିଛି ବି ଛାଡୁନାହିଁ। ହାତୀକୁ ଘଉଡ଼ାଇବା ଲାଗି ବନ ବିଭାଗ କର୍ମଚାରୀଙ୍କ ସମସ୍ତ ଉଦ୍ୟମ ଫେଲ ମାରୁଛି। ନରହନ୍ତା ଦନ୍ତା ଉପଦ୍ରବରେ ଅଞ୍ଚଳବାସୀ ତ୍ରାହି ତ୍ରାହି ଡାକୁଥିବାବେଳେ ଏହାକୁ ନେଇ ଅସନ୍ତୋଷ ତୀବ୍ର ହେବାରେ ଲାଗିଛି।
ଡିହଡୋଳ ଫରେଷ୍ଟ ସେକ୍ସନରେ ୧୮ରୁ ଊର୍ଦ୍ଧ୍ୱ ହାତୀ ଆତଙ୍କ ସୃଷ୍ଟି କରି ଚାଲିଛନ୍ତି। ହେଲେ ଦନ୍ତା ପଲରୁ ଅଲଗା ହୋଇ ବାରମ୍ବାର ଜନବସତି ମୁହଁା ହେଉଛି। ଶୁକ୍ରବାର ରାତି ସାରା କନ୍ଦରସିଂହା ପଞ୍ଚାୟତ ମଝିକା ଗ୍ରାମରେ ତାଣ୍ଡବ ରଚିଥିବା ଉକ୍ତ ହାତୀ ଶନିବାର ରାତିରେ ସରାଙ୍ଗ ପଞ୍ଚାୟତ କନ୍ଦରସିଂହା ଗ୍ରାମରେ ଉପଦ୍ରବ ସୃଷ୍ଟି କରଛି। ହାତୀକୁ ଜନବସତିରୁ ବାହାର କରିବାକୁ ଲୋକମାନେ ବାଣ ଫୁଟାଇଥିଲେ। ଏଥିରେ ଅଧିକ ହିଂସ୍ର ହୋଇ ହାତୀ ଗ୍ରାମରେ ବ୍ୟାପକ କ୍ଷତି କରିଥିଲା। ଏଥିରେ ହରିଶ୍ଚନ୍ଦ୍ର ବିଶ୍ୱାଳ, ମୁଗା ନାୟକ, ସୁମ ନାୟକ, ତ୍ରିଲୋଚନ କାଣ୍ଡି, ଶାନ୍ତନୁ କାଣ୍ଡି, ସନାତନ କାଣ୍ଡି, ସୁନୀଲ ବେହେରା, ଶଙ୍କର୍ଷଣ ଶଙ୍ଖୁଆ, ସରାଙ୍ଗ ଗ୍ରାମର ଦିବାକର ନାହାକଙ୍କ ଘର ଭାଙ୍ଗିଯାଇଛି। ଘଡ଼ଘଡ଼ି ସାଙ୍ଗକୁ ବର୍ଷା କଚାଡୁଥିବାବେଳେ ଭଙ୍ଗା ଘର ଛାଡ଼ି କ୍ଷତିଗ୍ରସ୍ତ ପରିବାର ଲୋକେ ଛାତ ଘର ଉପରେ ଅସହାୟ ଅବସ୍ଥାରେ ରାତି କଟାଇଥିଲେ।
ଅଞ୍ଚଳରେ ହାତୀଭୟ ଲାଗିରହିଛି। ସନ୍ଧ୍ୟା ହେଲେ ତାଟିକବାଟ ପଡ଼ିଯାଉଛି। ଘରକୁ ବାହାରିବାକୁ ଲୋକେ ସୁରକ୍ଷିତ ମଣୁନାହାନ୍ତି। ଏ ନେଇ ଫରେଷ୍ଟର ରାମଚନ୍ଦ୍ର ରାଉତ କୁହନ୍ତି, ଉକ୍ତ ଦନ୍ତା ଆକ୍ରମଣରେ ୧୦ରୁ ଊର୍ଦ୍ଧ୍ୱ ଲୋକଙ୍କ ଜୀବନ ଗଲାଣି। ହାତୀକୁ ଅନ୍ୟତ୍ର ଘଉଡ଼ାଇବାକୁ ଚାପ ବଢୁଛି। ବନ କର୍ମଚାରୀ ଏବଂ ହାତୀ ସ୍କ୍ବାଡ୍ ସଦସ୍ୟ ବର୍ଷାରେ ଭିଜି ହାତୀକୁ ଘଉଡ଼ାଇବାକୁ ଉଦ୍ୟମ କରିଥିଲେ। ହେଲେ କୌଣସି ସୁଫଳ ମିଳୁନାହିଁ ବୋଲି ସେ ସୂଚନା ଦେଇଛନ୍ତି। ଅନ୍ୟପଟେ କ୍ଷୟକ୍ଷତି ଆକଳନ ପରେ କ୍ଷତିଗ୍ରସ୍ତଙ୍କୁ କ୍ଷତିପୂରଣ ପ୍ରଦାନ କରାଯିବ ବୋଲି ରେଞ୍ଜର ହରମୋହନ ନାୟକ ସୂଚନା ଦେଇଛନ୍ତି।
