ନିମାପଡ଼ା,୧୨ା୧୧(ଡି.ଏନ୍.ଏ)
ପୁରୀ କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ ଓ ଜିଲା କୃଷି ବିଭାଗର ଅଧିକାରୀମାନେ ସୋମବାର ନିମାପଡ଼ାର ରେଞ୍ଚ ଶାସନ, ହରିପୁର, ଭୋଗଶାଳଦା, ନୁଆରକିରି ଆଦି ଅଞ୍ଚଳରେ ଧାନ କ୍ଷେତ ପରିଦର୍ଶନ ସହ ସମୀକ୍ଷା କରିଥିଲେ। ଧାନରେ ଚକଡ଼ା ଓ ମାଟିଆଗୁଣ୍ଡି ପୋକ ଲାଗି ଫସଲ ହାନୀ ହେଉଥିବା ସମ୍ପର୍କରେ ଚାଷୀମାନଙ୍କ ସହ ଆଲୋଚନା କରିଥିଲେ। ପୁରୀ କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ ସଞ୍ଜୟ କୁମାର ମହାନ୍ତି, ଟ୍ରେନିଂ ଅଫିସର(ପୁରୀ) ବଳଦେବ ମହାପାତ୍ର, ଓ୍ବାଟର ମ୍ୟାନେଜମେଣ୍ଟ ସ୍ପେଶାଲିଷ୍ଟ ପୀୟୁଷ ପରିଡା, ନିମାପଡ଼ା କୃଷି ଜିଲା ଅଧିକାରୀ ରମେଶ ଚନ୍ଦ୍ର ବେଉରା, ସହକାରୀ କୃଷି ଅଧିକାରୀ ସୁବାଷ ଚନ୍ଦ୍ର ବାରିକ, ଶସ୍ୟ ସଂରକ୍ଷଣ ଅଧିକାରୀ ନକୁଳ ମଲ୍ଲିକ, ବ୍ଲକ ଲେବଲ ଟେକ୍ନୋଲୋଜି ମ୍ୟାନେଜର ଶ୍ରୀକାନ୍ତ ବଢେଇ ପ୍ରମୁଖ ପରିଦର୍ଶନ କରିବା ସହ ଫସଲର ରୋଗ ସମ୍ପର୍କରେ ଅନୁଧ୍ୟାନ କରିଥିଲେ। ସୂଚନାଥାଉ କି, ନିମାପଡ଼ା ବ୍ଳକ ଅନ୍ତର୍ଗତ ବାମନାଳ, ସଲଙ୍ଗ, ଅରିଷଣ୍ଢ, ଅନ୍ତୁଆର କୋଟକୋସାଙ୍ଗ, ଡେଣୁଅଁ, ଧଳେଶ୍ୱର, ଚଅଁରାପଦା ପଞ୍ଚାୟତର ଧାନ ଫସଲରେ ଚକଡା ପୋକ ଓ ମାଟିଆଗୁଣ୍ଡି ପୋକ ଲାଗିଥିବା ଦେଖିବାକୁ ମିଳିଛି। ଫଳରେ ବ୍ଲକର ଶହ ଶହ ଏକର ଧାନ ଫସଲ ହାନୀ ଆଶଙ୍କା ଥିବା ଚାଷୀ ଶରତ ବିଶ୍ୱାଳ, ତୋଫାନ ବିଶ୍ୱାଳ, ସଦାଶିବ ବିଶ୍ୱାଳ, ପ୍ରଭାତ ପ୍ରଧାନ, ଫକିର ପରିଡା ପ୍ରମୁଖ କହିଛନ୍ତି। ରୋଗ ପୋକ ନିୟନ୍ତ୍ରଣ ଦିଗରେ ବ୍ୟାପକ ପଦକ୍ଷେପ ନିଆଯିବା ସହ ଚାଷୀଙ୍କୁ କୀଟନାଶକ ଔଷଧ ଯୋଗାଇଦେବା ପାଇଁ କୃଷି ଅଧିକାରୀଙ୍କ ନିକଟରେ ଦାବି ହୋଇଛି।
